လါအ့ဖြ့ၣ် ၂၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ အပူၤကွံၥ်နွံအခါခီဖျိတၢ်ဒုးကဲထီၣ် ဒီး ပယီၤသုးကဘီယူၤဟဲခးလီၤတၢ်အဃိ ကရူၢ်(၉)ဘ့ၣ်ပူၤကမျၢၢ်သ့ၣ်တဖၣ်ဘၣ်ဃ့ၢ်ထီၣ်၀ဲဒီးတၢ်ကီတၢ်ခဲအိၣ်လၢ အိၣ်ဆိးအီၣ်အီ တကပၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
စးထီၣ်ဖဲအပူၤကွံၥ်လါအ့ဖြ့ၣ် ၁၄ သီအနံၤန့ၣ် လၢကြုၢ်တုဟီၣ်က၀ီၤတၢ်လီၢ်အါတီၤအပူၤတၢ်ဒုးကဲထီၣ်၀ဲလၢဟီၣ်က၀ီၤ(KNLA) သုးပၥ်ဖှိၣ် ဒီးပယီၤသုးအဘၢၣ်ဒီး တကးဒံးဘၣ်ခီဖျိပယီၤသုးခးလီၤကျိဖးဒိၣ်,ကဘီယူၤစ့ၢ်ကီးလဲၤတ့ၢ်လီၤမ့ၣ်ပိၢ်အဃိ ကရူၢ်(၉)ဘ့ၣ်ပူၤ ကမျၢၢ်အဂၤ(၃၀၀၀)ဘျဲၣ်ဘၣ်ဃ့ၢ်ထီၣ်သုးလီၢ်သုးကျဲဆူတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီကမျၢၢ်လၢအဃ့ၢ်ထီၣ်သ့ၣ်တဖၣ်အံၤဟးစံၣ်ပြံစံၣ်ပြါတမ့ၢ်အစံၣ်ထီၣ်အိၣ်ဆိး၀ဲတၢ်လီၢ်တတီၤဃီဘၣ်ဒီး တနီၤန့ၣ်လဲၤစံၣ် အိၣ်၀ဲလၢအသမူသကိး,အဘူးအတံၢ်ဟံၣ်လၢကီၢ်ဆၣ်အဂၤတဖၣ်အပူၤအိၣ်၀ဲန့ၣ်လီၤ.ဘၣ်ဆၣ် မ့မ့ၢ်ကမျၢၢ် လၢအစံၣ်အိၣ်ကဒုသးဖဲဟီၣ်က၀ီၤပူၤအံၤတဖၣ်သ၀ီတဖျၢၣ်န့ၣ်အနီၣ်ဂံၢ်ကအိၣ်လၢ(၆၀၀)ဃၣ်ဃၣ်ညါအဃိ တၢ်ကီတၢ်ခဲအိၣ် လၢအိၣ်ဆိးအီၣ်အီတကပၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤ(CIDKP)ပှၤဘၣ်မူဘၣ်ဒါတဂၤ စံး၀ဲလၢ“တၢ်ကီတၢ်ခဲဒုအိၣ်လၢတၢ်အီၣ်တၢ်အီ,တၢ်အိၣ်တၢ်ဆိးလီၢ်ကျဲမီၤနီၤ. လၢညါခါန့ၣ်ပတဆိမိၣ်လၢသ၀ီတဖျၢၣ်န့ၣ်ပှၤကဟဲစံၣ်အိၣ်ထဲထဲအံၤဘၣ်.ခဲအံၤသ၀ီတဖျၢၣ်န့ၣ်ဟဲလၢအဂၤ(၅၀၀)(၆၀၀)ဃၣ်ဃၣ်ညါအဃိတၢ်ကီတၢ်ခဲအိၣ်.ဘၣ်မနုၤအဃိလဲၣ်န့ၣ်တနီၤနီၤန့ၣ်ပၣ်ဃုၥ်အဖိဆံး,တနီၤန့ၣ်အတၢ်အီၣ်တၢ်အီတပၣ်ဘၣ်.တနီၤခီန့ၣ်ကဘီယူၤကွံၥ်တၢ်အဃိအဖိအ၀ၤသံ.ပထံၣ်န့ၣ်ဘၣ်ပသးတမုၥ်စ့ၢ်ဘၣ်.တနီၤခီန့ၣ်ဟဲထီၣ်အဒၢအဖိကအိၣ်ဖျဲၣ်လီၤ.ဘၣ်ဆၣ်အ၀ဲသ့ၣ်ဟဲထီၣ်စံၣ်အိၣ်ဖဲအံၤဒုကဘံၣ်ကဘၢတစဲးသနါက့တၢ်ဘံၣ်တၢ်ဘၢတအိၣ်လၢပှဲၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ် ကြုၢ်တုကီၢ်ဆၣ်ပူၤ ကရူၢ်(၉)ဘ့ၣ် ဒူသ၀ီလၢအဘၣ်ဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ ယ့ၤပူၤကၠံကရူၢ်, ကီၢ်၀ါလဲကရူၢ်,မံၣ်ကလိၤ,ကါနံၤ,ယွါကလ့,ကီၢ်လယါ,တလွဲထီၣ်,မၠီၣ်ကၠၤအ့ဒီးတီၤကၠၤအ့ကရူၢ် သ့ၣ်တဖၣ် န့ၣ်လီၤ.
