လါမ့ၤ ၂၈ သီ, ၂၀၂၅ နံၣ်, ခ့ၣ်အဲးစံၣ်
မဲးပြ့ခံပယီၤသုးကလၢၤလၢအပူၤကွံၥ်ဟီၣ်က၀ီၤ(သုးက့ ၁) ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်န့ၢ်၀ဲအံၤ လၢကထီၣ်မၤန့ၢ်က့ၤ၀ဲအဂီၢ်ပယီၤသုးမၤအါထီၣ်အသုးဂံၢ် ဘါလၢဘံလ့ဒီးနးကၠံတကပၤအါအါဂီၢ်ဂီၢ်အဂ့ၢ်န့ၣ် သုးက့ပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ.
မဲးပြ့ခံပယီၤသုးကလၢၤအံၤဖဲတနံၣ်အံၤလါဖ့ၤဘြူၤအါရံၤ ၁ သီအနံၤန့ၣ် ဟီၣ်က၀ီၤ(KNLA)သုးပၥ်ဖှိၣ်ထီၣ်မၤန့ၢ်၀ဲဒီး တကီၢ်ခါ ခဲအံၤ ပယီၤသုးအံၤလၢကဟဲက့ၤထီၣ်ဟဲန့ၢ်က့ၤသုးကလၢၤအံၤအဂီၢ် ဖဲအပူၤကွံၥ်(၂)နွံဃၣ်ဃၣ်အခါန့ၣ် လၢနးကၠံဒီးဘံလ့တကပၤ န့ၣ် အ၀ဲသ့ၣ်မၤအါထီၣ်အသုးနီၣ်ဂံၢ်(၄၀၀)ဃၣ်ဃၣ်အဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲန့ၣ်လီၤ.
“ပယီၤန့ၣ်အတၢ်ပညိၣ်အိၣ်လၢကဟဲက့ၤဆ့ၣ်နီၤအိၣ်ကဒါက့ၤမဲးပြ့ခံသုးကလၢၤ.ဖဲဘံလ့ဒီးနးကၠံန့ၣ်ပၥ်ဖှိၣ်ထီၣ်သးအနီၣ်ဂံၢ်ကအိၣ်လၢ(၃၀၀),(၄၀၀)ခိၣ်ဃၢၤညါ.အဟဲဂုၤထီၣ်သးတဘျီတစဲးတဘျီတစဲး.အ၀ဲသ့ၣ်ဟဲထီၣ်ကတုၤအဂီၢ်ဒုပပှၤစ့ၢ်ကီးအိၣ်ခိးလီၤဃၥ်၀ဲလံ.ဟဲထီၣ်နါက့လၢပ၀ဲဒၣ်တၢ်မၤအိၣ်အသိးန့ၣ် ပကဆဲးမၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးတကီၢ်ခါခဲအံၤလၢလ့က့ၣ်ဒီးတးပီသုးကလၢၤတကပၤစ့ၢ်ကီး ပယီၤသုးအံၤလၢကဟဲမၤအါထီၣ်အသုးဂံၢ်ဘါအဂီၢ် သုးနီၣ်ဂံၢ်အဂၤ(၁၀၀)ဘျဲၣ်ဂုၥ်ကျဲးစၢးဟဲထီၣ်၀ဲဒီး ခဲအံၤအ၀ဲသ့ၣ်ဟဲထီၣ်တုၤလၢ(DKBA)ဘိၤဘံၣ်ဟီၣ်က၀ီၤ ကၠီတလူၢ်သ၀ီ တကပၤအဂ့ၢ်န့ၣ် သုးက့ခိၣ် စံးအါထီၣ်၀ဲန့ၣ်လီၤ.
