တၢ်ထီၣ်န့ၢ်ကဒီးမကွံၢ်လူၢ်ပယီၤသုးကလၢၤ ကျိချံပှၥ်သၣ်အမဲၥ်ညါပယီၤသုးသံ(၂)ဂၤ,အဂၤတဖၣ်ဃ့ၢ်ဖျိးထီၣ်ခဲလၢၥ်

လါမ့ၤ ၁၆ သီ, ၂၀၂၅ နံၣ်, ခ့ၣ်အဲးစံၣ်

မကွံၢ်လူၢ်ပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးသူမှဲကျိ၀ၢ်ခီ ခ့ၣ်အဲၣ်ယူၣ်-ကညီဒီကလုၥ် စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇) တၢ်ကြဲၢ်ကီၢ်ဆၣ်အပူၤအံၤ ဖဲတနံၤအံၤဂီၤခီဂီၤဂီၤအဆၢကတီၢ်န့ၣ်တၢ်ထီၣ်မၤန့ၢ်၀ဲလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဖဲတနံၤအံၤလါမ့ၤ ၁၆ သီ ဂီၤခီ ၅း၀၀ ဘျဲၣ်အဆၢကတီၢ်န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် ထီၣ်န့ၢ်ကဒီးမကွံၢ်လူၢ်ပယီၤသုးကလၢၤအံၤဒီး တၢ်ထီၣ်သုးကလၢၤဘျီ၀ဲအံၤတၢ်မၤန့ၢ်၀ဲကျိချံပှၥ်သၣ်အမဲၥ်ညါ ပယီၤသုးသံ(၂)ဂၤဒီး လၢအအိၣ်တ့ၢ်အဂၤတဖၣ်ဃ့ၢ်ဖျိးထီၣ်ကွံၥ်၀ဲခဲလၢၥ်အဂ့ၢ်န့ၣ် (KNLA)ပှၤဘၣ်မူဘၣ်ဒါတဂၤ စံး၀ဲန့ၣ်လီၤ.

ဘၣ်ဃးတၢ်ဂ့ၢ်အံၤ(KNLA)သုးခိၣ်လၢပၣ်ဃုၥ်တၢ်ထီၣ်သုးကလၢၤဘျီ၀ဲအံၤအပူၤတဂၤစံး၀ဲလၢ“န့ၢ်ကဒီးပယီၤသုးကလၢၤတဖျၢၣ် လံ.ကဘၣ်ဖဲတဂီၤအံၤ ၅ နၣ်ရံၣ်ဘျဲၣ်န့ၣ်ပမၤန့ၢ်ခဲလၢၥ်လီၤ.ကျိချံပှၥ်သၣ်ဒုပမၤန့ၢ်ဖးအါညါ.(၈၁ မမ)အသၣ်မ့ၢ်ဂ့ၤ, အမိၢ်ပှၢ်မ့ၢ်ဂ့ၤ, ပမၤန့ၢ်ခဲလၢၥ်လီၤ.ဘၣ်ဆၣ်မ့မ့ၢ်လၢကျိဖိဒုအကစၢ်စံၣ်၀ံ၀ဲခဲလၢၥ်လီၤအဃိပတန့ၢ်နီမံၤဘၣ်.အ၀ဲသ့ၣ်န့ၣ်သံ(၂)ဂၤ. အဘၣ်ဒိ(၁)ဂၤ, ပဖီၣ်တချုးနီတဂၤဘၣ်,ပှၤဘၣ်ဒိတဂၤအံၤဒီးအဂၤတဖၣ်န့ၣ်စံၣ်ထီၣ်ခဲလၢၥ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် ဖဲတဂီၤအံၤ န့ၣ်လီၤ.

တကးဒံးဘၣ်သုးကလၢၤအံၤတၢ်စးထီၣ်လဲၤခးအီၤဖဲလါမ့ၤ ၁၄ သီ ဟါခီအဆၢကတီၢ်ဒီး ဘၣ်ဆၣ်တချုးတၢ်လဲၤထီၣ်ခးသုးကလၢၤ အံၤ ဘၣ်အခါပှၤဟ့ၣ်အ၀ဲသ့ၣ်တၢ်ဆၢကတီၢ်လၢကပၥ်လီၤစုက၀ဲၤအဂ့ၢ်န့ၣ် သုးပှၤဘၣ်မူဘၣ်ဒါတဂၤဃီ၀ဲန့ၣ် စံး၀ဲအါထီၣ်၀ဲ န့ၣ်လီၤ.

