လါမ့ၤ ၇ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ပယီၤပူၤလၢတၢ်ကဆဲးတိစၢၤမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် ဖဲမဟါလါမ့ၤ ၆ သီအနံၤန့ၣ် သုးကီၣ်ကး ဘိးဘၣ်ရၤလီၤလၢကမၤအါထီၣ်ကဒီးတၢ်ပတုၥ်တၢ်ခးမုၢ်နံၤမုၢ်သီတၢ်ဆၢကတီၢ်တုၤလၢလါမ့ၤလၢၥ် ၃၁ သီအံၤ န့ၣ်လီၤ.
တၢ်ပတုၥ်တၢ်ခးလၢသုးကီၣ်ကးမၤအါထီၣ်၀ဲဘျီ၀ဲအံၤန့ၣ် စးထီၣ်ဖဲမဟါလါမ့ၤ ၆ သီ တုၤလၢ ၃၁ သီ လၢ(၂၆)သီ အတီၢ်ပူၤန့ၣ် လီၤ.
အဃိဆၢကတီၢ်ဖဲတၢ်ပတုၥ်တၢ်ခးအတီၢ်ပူၤ တၢ်ပၢၢ်ဆၢသုးကရူၢ်တဖၣ်တဘၣ်မၤ၀ဲတၢ်ထီၣ်ဒုးဘၣ်အမဲၥ်ညါတဘၣ်အိၣ် ကတီၤထုးဖှိၣ် မၤအါထီၣ်သုးဂံၢ်ဘါဒီးတၢ်မ့တလူၤပိၥ်မၤထွဲ၀ဲဘၣ်န့ၣ်ကက့ၤခီၣ်ဆၢကဒါ၀ဲအဂ့ၢ်န့ၣ် သုးကီၣ်ကးစံး၀ဲန့ၣ်လီၤ.
သုးကီၣ်ကးအံၤလၢတၢ်ကတိစၢၤမၤစၢၤပှၤဟီၣ်ခိၣ်ဟူးပှၤဘၣ်ကီဘၣ်ခဲဖိအံၤအဂီၢ် အဆိကတၢၢ် စးထီၣ်ဖဲအပူၤကွံၥ်လါအ့ဖြ့ၣ် ၂ သီတုၤ ၂၂ သီ တဘျီ, ၂၃ သီတုၤလါလၢၥ် ၃၀ သီ တဘျီ ဒီးမၤကဒီးဖဲမဟါလါမ့ၤ ၆ သီတုၤလါလၢၥ်အံၤ မၤအါထီၣ်တၢ်ပတုၥ် တၢ်ခး မုၢ်နံၤအိၣ်၀ဲ(၃)ဘျီလံန့ၣ်လီၤ.
ဘၣ်ဆၣ်သုးကီၣ်ကးအံၤစးထီၣ်လၢလါအ့ဖြ့ၣ် ၂ သီ တၢ်ပတုၥ်တၢ်ခးခံဘျီလၢၥ်ဒီတကတီၢ်အပူၤန့ၣ် မၤ၀ဲဒုးယၤတၢ်ဟူးတၢ်ဂဲၤ လၢပျီပူၤ,ခးလီၤ၀ဲကျိဖးဒိၣ်,သူ၀ဲဒြိဒီးကဘီယူၤဟးတ့ၢ်လီၤ၀ဲမ့ၣ်ပိၢ်လၢကလုၥ်ဒူၣ်ဖီၣ်စုက၀ဲၤကရူၢ်ကရၢတၢ်ပၢဟီၣ်က၀ီၤပူၤ, ကမျၢၢ်အိၣ်ဆိးလီၢ်ကျဲဒူသ၀ီပူၤအိၣ်၀ဲကိးမုၢ်နံၤဒဲးဃၣ်ဃၣ်န့ၣ်လီၤ.
လၢတၢ်န့ၣ်အဖီခိၣ်ခီဖျိကျိဖးဒိၣ်ဒီးဒြိ,ကဘီယူၤအံၤအဃိ တၢ်ပၢၢ်ဆၢသုးကရူၢ်ကရၢအပှၤဃုၥ်ဒီးကမျၢၢ်ထံဖိကီၢ်ဖိသံဘၣ်ဒိဘၣ်ထံး အိၣ်၀ဲအါမးအသိး ကၠိ,သီခါဖၠၣ်,တၢ်ဘါယွၤသရိၥ်,ကမျၢၢ်ဟံၣ်တၢ်သူၣ်ထီၣ်တဖၣ်လီၤပှီၢ်ဟးဂီၤ၀ဲဒၣ်အါမးဒီး ကမျၢၢ်စ့ၢ်ကီး ဘၣ်ဃ့ၢ်မှံဟးဖျိးအိၣ်၀ဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
တကးဒံးဘၣ်ဖဲမဟါလါမ့ၤ ၆ သီအနံၤ သုးကီၣ်ကးဘိးဘၣ်ရၤလီၤလၢကမၤအါထီၣ်တၢ်ပတုၥ်တၢ်ခးမုၢ်နံၤမုၢ်သီဘၣ်ဆၣ် တနံၤဃီလၢခ့ၣ်အဲၣ်ယူၣ်(သုးက့ ၁)ကၠဲးထိၣ်ကီၢ်ဆၣ်အပူၤ အကဘီယူၤလဲၤတ့ၢ်လီၤမ့ၣ်ပိၢ်ဒီးသုးကလၢၤစ့ၢ်ကီး ခးစိလီၤ ကျိဖးဒိၣ်လၢ ဒူသ၀ီတဖၣ်အပူၤန့ၣ်လီၤ.
ဒ်န့ၣ်အသိးဖဲတနံၤအံၤလါမ့ၤ ၇ သီဂီၤခီအဆၢကတီၢ်န့ၣ်စ့ၢ်ကီး လၢစကဲကီၢ်ခီ ကီလ့(ကောလင်း)ကီၢ်ဆၣ် ဒီး ခၠီကီၢ်စဲၣ် မ့တၣ်(မင်းတပ်)ကီၢ်ဆၣ်အပူၤန့ၣ် ပယီၤသုးကဘီယူၤလဲၤတ့ၢ်လီၤမ့ၣ်ပိၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါဆၢကတီၢ်ဖဲသုးကီၣ်ကးမၤတၢ်ပတုၥ်တၢ်ခးအပူၤတုၤလၢခဲအံၤန့ၣ် လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်က၀ီၤတဖၣ်အပူၤ သုးကီၣ်ကးအံၤဆှၢအါထီၣ်အသုးဂံၢ်ဘါ,တၢ်အီၣ်တၢ်အီအမဲၥ်ညါမၤ၀ဲဒၣ်တၢ်ဒုးလၢကလံၤကျါ အိၣ်၀ဲတပယူၥ်ဃီအသိးခံခီခံကပၤအဘၢၣ်စၢၤစ့ၢ်ကီးဒုးယၤတၢ်ဖ့ၣ်စၢကဲထီၣ်အိၣ်၀ဲတလီၢ်လီၢ်တုၤလၢခဲအံၤန့ၣ်လီၤ.
