လါယူၤ ၂၇ သီ, ၂၀၂၅ နံၣ်, ခ့ၣ်အဲးစံၣ်
ကသံၣ်မူၤဘှီးလၢအလုၢ်အပှ့ၤလီၤလၢ၀ဲစ့ပယီၤအကကွဲၢ်(၁၀)လၢတၢ်ဖီၣ်န့ၢ်၀ဲဖဲကညီကီၢ်စဲၣ် မၠၣ်၀တံၣ်ဒီး စွ့ၤကိၣ်ကိၤဟီၣ်က၀ီၤ ပူၤတဖၣ် ဖဲမဟါလါယူၤ ၂၆ သီအနံၤ လၢအလီၤဘၣ်၀ဲဟီၣ်ခိၣ်ဒီဘ့ၣ်တၢ်ထီဒါတၢ်မူၤတၢ်ဘှီးမုၢ်နံၤအံၤန့ၣ် ကညီသုးခိးကီၢ်ဆၢ (BGF)ဒွဲၣ်အူအီၣ်မၤဟးဂီၤကွံၥ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
မၠၣ်၀တံၣ်,စွ့ၤကိၣ်ကိၤဟီၣ်က၀ီၤလၢတနံၣ်အတီၢ်ပူၤ ကသံၣ်မူၤဘှီးလၢအမ့ၢ်ညါဖီ,(ICE),ကသံၣ်ကသ့ၣ်,ပံၤသူ,ပံၤ၀ါဃုၥ်ဒီး ကသံၣ် မူၤဘှီးအဂၤလၢ(BGF)ဖီၣ်န့ၢ်၀ဲတဖၣ်အံၤ (BGF)ပှၤဘၣ်မူဘၣ်ဒါတဂၤတီခိၣ်ရိၣ်ဒွဲၣ်အူအီၣ်မၤဟးဂီၤကွံၥ်၀ဲခဲလၢၥ်အဂ့ၢ်န့ၣ် ပှၤလၢဘူးဒီး(BGF)တဖၣ်စံး၀ဲန့ၣ်လီၤ.
ကသံၣ်မူၤဘှီးလၢအမၤဟးဂီၤ၀ဲကညီဖိအတၢ်အိၣ်မူခါဆူညါအဂီၢ်သ့ၣ်တဖၣ်အံၤဒီးပတီၢ်ထီကသံၣ်မူၤဘှီးလၢအဟဲထီၣ်သီ သ့ၣ်တဖၣ်အံၤ တၢ်တဘၣ်သူအီၤဘၣ်ဒီးဒ်န့ၣ်အသိးမိၢ်ပၢ်တဖၣ်စ့ၢ်ကီးကတြီအဒံၣ်အဖိ,ကတြီ၀ဲသူၣ်ဘီၣ်သးစၢ်တဖၣ်အဂ့ၢ်န့ၣ် (BGF)ပှၤဘၣ်မူဘၣ်ဒါလၢအပၣ်ဃုၥ်လၢတၢ်တီခိၣ်ရိၣ်မဲဘျီ၀ဲအံၤတဂၤ စံး၀ဲန့ၣ်လီၤ.
လၢန့ၣ်အမဲၥ်ညါခါလၢကဟဲ စွ့ၣ်ကိၣ်ကိၤဟီၣ်က၀ီၤအပူၤ ကညီသုးခိးကီၢ်ဆၢ(BGF)ကဂုၥ်ကျဲးစၢးဟံထီၣ်ဖီၣ်ထီၣ်ဂ့ၢ်၀ီ မၤပျီဆှဲကွံၥ်တၢ်မၤဆါကသံၣ်မူၤဘှီးဒီးတၢ်ပှ့ၤသူကသံၣ်မူၤဘှီးသ့ၣ်တဖၣ်အံၤတုၤလၢအလီၤမၢ်တအိၣ်လၢၤဘၣ်တစုအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤ.
ကညီကီၢ်စဲၣ်ဟီၣ်က၀ီၤလၢဖီၣ်စုက၀ဲၤကရူၢ်ပၢဆှၢဆီလီၤသးဟူးဂဲၤအိၣ်၀ဲအလီၢ်တဖၣ် ပှၤသူကသံၣ်မူၤဘှီးအိၣ်၀ဲအါမးဒီး ပှၤသူတၢ်ဖိတဖၣ်တၢ်ဖီၣ်ဟံအရ့အိၣ်ဘၣ်ဆၣ် မ့မ့ၢ်ပှၤလၢအရၤလီၤမၤကၤကသံၣ်မူၤဘှီးအကစၢ်တဖၣ်န့ၣ် ခီဖျိအတၢ်ဘၣ်ထွဲ အိၣ်ဒီးဖီၣ်စုက၀ဲၤကရူၢ်ကရၢအဃိတၢ်ဖီၣ်ဟံဂ့ၢ်၀ီတအိၣ်၀ဲဘၣ်အဂ့ၢ်န့ၣ် ဟီၣ်က၀ီၤကမျၢၢ်တဖၣ်ပဲၥ်ထံနီၤဖးစံး၀ဲန့ၣ်လီၤ.
ဖဲအပူၤကွံၥ်လါဖ့ၤဘြူၤအရံၤထီၣ်အခါန့ၣ် တၢ်လိၥ်ကွဲ(Game)ဒီးတၢ်တၤကျိၣ်တၤစ့လီၢ်လၢအိၣ်မၠၣ်၀တံၣ်ခိၣ်ဃၢၤ လၢ (BGF)ဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးပၥ်ဖှိၣ်အိးထီၣ်၀ဲသ့ၣ်တဖၣ်အံၤ ဒ်သိးပှၤသူကသံၣ်မူၤဘှီး သုတအိၣ်တဂ့ၤအဂီၢ်ကရူၢ်ဘၣ်ထွဲပှၤဘၣ်မူဘၣ်ဒါနဲၣ်လီၤတၢ်ကလုၢ်အိၣ်လၢတၢ်ကဘၣ်ပံးကွံၥ်၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါဖ့ၤဘြူၤအါရံၤ ၁၇ သီအနံၤစ့ၢ်ကီး ဘၣ်ဃး(ကၠါဖၠၣ်)တၢ်ဖံးတၢ်မၤဒီးကသံၣ်မူၤဘှီးလၢအိၣ် အ၀ဲသ့ၣ် ဟီၣ်က၀ီၤပူၤအံၤတဖၣ် ကမၤဆှဲကွံၥ်၀ဲခဲလၢၥ်အဂ့ၢ်န့ၣ် (BGF)အခိၣ် သုးခိၣ်ဒိၣ်စိ စီၤခၠ့ၣ်သူၤ စံးလီၤ၀ဲဖဲတၢ်မၤဆှဲလဲတၢ်ကစီၣ်မူး တၢ်ရဲၣ်တၢ်ကျဲၤအခါအိၣ်၀ဲန့ၣ်လီၤ.
