လါအ့ဖြ့ၣ် ၂၆သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဃိၣ်သၢဖျၢၣ်ဝ့ၢ်မဲၢ်ကသးသဝီဟီၣ်ကဝီၤတၢ်ခူၣ်စၢၢ်ထးတၢ်လီၢ်တၢ်ကျဲအပူၤ,တနံၤဃီအတီၢ်ပူၤသုးကီၣ်ကးကဘီယူၤဟဲတ့ၢ်လီၤဝဲမ့ၣ်ပိၢ်ဒီးကဘီယူၤအဖျၢၣ်(၃၀)ဘျဲၣ်အိၣ်ဝဲအဂ့ၢ်,ဝ့ၢ်ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
တနံၤအံၤလါအ့ဖြ့ၣ်(၂၆)သီဂီၤခီ(၆)နၣ်ရံၣ်ဘျဲၣ်အနံၤအဆၢကတီၢ်န့ၣ်,သုးကီၣ်ကး(Y12)ကဘီယူၤတ့ၢ်လီၤဝဲမ့ၣ်ပိၢ်လၢမဲၢ်ကသးတၢ်မၤစၢၢ်ထးတၢ်လီၢ်တဖၣ်ဃုၥ်ဒီးသုးက့ဝဲၤဒၢးတၢ်လီၢ်တဖၣ်အပူၤအိၣ်ဝဲအဖျၢၣ်(၃၀)ဘျဲၣ်အဂ့ၢ်,ဃိၣ်သၢဖျၢၣ်ဝ့ၢ်ပၢြပးပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ.
“ဖဲမုၢ်ဝါထီၣ်ဆၢကတီၢ်သုးကီၣ်ကးကဘီယူၤ(Y12)တဘ့ၣ်ဟဲထီၣ်တ့ၢ်လီၤဝဲမ့ၣ်ပိၢ်အဖျၢၣ်(၃၀)ဘျဲၣ်ဃၣ်ဃၣ်လၢမဲၢ်ကသးတၢ်မၤစၢၢ်ထးအလီၢ်ဃုၥ်ဒီးသုးက့ဝဲၤဒၢးတၢ်လီၢ်တဖၣ်အပူၤန့ၣ်လီၤ.တ့ၢ်လီၤတၢ်န့ၣ်တဘၣ်လိၤလိၤလၢတၢ်မၤ(မဲ)ပူၤဘၣ်.ဘၣ်လၢထံကျိဝၢ်မုၢ်နုၥ်သုးက့ဝဲၤဒၢးတကပၤအဃိ,တၢ်သူၣ်ထီၣ်ဘှီထီၣ်တၢ်လီၢ်တၢ်ကျဲတဖၣ်ဟးဂုၤဟးဂီၤအိၣ်ဝဲဒၣ်တဆံးတက့ၢ်အဂ့ၢ်န့ၣ်လီၤ.မ့မ့ၢ်လၢပှၤကညီတၢ်ဘၣ်ဒိဘၣ်ထံးတခီတအိၣ်ဝဲဘၣ်.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,သုးကီၣ်ကးတ့ၢ်လီၤမ့ၣ်ပိၢ်ကဲထီၣ်သးဒ်အံၤအဃိတကီၢ်ခါခဲအံၤတၢ်ကးတံၥ်ဃၥ်ဝဲကမျၢၢ်တၢ်ဟးထီၣ်က့ၤလီၤလၢဃိၣ်သၢဖျၢၣ်ဒီးမဲၢ်ကသးတၢ်လီၢ်တဖၣ်အပူၤအိၣ်ဝဲဒီးဘၣ်ဃးဒီးတၢ်ကးတံၥ်ဃၥ်ဝဲတၢ်နုၥ်လီၤဆူမဲၢ်ကသးဟီၣ်ကဝီၤအပူၤအဖီခိၣ်,ဃိၣ်သၢဖျၢၣ်ဝ့ၢ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ.