အ၀ဲစံး၀ဲလၢ“လၢ(၀ါဘိတီ)တကပၤန့ၣ်ပယီၤသုးဟဲထီၣ်စ့ၢ်.ကဟဲထီၣ်လၢတးပီ,လ့က့ၣ်သုးကလၢၤတကပၤ.ပနၢ်ဟူလၢ အ၀ဲသ့ၣ် ဟဲထီၣ်န့ၣ်အသုးဂံၢ်ဘါကအိၣ်အဂၤ(၂၀၀).ပယီၤသုးလၢအိၣ်လ့က့ၣ်,တးပီးသုးကလၢၤတဖၣ်အံၤစးထီၣ်လၢသုးဟံန့ၢ် တၢ်စိတၢ် ကမီၤ၀ံၤန့ၣ်ပှၤတဆီတလဲအလီၢ်ဘၣ်န့ၣ်ကအိၣ်လၢ(၄)နံၣ်ဃၣ်ဃၣ်လံ.အကဟဲထီၣ်ခဲအံၤမ့ၢ်အကဟဲဆီတလဲအပှၤဧါ,မ့တမ့ၢ်ကဟဲဆီတလဲသုးရ့ၣ်ခိၣ်ဧါ,ကဟဲပၥ်လီၤဒုးယၤခိၣ်ဧါဒုတသ့ၣ်ညါဘၣ်ဒံးဘၣ်.ခဲအံၤသုးကလၢၤ၀ဲန့ၣ်ဒုးယၤခိၣ်တအိၣ်ဘၣ်.ပနၢ်ဟူတၢ်ကစီၣ်လၢအ၀ဲသ့ၣ်ဟဲထီၣ်န့ၣ်ပၣ်ဒီးဒုးယၤခိၣ်တဂၤ.မ့၀ံၤလၢမဲးပြ့ခံနါက့အ၀ဲသ့ၣ်တၢ်ပညိၣ်အိၣ်လၢကဟဲထီၣ်၀ဲစ့ၢ်အဃိ အိၣ်ခိးကွၢ်တၢ်အိၣ်သးတစဲး”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်ဖဲအပူၤကွံၥ်လါမ့ၤ ၂၅ သီအနံၤန့ၣ်စ့ၢ်ကီး ပယီၤသုးလၢအိၣ်ပနွဲၢ်ကျါသုးကလၢၤအံၤတဖၣ်လၢကက့ၤအိၣ်စိၢ်အသကိး လၢ(၀ါဘိတီ)အံၤအဂီၢ် ဖဲက့ၤလၢကျဲအခါခီဖျိဟီၣ်က၀ီၤ(KNLA)အပှၤအိၣ်ခိးခး၀ဲအဃိ ဖဲန့ၣ်သံ(၃)ဂၤကဲထီၣ်ဒံး၀ဲအဂ့ၢ်န့ၣ် လီၢ်က၀ီၤပှၤ ဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါမ့ၤ ၂၆ သီ ဂီၤခီအဆၢကတီၢ်န့ၣ် တၢ်လဲၤမၤပိၢ်ဖးထီၣ်၀ဲနးကၠံ-ဘံလ့ကျဲဘၢၣ်စၢၤတိၤတဘိဒံးဒီး တိၤလၢတၢ်မၤဟးဂီၤ၀ဲအံၤစ့ၢ်ကီးပယီၤသုးသူ၀ဲလၢသုးဂ့ၢ်၀ီ၀ံစိၥ်တီဆှၢအဂီၢ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
တကီၢ်ခါခဲအံၤပယီၤသုးလၢအဟဲထီၣ်ဆူမဲးပြ့ခံသုးကလၢၤဒီးတးပီ,လ့ၣ်က့ၣ်သုးကလၢၤတဖၣ် တုၤလၢခဲအံၤဟဲထီၣ်၀ဲတဖျိ ဒံး၀ဲဘၣ်ဒီး တၢ်ဖ့ၣ်စၢအိၣ်ဒံး၀ဲလၢ ခံခီခံကပၤအဘၢၣ်စၢၤအဂ့ၢ်န့ၣ် သ့ၣ်ညါဘၣ်လၢပှၤဘၣ်မူ ဘၣ်ဒါအအိၣ်န့ၣ်လီၤ.
(သုးက့ ၁)ဟီၣ်က၀ီၤအပူၤစးထီၣ်ဖဲတၢ်ထီၣ်န့ၢ်မဲးပြ့ခံပယီၤသုးကလၢၤ၀ံၤလီၢ်ခံတုၤလၢခဲအံၤန့ၣ် ဒုးယၤတၢ်ဖ့ၣ်စၢက့ၤဆူၣ်ထီၣ် ကဒါ၀ဲ လၢခံခီခံကပၤအဘၢၣ်စၢၤဒီး ဟီၣ်က၀ီၤပူၤတၢ်ဒုးကဲထီၣ်အိၣ်ဂ့ၤတအိၣ်ဂ့ၤပယီၤသုးအံၤခးလီၤ၀ဲကျိဖးဒိၣ် အမဲၥ်ညါလဲၤခး လီၤတၢ်ဒီးကဘီယူၤအဃိကမျၢၢ်သံဘၣ်ဒိဘၣ်ထံး,ကၠိ,သီခါဖၠၣ်,တၢ်ဆါဟံၣ်ကမျၢၢ်တၢ်သူၣ်ထီၣ်တဖၣ်ဟးဂီၤ၀ဲအါမးအသိးလီၢ်က၀ီၤကမျၢၢ်စ့ၢ်ကီး ဘၣ်ဃ့ၢ်ထီၣ်၀ဲအါမးန့ၣ်လီၤ.
