လါအ့ဖြ့ၣ် ၁၁ သီ, ၂၀၂၅ နံၣ်, ခ့ၣ်အဲးစံၣ်
ပဒိၣ်စီၤကိၣ်လ့လၢအမ့ၢ်၀ဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်ခိၣ်လီၢ်လံၤအံၤ ဖဲလါအ့ဖြ့ၣ် ၇ သီ ဟါခီ ၇း၂၈ မံးနံး အဆၢကတီၢ်န့ၣ် စူၥ်ကွံၥ်သးလၢသးပှၢ်တၢ်ဆါ၀ံၤ ဖဲလါအ့ဖြ့ၣ် ၉ သီအနံၤန့ၣ် တၢ်လဲၤပၥ်လီၤက့ၤအစိၣ်တၢ်ရဲၣ်တၢ်ကျဲၤ၀ံၤ၀ဲ လံန့ၣ်လီၤ.
ကီၢ်ရ့ၣ်ခိၣ်ပဒိၣ်စီၤကိၣ်လ့အံၤခီဖျိမ့ၢ်၀ဲပှၤဘူးဒးဖိတဂၤအဃိ တၢ်လဲၤပၥ်လီၤက့ၤအီၤဒ်လုၢ်လၢ်အိၣ်၀ဲအသိးဒီး လၢတၢ်လဲၤပၥ်လီၤ က့ၤအီၤတၢ်ရဲၣ်တၢ်ကျဲအပူၤအံၤ ခ့ၣ်အဲၣ်ယူၣ် ကီၢ်ရ့ၣ်ပှၤဘၣ်မူဘၣ်ဒါ, ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးခိၣ်သုးနၢ်,သုးဖိ, တၢ်ပၢၢ်ဆၢသိၣ်မှံၤခိၣ်နၢ်,သုးဖိ,လီၢ်က၀ီၤကမျၢၢ်ခိၣ်နၢ်ဃုၥ်ဒီးကမျၢၢ်လဲၤဆှၢအီၤကအိၣ်၀ဲ(၄၀၀)ဃၣ်ဃၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်ရ့ၣ်ခိၣ်လီၢ်လံၤပဒိၣ်စီၤကိၣ်လ့အံၤ စးထီၣ်ဖဲ(၂၀၁၇)တုၤလၢ(၂၀၂၂)န့ၣ် ဟံတ့ၢ်၀ဲမူဒါဒ်ကီၢ်ရ့ၣ်ခိၣ်တဂၤအသိးဒီး ဒ်န့ၣ်အသိး တချုးအ၀ဲဟံမူဒါဒ်ကီၢ်ရ့ၣ်ခိၣ်တဂၤဒံးဘၣ်အခါစ့ၢ်ကီး ဟံတ့ၢ်ဃၥ်မူဒါဒ်ကီၢ်ရ့ၣ်နဲၣ်,နဲၣ်ရွဲၣ်သဃဲၤတဂၤအသိး ယံၤ၀ဲလၢအနံၣ်(၁၀) ဘျဲၣ်ညါအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
တကးဒံးဘၣ် တချုးအနုၥ်လီၤမၤတၢ်လၢကီၢ်ရ့ၣ်ပူၤဒံးဘၣ်အခါန့ၣ်မ့ၢ်တ့ၢ်စ့ၢ်ကီး၀ဲပှၤမၤတၢ်ပၢၢ်ဆၢဖိတဂၤန့ၣ်လီၤ. ဒ်န့ၣ်အသိး စးထီၣ်ဖဲအအိၣ်ဘှံးလၢကီၢ်ရ့ၣ်ခိၣ်မူဒါတၢ်ဖံးတၢ်မၤပူၤတုၤလၢအသးသမူဟးထီၣ်တစုန့ၣ်အ၀ဲမ့ၢ်ဒံး၀ဲကီၢ်ရ့ၣ်ပှၤဟ့ၣ် ကူၣ်ဟ့ၣ်ဖး