လါမ့ၤ ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ လါအ့ဖြ့ၣ် ၃၀ သီအခါ တၢ်ဒုးအပူၤ ပယီၤသုးသံ(၃၀)ဂၤ အကျါပၣ်ဃုၥ်၀ဲ(ခမရ-၄၃၂) အသုးရ့ၣ်ခိၣ်-၂ အဂ့ၢ်န့ၣ် Mon Liberation Army ထုးထီၣ်ပၥ်ဖျါ၀ဲဖဲလါမ့ၤ ၈ သီ တနံၤအံၤန့ၣ်လီၤ.
ဖဲအပူၤကွံၥ်လါအ့ဖြ့ၣ် ၃၀ သီ ဂီၤခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးကျိၤ လၢအပၣ်ဃုၥ်၀ဲတနီသရံၣ်ကီၢ်ခီ သုး၀ဲၤလီၢ်ခိၣ်သ့ၣ်စုတီၤဖီလၥ်အပှၤ,သုးတြိၤ(၂၂),သုးတြိၤ(၄၄)စုတီၤဖီလၥ် ကၠဲၣ်မယီ ခီၣ်ချ့သုးရ့ၣ်(ခမရ-၂၀၈),မိၣ်တမၣ် ခီၣ်ချ့သုးရ့ၣ်(ခမရ-၁၀၂),ဘိၣ်ပၠ့ ခီၣ်ချ့သုးရ့ၣ်(ခမရ-၄၃၂)သုးရ့ၣ်လၢအနီၣ်ဂံၢ်ကအိၣ်၀ဲ အဂၤ(၅၀)ခိၣ်ဃၢၤဟဲထီၣ်၀ဲဒၣ်ဆူ ကြုၢ်တုတကပၤအဂ့ၢ်န့ၣ် (Mon Liberation Army)စံး၀ဲန့ၣ်လီၤ.
ဖဲအ၀ဲသ့ၣ်ဟဲတုၤ၀ဲဖဲနွါခၠၤကိသ၀ီဃၢၤန့ၣ် တၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်ဒီး ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးပၥ်ဖှိၣ်,မိၣ်တၢ်ထူၣ်ဖျဲးသုးမုၢ်ဒိၣ်(MLA),မိၣ်ကီၢ်သီပၣ်တံၣ်ထုးဖးသး(NMSP-AD),ပၠၤလွါသုးကျိၤ,(Lion Battalion) သုးကျိၤ သ့ၣ်တဖၣ်အံၤ လၢနွါခၠၤကိသ၀ီဃၢၤ တၢ်ဆၢကတီၢ်ယံၤလၢအနၣ်(၁၀)ဃၣ်ဃၣ်ညါအဂ့ၢ်န့ၣ် လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
လၢတၢ်န့ၣ်အဃိတၢ်ဒုးကဲထီၣ်လၢခံခီခံကပၤအဘၢၣ်စၢၤဘျီ၀ဲအံၤ ခီၣ်ချ့သုးရ့ၣ်(ခမရ-၄၃၂) အသုးရ့ၣ်ခိၣ်-၂ သုးခိၣ်ဒိၣ်ဖိ စိမ့ထဲၣ်, သုးစကီၤပတီၢ်ဃုၥ်ဒီးသုးဖိသံပၥ်ဖှိၣ်ခဲလၢၥ်အိၣ်၀ဲ(၃၀)ဂၤဃၣ်ဃၣ်ဒီး တကးဒံးဘၣ်ခီဖျိအ၀ဲသ့ၣ်သံအါအါဂီၢ်ဂီၢ်အဃိ ဂုၤကဒါ လီၢ်က့ၤလီၢ်ခံန့ၣ်လီၤ.
ဒ်န့ၣ်အသိးတုၤလၢခဲအံၤဒုးယၤတၢ်ဖ့ၣ်စၢဆဲးကဲထီၣ်ဒံး၀ဲအဃိ ကမျၢၢ်ထံဖိကီၢ်ဖိတဖၣ်ကအိၣ်ဆိးဘၣ်လၢတၢ်ဘံၣ်တၢ်ဘၢ အလီၢ်လၢအဒီသဒၢကျိဖးဒိၣ်,ကဘီယူၤန့ၢ်အလီၢ်သ့ၣ်တဖၣ်အဂ့ၢ်န့ၣ် Mon Liberation Army ဟ့ၣ်ပလီၢ်စ့ၢ်ကီး၀ဲဒၣ်န့ၣ်လီၤ.
ကြုၢ်တု-ကီးတရံးကီၢ်ဆၣ် ၂ ဘ့ၣ်အံၤအပူၤ စးထီၣ်ဖဲလါအ့ဖြ့ၣ်ထီၣ် ၁၄ သီအခါန့ၣ် တၢ်ဒုးကဲထီၣ်၀ဲလၢဟီၣ်က၀ီၤတၢ်ပၢၢ်ဆၢ သုးပၥ်ဖှိၣ်ကရူၢ်ဒီးပယီၤသုးအဘၢၣ်စၢၤဒိၣ်ဒိၣ်မုၢ်မုၢ်န့ၣ်လီၤ.တကးဒံးဘၣ်လၢခံခီခံကပၤတၢ်ဒုးဒီတကတီၢ်အပူၤန့ၣ်စ့ၢ်ကီး ပယီၤသုး ခးလီၤကျိဖးဒိၣ်အဃိကမျၢၢ်သံဘၣ်ဒိဘၣ်ထံးအါမးအမဲၥ်ညါလီၢ်က၀ီၤကမျၢၢ်ပှၤနီၣ်ဂံၢ်(၅၀၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲတုၤလၢ ခဲအံၤန့ၣ်လီၤ.
