လါအ့ဖြ့ၣ် ၂၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်က၀ီၤတဖၣ်အပူၤ စးထီၣ်လၢသုးကီၣ်ကးဘိးဘၣ်ရၤလီၤတၢ်ပတုၥ်တၢ်ခး ဒီတကတီၢ်အပူၤန့ၣ် အ၀ဲသ့ၣ်မၤ၀ဲကလံၤကျါဒုးယၤတၢ်ဟူးတၢ်ဂဲၤတပယူၥ်ဃီဒီး ကမျၢၢ်စ့ၢ်ကီးသံဘၣ်ဒိဘၣ်ထံး၀ဲဒၣ်အါမး အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးကီၣ်ကးအံၤ လၢတၢ်ကတိစၢၤမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် စးထီၣ်လါအ့ဖြ့ၣ် ၂ သီ တုၤ ၂၂ သီ လၢအသီ (၂၀)အတီၢ်ပူၤန့ၣ် ကပတုၥ်ဆိဃၥ်၀ဲတၢ်ဒုးတစိၢ်တလီၢ်ဒီး ဒ်န့ၣ်အသိးတနံၤအံၤအတၢ်ပတုၥ်ဆိဃၥ်တၢ်ခး အံၤမ့ၢ်၀ဲလီၢ်ခံကတၢၢ် တသီန့ၣ်လီၤ.
သုးကီၣ်ကးအံၤစးထီၣ်လၢအဘိးဘၣ်ရၤလီၤ၀ဲလၢကပတုၥ်တၢ်ခးတနံၤဃီတုၤလၢခဲအံၤန့ၣ် ခးလီၤ၀ဲကျိဖးဒိၣ်,သူ၀ဲကဘီယူၤ ပညိၣ်ဟးတ့ၢ်လီၤ၀ဲမ့ၣ်ပိၢ်လၢလီၢ်က၀ီၤကမျၢၢ်အိၣ်ဆိးလီၢ်ကျဲတပယူၥ်ဃီအဆၢတတဲၥ်ဘၣ်အဃိ ကမျၢၢ်ဃုၥ်ဒီးသီခါ,တပွဲ,ဖိဒံ ဖိသၣ်သ့ၣ်တဖၣ်သံဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်သုးမီၤစရိၤသူကလံၤကျါတၢ်ဒုးအမဲၥ်ညါဆှၢအါထီၣ်၀ဲအသုးဂံၢ်ဘါလၢပျီပူၤအဃိ ဒုးယၤတၢ်ဖ့ၣ်စၢကဲထီၣ်၀ဲဒီး ဟီၣ်က၀ီၤကညီဒီကလုၥ်တၢ်ထူးဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤဒီး ခီဖျိတၢ်ဒုးကဲထီၣ်အဃိ သုးကီၣ်ကးအံၤ ခးလီၤကျိဖးဒိၣ်, သူ၀ဲကဘီယူၤဟးတ့ၢ်လီၤ၀ဲမ့ၣ်ပိၢ်တပယူၥ်ဃီန့ၣ်လီၤ.
လၢတၢ်န့ၣ်အဃိသုးကီၣ်ကးအတၢ်ဘိးဘၣ်ရၤလီၤတၢ်ပတုၥ်တၢ်ခးအံၤအတၢ်ပညိၣ်တအိၣ်လၢတၢ်မုၥ်တၢ်ခုၣ်အဂီၢ်ဘၣ်အသိး ပထၢနုၥ်လၢပခိၣ်နူၥ်ပူၤတသ့စ့ၢ်ကီးဘၣ်အဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်-ကညီတၢ် ကစီၣ်ဒ်အံၤန့ၣ်လီၤ.
