လါယူၤ ၁၆သီ, ၂၀၂၅နံၣ်, ခ့ၣ်အဲးစံၣ်
လၢတၢ်ကဒုးအိၣ်ထီၣ်ဝဲပဒိၣ်တဖုအမိၢ်လံၤမိၢ်ပှၢ်နီၢ်နီၢ်အဂီၢ် တၢ်တၤတၢ်ဒီးတၢ်လိၣ်ဘၣ်သ့ၣ်တဖၣ်န့ၣ်အိၣ်ဝဲဒီဒူၣ်ဘၣ်ဆၣ် လၢတၢ်ကကရၢကရိထီၣ်ဝဲကီၢ်သူလ့ၤပဒိၣ်အဂီၢ်အိၣ်ကတဲၤကတီၤပၥ်သး(၈၀)မျးကယၤလံအဂ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အပှၤကတိၤတၢ်ပၢ ပဒိၣ်စီၤတီနံ စံးဝဲဒၣ်န့ၣ်လီၤ.
တၢ်ကဘိးဘၣ်ရၤလီၤလၢတၢ်ဒုးအိၣ်ထီၣ်ကီၢ်သူလ့ၤပဒိၣ်အဂီၢ် ကတဲၥ်ကတီၤပၥ်သးဝံၤ(၈၀)မျးကယၤအဂ့ၢ်န့ၣ် ပဒိၣ်စီၤတီနံတဲလီၤဝဲ အပူၤကွံၥ်လါယူၤ(၁၄)သီ လၢအလီၤဘၣ်ဝဲ (၇၅)ဝီတဝီ ကီၢ်သူလ့ၤမုၢ်နံၤအခါန့ၣ်လီၤ.တၢ်ပၢတၢ်ြပး တၢ်အိၣ်သူၣ်ထီၣ်ဆီလီၤအဂံၢ်ကဆူၣ်ထီၣ်အဂီၢ် တၢ်အရ့ဒိၣ်ကတၢၢ်န့ၣ်မ့ၢ်ဝဲ ပှၤနီၣ်ဂံၢ်နီၣ်ဒွးလၢအကံၢ်စီလၢပှဲၤဒီးဝဲၤကျိၤပှၤမၤတၢ်ဖိဂံၢ်ဘါသ့ၣ်တဖၣ်အဂ့ၢ် ပဒိၣ်စီၤတီနံစံးဝဲဒၣ်န့ၣ်လီၤ.
အဝဲစံးဝဲလၢ“နဒုးအိၣ်ထီၣ်ပဒိၣ်တဖုဘၣ်ဆၣ်သနၥ်က့ နမၤကလိၥ်ကလၤတသ့ဘၣ်.ပအိၣ်ဒီးတၢ်ကတီၤပၥ်သးမူၤနီၢ်န့ၣ်လီၤ.မ့ၢ်က့ၤထိၣ်သတြီၤလၢအပူၤကွံၥ်န့ၣ် အစှၤကတၢၢ် အမျးကယၤ(၈၀)န့ၣ်ပအိၣ်ကတီၤပၥ်သးဝံၤလံန့ၣ်ပစံးသ့ဝဲဒၣ်န့ၣ်လီၤ. တၢ်ကဘိးဘၣ်ရၤလီၤလၢတၢ်ဒုးအိၣ်ထီၣ်ကီၢ်သူလ့ၤပဒိၣ် အခါဖဲလဲၣ်ဒီးမုၢ်နံၤမုၢ်သီလီၤတံၢ်လီၤဆဲးန့ၣ်ပတဲဘၣ်အီၤကီန့ၣ်လီၤ. ဖဲ ၂၀၂၅နံၣ်အတီၢ်ပူၤအံၤမ့ၢ်ကဲထီၣ်သ့,မ့တမ့ၢ်ခီဃီၤဆူ ၂၀၂၆နံၣ်အပူၤစ့ၢ်ကီးသ့ဝဲဒၣ်န့ၣ်လီၤ. တဲလီၤတံၢ်အီၤသ့တခါန့ၣ် လၢခါဆူညါ တယံၤလၢၤဘၣ်န့ၣ် ပကဒုးအိၣ်ထီၣ်ဝဲကီၢ်သူလ့ၤပဒိၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဒ်န့ၣ်အသိး ခ့ၣ်အဲၣ်ယူၣ်တကပၤ မ့ၢ်တအိၣ်ဒီးတၢ်လၢတၢ်ပှဲၤလၢတၢ်ကတဲၥ်ကတီၤပၥ်သးဘၣ်ဆၣ်သနၥ်က့, တၢတပတီၢ် ဖဲအပူၤကွံၥ် ၂နံၣ်အတီၢ်ပူၤန့ၣ် ပက့ၤကွၢ်,မၤဂ့ၤထီၣ်ကဒါက့ၤ ပကျဲသနူဒီးတၢ်နဲၣ်ကျဲသ့ၣ်တဖၣ်ဒီးအခဲအံၤပစံးလၢအိၣ်ကတဲၥ်ကတီၤပၥ်သးဝံၤလံအဂ့ၢ် ပဒိၣ်စီၤတီနံတဲအါထီၣ်ဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ လၢကန့ၢ်ဘၣ်ကညီကီၢ်အဂီၢ်ဒီး နီၢ်ကစၢ်တၢ်စံၣ်ညီၣ်ပၢလီၤသးအဂီၢ် ကညီသးစၢ်သ့ၣ်တဖၣ် ကဘၣ်အိၣ်ကတဲၥ်ကတီၤပၥ်သးလၢ တၢ်ပၢတၢ်ြပး,တၢ်ကူၣ်ဘၣ်ကူၣ်သ့ ခီဖျိ လၢတၢ်ကသူၣ်ထီၣ်ကညီကီၢ်အဂီၢ်လိၣ်ဘၣ်ဝဲဒၣ် သးစၢ်လၢအကူၣ်ဘၣ်ကူၣ်သ့အဂ့ၢ် ခ့ၣ်အဲၣ်ယူၣ်ကွဲမုၥ်ဝဲဒၣ်စ့ၢ်ကီးန့ၣ်လီၤ.
စးထီၣ်လါယနူၤအါရံၤ,၁၉၄၉ နံၣ်, ဖဆပလပဒိၣ်ဒီး ခ့ၣ်အဲၣ်ယူၣ် စုတီၤဖီလၥ်သုးမုၢ်ဒိၣ်အဘၢၣ်စၢၤတၢ်ဒုးကဲထီၣ်ဝဲ(၁၁၁)သီဝံၤအလီၢ်ခံ ဖဲလါယူၤ (၁၄)သီ,အနံၤန့ၣ် ဘၣ်တၢ်ဒုးအိၣ်ထီၣ်ဝဲကီၢ်သူလ့ၤပဒိၣ်ဖဲ ကီၢ်သူလ့ၤဝ့ၢ်ခိၣ် ဝ့ၢ်တီအူန့ၣ်လီၤ.
မုၢ်နံၤလၢ တၢ်ဘိးဘၣ်ရၤလီၤဝဲလၢတၢ်သူၣ်ထီၣ်ကီၢ်သူလ့ၤ(ကညီကီၢ်)ဒီးကီၢ်သူလ့ၤပဒိၣ် လၢအဖိးသဲစးလၢဟီၣ်ကခိၣ်ဒီဘ့ၣ်အမဲညါဖဲလါယူၤ(၁၄)သီအနံၤန့ၣ်တၢ်ပၥ်ပနီၣ်အီၤလၢအမ့ၢ်ကီၢ်သူလ့ၤအမုၢ်နံၤအဂ့ၢ်သ့ၣ်ညါဘၣ်န့ၣ်လီၤ.
