လါယူၤ ၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ လ့က့ၣ်သုးကလၢၤအမဲၥ်ညါဖဲမဟါဟါခီအဆၢကတီၢ်န့ၣ် ပယီၤသုးဟဲထီၣ်တုၤကဒီးအသီတဒူၣ်လၢတးပီသုးကလၢၤပူၤအဂ့ၢ်န့ၣ် လီၢ်က၀ီၤ(KNDO)ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ် န့ၣ်လီၤ.
ပယီၤသုးအံၤလၢကဆီတလဲသုးအဂီၢ် ဖဲလါယူၤ ၄ သီဟါခီအဆၢကတီၢ်န့ၣ် ပယီၤသုးဂံၢ်ဘါ(၈၀)ဃၣ်ဃၣ်ဟဲတုၤ၀ဲလၢ လ့က့ၣ်သုး ကလၢၤ၀ံၤလီၢ်ခံမုၢ်ဆ့ၣ်ထီၣ်ဖဲမဟါ ၅ သီ ဟါခီအဆၢကတီၢ် ပယီၤသုးလၢအဂၤတဒူၣ်လၢအသုးဂံၢ်ဘါကအိၣ် (၇၀),(၈၀)ခိၣ်ဃၢၤ အံၤဟဲထီၣ်တုၤကဒီး၀ဲလၢတးပီသုးကလၢၤဒ်အခဲအံၤအသိးအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲ န့ၣ်လီၤ.
လ့ၣ်က့ၣ်သုးကလၢၤပူၤသုးသီဟဲဆီတလဲသး၀ံၤမုၢ်ဆ့ၣ်ထီၣ်ဖဲတနံၤအံၤလါယူၤ ၆ သီ ဂီၤခီ ၄း၀၀ နၣ်ရံၣ်ဘျဲၣ်အဆၢကတီၢ်န့ၣ် သုးလီၢ်လံၤလၢအိၣ်သုးကလၢၤပူၤအံၤတဖၣ်ဟးထီၣ်ကွံၥ်၀ဲအဂ့ၢ်န့ၣ် ကညီဒီကလုၥ်ဂၢၤသးကရၢ(KNDO)သုးရ့ၣ်ခိၣ် စီၤမ့ထဲၣ် စံး၀ဲန့ၣ်လီၤ.
“ဖဲမဟါန့ၣ်နုၥ်လီၤလၢလ့ၣ်က့ၣ်တဒူၣ်,အသုးဂံၢ်ဘါကအိၣ်လၢ(၇၀),(၈၀).ခဲအံၤနုၥ်လီၤကဒီးတဒူၣ်လၢတးပီသုးကလၢၤ,အပှၤ နီၣ်ဂံၢ်စ့ၢ်ကီးအိၣ်ထဲန့ၣ်လီၤ.ခဲအံၤပှၤဟဲဆီတလဲအ၀ဲသ့ၣ်လံအဃိဖဲတဂီၤညါအံၤန့ၣ်လ့ၣ်က့ၣ်ပယီၤသုးဖိလီၢ်လံၤတဖၣ်န့ၣ်ဟးထီၣ်က့ၤလူၤလီၤသးလၢတးပီတကပၤ.ခဲအံၤဒုတတုၤဒံးဘၣ်.မ့ၢ်ကလဲၤ၀ၣ်နုၥ်လီၤလၢတးပီသုးကလၢၤဒံးဧါဒုတသ့ၣ်ညါဘၣ်.မ့တနုၥ်လီၤဘၣ်ဒုအိၣ်ဒၣ်ကက့ၤတဘျီဃီဆူ၀့ၢ်ပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုး(၂)ဒူၣ်လၢအဟဲထီၣ်တုၤဖဲလ့က့ၣ်ဒီးတးပီသုးကလၢၤခဲအံၤသ့ၣ်တဖၣ်ဖဲလါမ့ၤ ၂၈ သီအနံၤန့ၣ်လၢပနွဲၢ်ကျါသုးကလၢၤ လါခိသ၀ီကျဲကစၢၢ်အံၤတဆီ ဟဲထီၣ်၀ဲတပူၤဃီလၢခီၣ်အံၤဒီး ဒ်န့ၣ်အသိးလၢကတုၤဆူသုးကလၢၤခံဖျၢၣ်အံၤပူၤအဂီၢ် တၢ်ဆၢကတီၢ်ယံၤ၀ဲလၢအသီ(၁၀)ဘျဲၣ်ဃၣ်ဃၣ်ညါန့ၣ်လီၤ.
တကတီၢ်ဃီဖဲလါမ့ၤ ၃၀ သီအနံၤ ပယီၤသုးတဖၣ်အံၤဖဲအ၀ဲသ့ၣ်ဟဲထီၣ်တုၤလၢလါခိသ၀ီဒီးနိၣ်သလးအီသ၀ီ ကစၢၢ်ကျါပှၢ်ပူၤ အခါန့ၣ် ဖီၣ်၀ဲကးဒီးနံၤသ၀ီဖိ စီၤလါထု(၅၂)နံၣ်၀ံၤ မၤသံကွံၥ်၀ဲလၢကျဲတီၤလိၤဒီးတၢ်က့ၤထံၣ်က့ၤအစိၣ်ဖဲလါယူၤ ၃ သီအနံၤ ကဲထီၣ်ဒံးန့ၣ်လီၤ.
လ့က့ၣ်ဒီးတးပီသုးကလၢၤခံဖျၢၣ်လၢပယီၤသုးဟဲထီၣ်ဆီတလဲအပှၤခဲအံၤန့ၣ်အိၣ်စီၤစုၤလိၥ်အသးတယံၤ၀ဲဘၣ် အိၣ်၀ဲလၢ ကညီဒီကလုၥ်ဂၢၤသးကရၢ(KNDO)သုးရ့ၣ်-၂ တၢ်ပၢဟီၣ်က၀ီၤအပူၤဒီး ဒ်န့ၣ်အသိးပယီၤသုးဟဲထီၣ်တုၤလၢလ့က့ၣ် သုးကလၢၤ၀ံၤ မုၢ်ဆ့ၣ်ထီၣ်ဖဲမဟါအနံၤန့ၣ် တၢ်လဲၤခးစိအ၀ဲသ့ၣ်ကဲထီၣ်၀ဲတဘျီခံဘျီဒံးအဂ့ၢ်န့ၣ် သ့ၣ်ညါဘၣ်လၢ(KNDO) ပှၤဘၣ်မူဘၣ်ဒါအအိၣ်န့ၣ်လီၤ.
ဒ်န့ၣ်အသိးအပူၤကွံၥ်(၂၀၂၂)လါအ့ဖြ့ၣ်အခါစ့ၢ်ကီး လ့က့ၣ်ဒီးတးပီသုးကလၢၤပူၤသုးတဖၣ်ကဟးထီၣ်ကွံၥ်လၢဟီၣ်က၀ီၤပူၤအဂီၢ် (KNDO)သုးရ့ၣ်-၂ ပှၤဘၣ်မူဘၣ်ဒါထုးထီၣ်ဒုးသ့ၣ်ညါဟ့ၣ်ပလီၢ်၀ဲလံၥ်အိၣ်ဘၣ်ဆၣ် ပယီၤသုးအံၤခီဖျိတဟးထီၣ်၀ဲဘၣ်အဃိ တၢ်လဲၤခးစဲးပြဲးအ၀ဲသ့ၣ် ကဲထီၣ်အိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
