လါအ့ဖြ့ၣ် ၂၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢ,ချၢၣ်လွံၢ်ထူၣ်ကီၢ်ရ့ၣ်,(သုးက့နီၣ်ဂံၢ်-၃)ဆီထံးကီၣ်ဆၣ်ဟီၣ်ကဝီၤအပူၤဖဲလါအ့ဖြ့ၣ် (၂၃)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ထီၣ်မၤန့ၢ်ကွံၥ်ဝဲပယီၤသုး(ကိဆ့ၣ်)သုးကလၢၤလၢအအိၣ် ဖဲပရဲလိၥ်ကျိကၢၢ်နံၤအဂ့ၢ်ဆီထံးကီၢ်ဆၣ်အပှၤဘၣ်မူဘၣ်ဒါပၥ်ဂၢၢ်ပၥ်ကျၢၤစံးဘၣ်ဝဲခ့ၣ်အဲးစံၣ်-ကညီတၢ်ကစီၣ်န့ၣ် လီၤ.
ပယီၤသုးကလၢၤတဖျၢၣ်လၢအမ့ၢ်(ကိဆ့ၣ်)သုးကလၢၤလၢအအိၣ်ဆီလီၤအသးဖဲဆီထံးကီၢ်ဆၣ်(သုးရ့ၣ်-၇)တၢ်ပၢ ဟီၣ်ကဝီၤအပူၤဖဲပရဲလိၥ်ကျိကၢၢ်နံၤကပၤအံၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်မၤန့ၢ်ကွံၥ်ဝဲလံအဂ့ၢ်န့ၣ်ဆီထံးကီၢ်ဆၣ်အပှၤကတိၤတၢ်ပၢပဒိၣ်စီၤအဲၣ်ဖိစံးဝဲဒၣ်န့ၣ်လီၤ.
“ဘၣ်ဃးဒီးပဆီထံးကီၢ်ဆၣ်(သုးရ့ၣ်-၇)ဟီၣ်ကဝီၤအပူၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်()ထီၣ်မၤန့ၢ်ဝဲဒၣ်(ကိဆ့ၣ်) သုးကလၢၤအံၤန့ၣ်တၢ်ပၥ်ဂၢၢ်ပၥ်ကျၢၤအီၤသ့န့ၣ်လီၤ. ဘၣ်ဆၣ်သနါက့တၢ်မၤန့ၢ်အီၤအပတီၢ်အိၣ်ထဲလဲၣ်, တၢ်မၤန့ၢ်အီၤ အက့ၢ်အဂီၤဒ်လဲၣ်န့ၣ်ပတန့ၢ်ဘၣ်တၢ်ပၥ်ဖျါလီၤတံၢ်လီၤဆဲးဒံးဘၣ်အဃိတဲတသ့ဒံးဘၣ်န့ၣ်လီၤ.” အဂ့ၢ်န့ၣ်စံးဘၣ်ခ့ၣ် အဲးစံၣ်-ကညီတၢ်ကစီၣ်န့ၣ်လီၤ.
ဘၣ်ထွဲဒီးတၢ်ထီၣ်မၤန့ၢ်ကွံၥ်ဝဲပယီၤသုး(ကိဆ့ၣ်)သုးကလၢၤအံၤန့ၣ်တၢ်ပၥ်ဂၢၢ်ပၥ်ကျၢၤဝဲန့ၢ်လံဘၣ်ဆၣ်မ့မ့ၢ်လၢပယီၤသုးတကပၤတၢ်သံတၢ်ပှၢ်,တၢ်မၤန့ၢ်တၢ်စုကဝဲၤဒီးတၢ်ဂ့ၢ်တၢ်ကျိၤအဂုၤအဂၤသ့ၣ်တဖၣ်တခီတၢ်မၤလီၤတံၢ်အီၤတန့ၢ်ဒံးဘၣ်အဂ့ၢ်န့ၣ်ချၢၣ်လွံၢ်ထူၣ်ကီၢ်ရ့ၣ်ဒီးကီၢ်ဆၣ်အပှၤဘၣ်မူဘၣ်ဒါသ့ၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါဖဲတၢ်ထီၣ်မၤန့ၢ်ကွံၥ်ဝဲ(ကိဆ့ၣ်)ပယီၤသုးကလၢၤအံၤဝံၤအလီၢ်ခံပယီၤသုးကီၣ်ကးကဘီယူၤဟဲခးလီၤတၢ်,ဟဲတ့ၢ်လီၤမ့ၣ်ပိၢ်အသိးပယီၤသုးအပှၤလၢသုးကလၢၤအဂၤသ့ၣ်တဖၣ်ခးလီၤဝဲကျိဖးဒိၣ်စ့ၢ်ကီးအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါဘၣ်ထွဲစံးဝဲန့ၣ်လီၤ.
ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်,ဆီထံးကီၢ်ဆၣ်ဟီၣ်ကဝီၤအပူၤဖဲတလါအံၤလါအ့ဖြ့ၣ်ထီၣ်ခံနွံတနွံအတီၢ်ပူၤန့ၣ်တၢ်ထီၣ်မၤန့ၢ်ဒံးဝဲပယီၤသုးကလၢၤတဖျၢၣ်လၢအိၣ်သူၣ်ဆီလီၤအသးဖဲပရဲလိၥ်ကျိအမုၢ်ထီၣ်ဟီၣ်ကဝီၤအပူၤလၢအမ့ၢ် (ယၣ်လၥ်ပှၢ်)သုးကလၢၤစ့ၢ်ကီးအဂ့ၢ်န့ၣ်သ့ၣ်ညါဘၣ်လၢကီၢ်ဆၣ်အပှၤဘၣ်မူဘၣ်ဒါအအိၣ်န့ၣ်လီၤ.