“ကဘီယူၤန့ၣ်ဟဲတ့ၢ်လီၤတၢ်ဖဲတၢ်လီၢ်တၢ်ကျဲတဖၣ်အပူၤန့ၣ်အိၣ်လၢအဖျၢၣ်(၃၀)ဘျဲၣ်ညါ,အဃိန့ၣ်တၢ်ကဲထီၣ်သးဒ်အံၤအဖီခိၣ်,အခဲအံၤတၢ်ပံးကွံၥ်ကမျၢၢ်တၢ်နုၥ်လီၤဟးထီၣ်လၢမဲၢ်ကသးတၢ်လီၢ်အပူၤလံ,ပှၤတၢ်ချၢနုၥ်လီၤဟးထီၣ်တန့ၢ်လၢၤဘၣ်.ယပါနါက့အိၣ်ဖဲန့ၣ်လီၤ.ပလဲၤလၢအအိၣ်တသ့ဘၣ်အသိး,အဝဲနါက့တဟဲက့ၤလၢပအိၣ်ဒံးဘၣ်.ပကျဲးစၢးဆဲးကျိးအီၤအဖၢမုၢ်လီၤ”အဂ့ၢ်စံးဝဲဒၣ်န့ၣ်လီၤ.
ဒီးကျဲတၢ်နုၥ်လီၤဟးထီၣ်အံၤတၢ်ကကးတံၥ်ဝဲပှဲၤနံၤပှဲၤသီလဲၣ်န့ၣ်,လီၢ်ကဝီၤဖိတဖၣ်တသ့ၣ်ညါလီၤတံၢ်ဝဲဒံးဘၣ်အဂ့ၢ်စံးစ့ၢ်ကီးဝဲဒၣ်န့ၣ်လီၤ.
တကတီၢ်ဃီ,ဃိၣ်သၢဖျၢၣ်ဝ့ၢ်ဟီၣ်ကဝီၤအပူၤတၢ်ဒုးတၢ်ယၤလၢသုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်ဘၢၣ်စၢၤတအိၣ်ဝဲဘၣ်ဒီးသုးကီၣ်ကးအံၤတ့ၢ်လီၤဝဲမ့ၣ်ပိၣ်ဒ်အံၤအဖီခိၣ်,ဘၣ်ထွဲဘၣ်ဃးဝဲဒီးကီးတရံးကြုၢ်တုတၢ်ဒုးတၢ်ယၤအိၣ်ဝဲအဂ့ၢ်ဟီၣ်ကဝီၤပှၤဘၣ်မူဘၣ်ဒါတဖၣ်ပဲၥ်ထံနီၤဖးစံးဝဲဒၣ်ဒီးသုးကီၣ်ကးတ့ၢ်လီၤမ့ၣ်ပိၢ်ဘျီဝဲအံၤခီဖျိကမျၢၢ်လီၢ်ကဝီၤဖိတဖၣ်ဒိးန့ၢ်ဘၣ်ဝဲတၢ်ကစီၣ်ဒီးအိၣ်ကဒုဆိဝဲအသးအဃိတၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်,သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
ဃိၣ်သၢဖျၢၣ်ဝ့ၢ်ဟီၣ်ကဝီၤတၢ်မၤလၢၢ်ဒီးစၢၢ်ထးတၢ်လီၢ်တဖၣ်အပူၤ,အပူၤကွံၥ်(၂၀၂၂)နံၣ်,နံၣ်ဘူးကလၢၥ်အပူၤသုးကီၣ်ကးမၤကဘီယူၤတ့ၢ်လီၤဝဲမ့ၣ်ပိၢ်အဃိ,ပှၤခူးလၢၢ်ဖိဒီးတရူးထံဖိကီၢ်ဖိတဖၣ်ဘၣ်သံဘၣ်ဒိဘၣ်ထံးဝဲအိၣ်အဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,တၢ်မၤလၢၢ်ဒီးစၢၢ်ထးတၢ်လီၢ်တဖၣ်အပူၤစးထီၣ်ဖဲလါအ့ဖြ့ၣ်နုၥ်လီၤဒီးအပူၤကွံၥ်တါလီၤအဆၢကတီၢ်တၢ်ဘၣ်ယိၣ်အိၣ်ဝဲလၢသုးကီၣ်ကးကဘီယူၤကဟဲထီၣ်တ့ၢ်လီၤမ့ၢ်ပိၣ်အိၣ်ဝဲအဃိ,ပှၤဘၣ်မူဘၣ်ဒါတဖၣ်ဟ့ၣ်ပလီၢ်ဆိဝဲလီၢ်ကမျၢၢ်တဖၣ်လၢကအိၣ်ဒီးတၢ်ပလီၢ်ပဒီသးအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