“ဘၣ်ထွဲသုးမီၤစိရိၤအတၢ်ဘိးဘၣ်ရၤလီၤဖဲလါအ့ဖြ့ၣ် ၂ သီအခါ တၢ်တခါန့ၣ်ပထၢနုၥ်လီၤပခိၣ်နူၥ်ပူၤတသ့ဘၣ်. မ့ၢ်၀ဲဒၣ်အ၀ဲသ့ၣ် တၢ်အိၣ်သးအဖီခိၣ်အဲၣ်ဒိးရၤလီၤ၀ဲဒီးရၤလီၤ၀ဲလီၤ.တမ့ၢ်အတၢ်ပညိၣ်လၢတၢ်မုၥ်တၢ်ခုၣ်အဂီၢ်ဘၣ်.ဒ်သိးအတၢ်ကရၢကရိဒီးသုးမီၤစိရိၤတဖၣ်အတၢ်အိၣ်သးကဂ့ၤထီၣ်အဂီၢ်ရၤလီၤ၀ဲန့ၣ်ပသ့ၣ်ညါကိးဂၤဒဲးလီၤ.အ၀ဲန့ၣ်အတၢ်ပညိၣ်လၢတၢ်မုၥ်တၢ်ခုၣ်အဂီၢ်တအိၣ်နီတဘျီဘၣ်.ပလဲၤခီဖျိဘၣ်တၢ်အနံၣ်(၇၀)ဘျဲၣ်အတီၢ်ပူၤအံၤကမျၢၢ်မ့ၢ်ဂ့ၤ,တၢ်ပၢၢ်ဆၢဖိတဖၣ်မ့ၢ်ဂ့ၤန့ၣ်တပၥ်၀ဲတဒူၣ်အဆၢဘၣ်.မ့ဘၣ်မၤသံမၤ၀ီ,ဒွဲၣ်အူကမျၢၢ်အဒူသ၀ီန့ၣ်မၤ၀ဲလီၤ.အဃိခဲအံၤပှၤလီၢ်အိၣ်ကမှံအိၣ်၀ဲအါမးဘၣ်ဆၣ်ခီဖျိကိၢ်ကိၢ်လၢၤလၢၤအဃိ မၤလီၤတံၢ်စရီတန့ၢ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်(ခ့ၣ်အဲၣ်ယူၣ်)တၢ်ပၢဟီၣ်က၀ီၤပူၤဒ်သိးသုးမီၤစိရိၤအသုးကလၢၤတဖၣ်ကလီၤမၢ်ကွံၥ်ခဲလၢၥ်အဂီၢ်န့ၣ်အလီၢ်အိၣ်လၢတၢ်ကဘၣ်ဒုးဖျိးကွံၥ်၀ဲ အဖီခိၣ်တၢ်ဒုးကဆူၣ်ထီၣ်အဃိကမျၢၢ်ထံဖိကီၢ်ဖိတဖၣ်တၢ်အရ့ဒိၣ်မ့တအိၣ်ဘၣ်န့ၣ် တဘၣ်ဟးထီၣ် က့ၤလီၤဘၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ဒုးသ့ၣ်ညါဟ့ၣ်ပလီၢ်ကမျၢၢ်ဖဲလါအ့ဖြ့ၣ် ၁၉ သီအနံၤအိၣ်၀ဲန့ၣ်လီၤ.
ဒ်န့ၣ်အသိးတၢ်ပတုၥ်တၢ်ခးဒီတကတီၢ်အပူၤန့ၣ် လီၤဆီဒၣ်တၢ်လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁), တီအူကီၢ်ရ့ၣ်, ချၢၣ်လွံၢ်ထူၣ်ကီၢ်ရ့ၣ်, ဘျံးဒ၀ဲၢ်ကီၢ်ရ့ၣ်,မုၢ်တြီၢ်ကီၢ်ရ့ၣ်ဒီးဒူပျၥ်ယၥ်ကီၢ်ရ့ၣ်ဟီၣ်က၀ီၤအပူၤတဖၣ် တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ခီဖျိကျိဖးဒိၣ်,ကဘီယူၤအံၤအဃိ ကမျၢၢ်ဟံၣ်,ကၠိ,တၢ်ဘူၣ်တၢ်ဘါ တၢ်သူၣ်ထီၣ်တဖၣ်လီၤပှီၢ်ဟးဂီၤ၀ဲအါမးအသိး ပှၤကမျၢၢ်,ဖိဒံဖိ သၣ်ဃုၥ်ဒီးသီခါတပွဲစ့ၢ်ကီး သံတစှၤန့ၢ်အဂၤ(၃၀) ဘၣ် ဒီး ဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် လီၢ်က၀ီၤတၢ်မၤနီၣ်မၤဃါဒီး ခ့ၣ်အဲၣ်ယူၣ် တၢ်မၤနီၣ်စရီပူၤ အသိးသ့ၣ်ညါဘၣ်န့ၣ်လီၤ.