“ပစးထီၣ်ခးသုးကလၢၤတဖျၢၣ်အံၤစးထီၣ်လၢမဟါ,လၢအတဟါကဘၣ်ဖဲဟါခီ ၆ နၣ်ရံၣ်, ၇ နၣ်ရံၣ်ဖဲန့ၣ်လီၤ.ပခးအီၤ တၢ်ဆၢကတီၢ်တံၥ်တၥ်တသီလီၤ.ဖဲန့ၣ်သုးကလၢၤအံၤအခိၣ်န့ၣ်ကိးယၤဖိ,ယသံကွၢ်အီၤတၢ်လိၣ်အိၣ်တမံၤမံၤဧါ,အက့ၤတဲယၤတအိၣ်ဘၣ်အဲၣ်ဒိးတဲသကိးတၢ်.ယတဲအီၤနကပၥ်လီၤစုက၀ဲၤမ့တမ့ၢ်နကယူၥ်ထီၣ်နီၣ်တယၢ်၀ါဧါမ့တမ့ၢ်နကခီၣ်ဒုးယၤဧါ.တဲယၤလၢ သါကတဲသကိးဒီးပှၤလၢသါစုတီၤဖီလၥ်သုးဖိတဖၣ်၀ံၤမးသါကက့ၤစံးဆၢယၤ.တစံးဆၢယၤဒံးဘၣ်မုၢ်နၤခီဃ့ၢ်ထီၣ်ခဲလၢၥ်”အဂ့ၢ်န့ၣ် စံး၀ဲန့ၣ်လီၤ.

မ့ကွံၢ်လူၢ်ပယီၤသုးကလၢၤလၢတၢ်ထီၣ်န့ၢ်၀ဲခဲအံၤန့ၣ်လၢသုးကလၢၤအပူၤတၢ်တယးကွၢ်၀ဲအသုးဂံၢ်ဘါကအိၣ်အဂၤ(၅၀)ခိၣ်ဃၢၤဒီးဒ်န့ၣ်အသိးသုးကလၢၤ၀ဲအံၤအိၣ်ဘူး၀ဲဒီးလ့ပနၢ်ဒ့ၣ်(ကိး)တခိးဘံၣ်ကွံသုးကလၢၤလၢတၢ်ထီၣ်န့ၢ်၀ဲဖဲအပူၤကွံၥ်စှၤသီလါမ့ၤ ၉ သီ အခါ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.

သုးက့(၇)ဟီၣ်က၀ီၤအပူၤ စးထီၣ်ဖဲတလါအံၤလါမ့ၤ ၉ သီ လ့ပနၢ်ဒ့ၣ်(ကိး)တခိးဘံၣ်ကွံသုးကလၢၤ, လါမ့ၤ ၁၄ သီ တညၣ်ကၠိ သုးကလၢၤဒီး ဖဲတနံၤအံၤမကွံၢ်လူၢ်ပယီၤသုးကလၢၤမ့ပၥ်ဖှိၣ်ခဲလၢၥ်လၢတနွံအတီၢ်ပူၤ တၢ်ထီၣ်န့ၢ်သုးကလၢၤပၥ်ဖှိၣ်(၃)ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.

ဒ်န့ၣ်အသိးတကီၢ်ခါခဲအံၤမီၤဖိက့ၣ်ပယီၤသုကလၢၤလၢအိၣ်ဆီလီၤသးတဘူးတယံၤဒီးတညၣ်ကၠိသုးကလၢၤလၢတၢ်ထီၣ်န့ၢ်၀ဲဖဲ လါမ့ၤ ၁၄ သီအံၤ တညၣ်ကၠိသုးကလၢၤလီၤ၀ံၤတဘျီဃီတၢ်စးထီၣ်လဲၤထီၣ်ခးကဒီး၀ဲမီၤဖိက့ၣ်သုးကလၢၤတုၤလၢခဲအံၤ တၢ်ဒုးကဲထီၣ်အဖၢမုၢ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.