လါယူၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ပယီၤသုးသိလ့ၣ်အခိၣ်(၁၀)ဘျဲၣ်လၢဟဲထီၣ်တဖၣ် တၢ်ခိးအ၀ဲသ့ၣ် လၢ(တိုက်မိုင်း)မ့ၣ်ပိၢ်အဃိ သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါဒီးကမျၢၢ်တဖၣ်စံး၀ဲအသိး သ့ၣ်ညါဘၣ် န့ၣ်လီၤ.
ဖဲမဟါလါယူၤ ၁၂ သီ ဂီၤခီ ၁၀း၀၀ ဘျဲၣ်ဃၣ်ဃၣ်အဆၢကတီၢ် လၢပကိကီၢ်ခီအံၤတဆီ ပယီၤသုးသိလ့ၣ်အခိၣ်(၁၀)ဘျဲၣ် လၢအဟဲထီၣ်တဖၣ်ဖဲအတုၤလၢ (လှည်းလမ်းကူး) ကရူၢ် (ဒေါင်းတောင်)သ၀ီအခါ ဟီၣ်က၀ီၤတၢ်ပၢၢ်ဆၢသုးကရူၢ် ခိးထုး၀ဲဒီး (တိုက်မိုင်း)မ့ၣ်ပိၢ်န့ၣ်လီၤ.
လၢတၢ်ခိးထုးပယီၤသုးသိလ့ၣ်ဘျီ၀ဲအံၤပယီၤသုးသိလ့ၣ်ဟးဂီၤ(၂)ခိၣ်ဒီးတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤဂံၢ်ခီၣ်ထံး ပှၤဟ့ၣ်တၢ်ကစီၣ်ဖိတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ဖဲမဟါန့ၣ်ပယီၤသုးသိလ့ၣ်ဟဲထီၣ်တစှၤဘၣ်ကအိၣ်လၢအခိၣ်(၁၀)ဘျဲၣ်ညါ.သိလ့ၣ်တခိၣ်န့ၣ်သုးနီၣ်ဂံၢ်ကအိၣ်လၢအဂၤ(၂၀)ဘျဲၣ်ညါ.ပယီၤသုးသိလ့ၣ်န့ၣ်ဘၣ်၀ဲဒၣ်(၂)ခိၣ်.ဘၣ်ဆၣ်ဘၣ်တဖးခၢၣ်ဘၣ်.နၢ်ဟူလၢပှၤတဲန့ၣ်အသံ(၂)ဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတၢ်ခိးထုး၀ဲပယီၤသုးသိလ့ၣ်ဘျီ၀ဲအံၤအခါန့ၣ် လီၢ်က၀ီၤကမျၢၢ်ဒီးတၢ်ကစီၣ်တနီၤပၥ်ဖျါ၀ဲလၢ ကမျၢၢ်အသိလ့ၣ် ဟးဂီၤ၀ဲတခိၣ်ဒီးကမျၢၢ် စ့ၢ်ကီးဘၣ်ဒိ(၄)ဂၤအိၣ်၀ဲဒၣ်န့ၣ်လီၤ.
ဘၣ်ဆၣ်ဟံၣ်သိလ့ၣ်လၢအဟးဂီၤတခိၣ်အံၤဟဲထီၣ်၀ဲတပူၤဃီဒီးပယီၤသုးသိလ့ၣ်အဃိ ပၣ်ဃုၥ်၀ဲလီၤဒီး ဒ်န့ၣ်အသိးပှၤလၢ အဘၣ်ဒိဘၣ်ထံးတဖၣ်အံၤစ့ၢ်ကီးတၢ်ဃုသ့ၣ်ညါ၀ဲလၢအမ့ၢ်ပယီၤသုးအဟံၣ်ဖိဃီဖိ လီၤအဂ့ၢ်န့ၣ် ဂံၢ်ခီၣ်ထံး ပှၤဟ့ၣ်တၢ်ကစီၣ်ဖိ တဂၤဃီ၀ဲန့ၣ် စံးအါထီၣ်၀ဲဒ်အံၤန့ၣ်လီၤ.
“ပှၤတဲလၢပှၤဘၣ်ဒိတဖၣ်န့ၣ်မ့ၢ်ပှၤသ၀ီဖိ,အနီၢ်ကီၢ်န့ၣ်တမ့ၢ်ပှၤသ၀ီဖိဘၣ်.ပဟးဃုသ့ၣ်ညါန့ၣ်ကဲ၀ဲဒၣ်ပယီၤသုးအပှၤလီၤ.ကဘၣ်မ့ၢ်အ၀ဲသ့ၣ်ဟးကွၢ်၀ဲပယီၤသုးကါဟးထီၣ်ဟးလီၤ,ဟးကွၢ်န့ၢ်၀ဲကျဲဒ်န့ၣ်လီၤ.မ့မ့ၢ်ပှၤသ၀ီဖိဒုဟးကဘူၣ်၀ဲလဲၣ်”အဂ့ၢ်န့ၣ် စံး၀ဲန့ၣ် လီၤ.
၀့ၢ်တကူၣ်-မီၣ်လမၠဲၣ်ကျဲအံၤ လီၤဆီဒၣ်တၢ်သုးဟံန့ၢ်တၢ်စိတၢ်ကမီၤ၀ံၤလီၢ်ခံညီနုၢ်န့ၣ် ပယီၤသုးအံၤလၢကဆှၢထီၣ်အသုးဂံၢ်ဘါ, ကျိချံပှၥ်သၣ်ဆူ(သုးက့ ၁),(သုးက့ ၆),(သုးက့ ၇)ဟီၣ်က၀ီၤပူၤအံၤအဂီၢ် သူ၀ဲကျဲအံၤတလီၢ်လီၢ်အဖီ ခိၣ် ဒ်သိးကမျၢၢ်တၢ်ဘၣ်ဒိ ဘၣ်ထံးသုတအိၣ်တဂ့ၤအဂီၢ် ခ့ၣ်အဲၣ်ယူၣ်ဟ့ၣ်ပလီၢ်၀ဲလၢတဘၣ်ဟးထီၣ်က့ၤလီၤတပူၤဃီဒီးပယီၤသုးသိလ့ၣ်ဘၣ်အိၣ်၀ဲအဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
(ဒေါင်းတောင်)သ၀ီအံၤအိၣ်၀ဲလၢမိၣ်ပလ့ၤ-ကၠဲၣ်ထိၣ်၀့ၢ်ဘၢၣ်စၢၤ ၀့ၢ်တကူၣ်-မီၣ်လမၠဲၣ်ကျဲမုၢ်ခိၣ်ဒီး ဒ်န့ၣ်အသိးအပူၤကွံၥ် ပယီၤသုးသိလ့ၣ်လၢဟဲထီၣ်လၢကျဲမုၢ်ဒီတကျိၤအံၤတဖၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၃ ဒီး ကမျၢၢ် တၢ်ဒီသဒၢသုးကရူၢ်(PDF)ပၥ်ဖှိၣ်ထီၣ်သးခိးထုး၀ဲဒီးမ့ၣ်ပိၢ်ကဲထီၣ်အိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