တၢ်ဖိတဂၤ ဒီးလၢအတၢ်စူၥ်ကွံၥ်သးအံၤအဖီခိၣ်ကဲထီၣ်၀ဲတၢ်လီၤဟိလီၤပျီလၢတၢ်ဖံးတၢ်မၤပူၤ အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ပကီၢ်ရ့ၣ်ခိၣ်လီၢ်လံၤအံၤတဟံမူဒါလၢဒ်ကီၢ်ရ့ၣ်ခိၣ်လၢၤဘၣ်ဆၣ်အ၀ဲမ့ၢ်၀ဲကီၢ်ရ့ၣ်ပှၤဟ့ၣ်ကူၣ်ဟ့ၣ်ဖးတၢ်ဂၤလီၤ.ခဲအံၤခီဖျိအ၀ဲ လဲၤပူၤကွံၥ်သးအဃိတၢ်လီၤဟိလီၤပျီအိၣ်ထီၣ်၀ဲလၢတၢ်ဟ့ၣ်ကူၣ်ဟ့ၣ်ဖးတကပၤန့ၣ်.ပမ့ဘၣ်ကွၢ်လၢတၢ်ပၢၢ်ဆၢအတၢ်လဲၤအဖီဃိၣ်န့ၣ်နါက့အမၤတ့ၢ်တၢ်ပၢၢ်ဆၢအနံၣ်တစှၤဘၣ်.အမ့ၢ်ပှၤတၢ်ပၢၢ်ဆၢတဂၤအသိးလၢခံန့ၣ်ကဲထီၣ်၀ဲကီၢ်ရ့ၣ်နဲၣ်ရွဲၣ်သဃဲၤတဂၤ.ဟံမူဒါလၢကီၢ်ရ့ၣ်နဲၣ်ရွဲၣ်သဃဲၤန့ၣ်န့ၢ်ဖးယံၤညါ.လၢခံကီၢ်ရ့ၣ်နဲၣ်ရွဲၣ်တအိၣ်လၢၤဘၣ်ဘျီအ၀ဲဟံထီၣ်က့ၤမူဒါဒ်ကီၢ်ရ့ၣ်နဲၣ်ရွဲၣ်တဂၤအသိးလီၤ.အဟံမူဒါလၢကီၢ်ရ့ၣ်နဲၣ်ရွဲၣ်န့ၣ်ကအိၣ်လၢအနံၣ်(၁၀)ဘျဲၣ်(၂၀)ညါ.လၢခံမးအကဲထီၣ်က့ၤကီၢ်ရ့ၣ်ခိၣ်.အကဲထီၣ်ကီၢ်ရ့ၣ်ခိၣ်၀ံၤခီဖျိအညါခိၣ်ထီၣ်တဒိးဃုထၢသးလၢတၢ်ဃုထၢဘၣ်အဃိအ၀ဲအိၣ်က့ၤလၢပှၤဒိးန့ၢ်တၢ်ယူးယီၣ်တဂၤအသိးပှၤဟ့ၣ်ကူၣ်ဟ့ၣ်ဖးတၢ်တဂၤအသိးလီၤမီၤနီၤ”အဂ့ၢ်န့ၣ် စံး၀ဲန့ၣ်လီၤ.
ကီၢ်ရ့ၣ်ခိၣ်ပဒိၣ်စီၤကိၣ်လ့စူၥ်ကွံၥ်သးအခါအသးနံၣ်အိၣ်၀ဲ(၇၆)နံၣ် အိၣ်ဆိး၀ဲဒၣ်ဖဲဘံလ့ကီၢ်ဆၣ် ဃီဖိပျဲၢ်ကရူၢ် ဃီဖိပျဲၢ်သ၀ီပူၤ န့ၣ်လီၤ. ဒ်န့ၣ်အသိးဖဲအစူၥ်ကွံၥ်သးအခါန့ၣ် အမါဒီးအဖိမုၣ်ဖိခွါ(၃)ဂၤအိၣ်လီၤတဲၥ်ကွံၥ်၀ဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲ အသိး သ့ၣ်ညါဘၣ်န့ၣ်လီၤ.
