လါယူၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, မုၢ်တြီၢ်ကီၢ်ရ့ၣ် သုးက့-၅, ဒွဲၣ်လိၣ်ကီၢ်ဆၣ်ဟီၣ်ကဝီၤအပူၤ ပယီၤသုးကီၣ် ကးအသုးကလၢၤတဖျၢၣ်လၢအမ့ၢ်(ကတၢတံး)သုးကလၢၤအပူၤအံၤပယီၤသုးဟဲက့ၤထီၣ်အိၣ်က့ၤဝဲဃုၥ်ဒီးအပှၤနီၣ်ဂံၢ်(၁၀၀)ဃၣ်ဃၣ်ဖဲစှၤသီအတီၢ်ပူၤအံၤအဂ့ၢ်န့ၣ်(သုးက့-၅)အသုးက့ခိၣ်စံးဝဲအသိးသ့ၣ်ညါဘၣ်န့ၣ်လီၤ.
ဖဲတလါအံၤလါယူၤ(၉)သီအနံၤန့ၣ်ပယီၤသုးဟဲက့ၤထီၣ်အိၣ်က့ၤဝဲလၢ(ကတၢတံး)သုးကလၢၤအပူၤအံၤမ့ၢ်ဝဲပယီၤသုးခီၣ်ချ့သုးရ့ၣ်(ခမရ-၄၀၄)သုးရ့ၣ်ဒီးပှၤသ့ၣ်တဖၣ်အံၤလၢ(BGF)တၢ်ဆီၣ်ထွဲမၤစၢၤတဆီအပှၤနီၣ်ဂံၢ်ခဲလၢၥ်ဟဲက့ၤထီၣ် အိၣ်(၁၀၀)အခိၣ်အဃၢၤဃၣ်ဃၣ်အဂ့ၢ်(သုးက့-၅)အသုးက့ခိၣ်သုးခိၣ်ကျၢၢ်ဖိ(စီၤဂံၢ်နွံ)စံးဝဲဒ်အံၤန့ၣ်လီၤ.
“ဖဲအပူၤကွံၥ်တယံၥ်ဒံးဘၣ်ဖဲ(၉)သီအနံၤန့ၣ်မီၤနီၤ. ပယီၤသုးလၢဟဲထီၣ်ဝဲန့ၣ်သုးရ့ၣ်(ခမရ-၄၀၄)လီၤ. အဝဲသ့ၣ်ဂံၢ်ဘါ န့ၣ်ပှၤနီၣ်ဂံၢ်အဂၤ(၁၀၀)အခိၣ်အဃၢၤအိၣ်ဝဲလီၤ. အဝဲသ့ၣ်န့ၣ်(BGF)ဆီၣ်ထွဲဒီးကဲန့ၢ်ဝဲပှၤဒုးကျဲအိၣ်ဝဲလီၤ.” အဂ့ၢ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
(ကတၢတံး)ပယီၤသုးကလၢၤအံၤအပူၤကွံၥ်လါယနူၤအါရံၤ(၂၃)သီအနံၤန့ၣ်(KNLA)ဃုၥ်ဒီးတၢ်ပၢၢ်ဆၢသုးကရူၢ်ထီၣ်န့ၢ်ဝံၤအလီၢ်ခံပယီၤသုးသ့ၣ်တဖၣ်ထုးဖှိၣ်လီၤအသးလၢသုးခိးကီၢ်ဆၢ(၁၀၁၃)သုးရ့ၣ် အသုးကလၢၤပူၤအဂ့ၢ်သ့ၣ်ညါဘၣ်န့ၣ်လီၤ.
စးထီၣ်လၢလါယနူၤအါရံၤ(ကတၢတံး)သုးကလၢၤလီၤဝံၤအလီၢ်ခံဒီးတုၤလီၤလၢပယီၤသုးဟဲက့ၤထီၣ်အိၣ်က့ၤ(ကတၢတံး)သုးကလၢၤဖဲစှၤသီအံၤန့ၣ်မ့ၢ်ဘၣ်ကွၢ်က့ၤဝဲလၢလွံၢ်လါဘျဲၣ်အတီၢ်ပူၤအံၤလၢတၢ်ကထီၣ်မၤန့ၢ်က့ၤ(ကတၢတံး)သုးကလၢၤအဂီၢ်ပယီၤသုးအံၤဟဲဆှၢဝဲကျိချံပှၥ်သၣ်,တၢ်အီၣ်တၢ်အီဒီးကဘီယူၤအမဲၥ်ညါဟဲခးလီၤတၢ်ဒီးကဘီယူၤအိၣ်ဝဲဒၣ်ခဲအံၤခဲအံၤအဂ့ၢ်သ့ၣ်ညါဘၣ်လၢသုးက့(၅)အပှၤဘၣ်မူဘၣ်ဒါအအိၣ်န့ၣ်လီၤ.
တကီၢ်ခါခဲအံၤန့ၣ်ပယီၤသုးလၢဟဲက့ၤထီၣ်အိၣ်ဆီလီၤအသးဖဲ(ကတၢတံး)သုးကလၢၤအပူၤတကးဒံးဘၣ်ပယီၤသုးအံၤလၢ(ကတၢတံး)သဝီတၢ်ဆါဟံၣ်အပူၤစ့ၢ်ကီးအိၣ်ဆီလီၤအသးအဂ့ၢ်ဂံၢ်ခီၣ်ထံးတၢ်ကစီၣ်စံးဝဲဒၣ်အသိးသ့ၣ်ညါဘၣ်န့ၣ်လီၤ.