တကီၢ်ခါခဲအံၤကမျၢၢ်လၢအဃ့ၢ်ထီၣ်တဖၣ်အံၤ လၢအ၀ဲသ့ၣ်အဂီၢ်တၢ်ဆီလီၤပၥ်လီၤအလီၢ်လီၤလီၤဆီဆီတအိၣ်၀ဲဘၣ် ခီဖျိပှၤဘၣ်ယိၣ်လၢကဘီယူၤကဟဲခးလီၤတၢ်အဃိ လီၢ်က၀ီၤပှၤဘၣ်မူဘၣ်ဒါဆီလီၤပၥ်လီၤဒုးအိၣ်ဆိအ၀ဲသ့ၣ်လၢ သ၀ီပူၤပှၤဟံၣ်လၢအခီအကစၢ်တအိၣ်ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကြုၢ်တုကီၢ်ဆၣ်ဟီၣ်က၀ီၤအပူၤ စးထီၣ်ဖဲတၢ်ဒုးကဲထီၣ်ဒီးပယီၤသုးကဘီယူၤလဲၤတ့ၢ်လီၤမ့ၣ်ပိၢ်ဒီတကတီၢ်အပူၤ သီခါဃုၥ် ဒီးကမျၢၢ်သံဘၣ်ဒိဘၣ်ထံးအါမးအကျါဖဲန့ၣ် ပှၤလၢအသံလၢကျိဖးဒိၣ်ဒီးကဘီယူၤအံၤအဃိ ကအိၣ်လၢအဂၤ (၂၀)ဘျဲၣ်လံ ဒီးဖဲန့ၣ်အကျါပၣ်ဃုၥ်၀ဲဖိဒံဖိသၣ်သ့ၣ်တဖၣ်အဂ့ၢ်န့ၣ် ပှၤဘၣ်မူဘၣ်ဒါတဂၤဃီ၀ဲန့ၣ် စံး၀ဲန့ၣ်လီၤ.
ဒ်န့ၣ်အသိးကီးတရံးဒီးကြၢ်တုကီၢ်ဆၣ်ဟီၣ်က၀ီၤအပူၤ ဒ်သိးသုးမီၤစိရိၤအသုးကလၢၤကလီၤမၢ်ကွံၥ်အဂီၢ်န့ၣ် စးထီၣ်ဖဲလါအ့ဖြ့ၣ် ၁၀ ဘျဲၣ်အံၤ တၢ်ပၢၢ်ဆၢသုးပၥ်ဖှိၣ်ကရူၢ်နုၥ်လီၤခး၀ဲပယီၤသုးတၢ်လီၢ်သ့ၣ်တဖၣ်လၢတၢ်လီၢ်တဘျုးတီၤအဃိ ကျိဖးဒိၣ်အမဲၥ်ညါ ကဘီယူၤလဲၤခးလီၤတၢ်အဃိကမျၢၢ် ကမျၢၢ်ဃ့ၢ်ထီၣ်၀ဲဒၣ်အါအါဂီၢ်တကးဒံးဘၣ်တုၤလၢခဲအံၤတၢ်ဒုးဆဲးကဲထီၣ်၀ဲအဖၢမုၢ်အဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤန့ၣ်လီၤ.
