လါယူၤ ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ ဖဲအပူၤကွံၥ်စှၤသီအခါ ခီဖျိလၢ ဘူးဒးကညီသုးမုၢ်ဒိၣ်(DKBA)အမ့ၣ်ပိၢ်(တိုက်မိုင်း)အံၤအဃိ နိၣ်ကကွံၢ်ကရူၢ်ပူၤကမျၢၢ်ပိၥ်ခွါဘၣ်ဒိ၀ဲ(၂)ဂၤအဂ့ၢ်န့ၣ် သ့ၣ်ညါဘၣ် လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါယူၤ ၈ သီ ဟါခီ ၇း၀၀ ဃၣ်ဃၣ်အဆၢကတီၢ်န့ၣ် ကမျၢၢ်(၂)ဂၤအံၤအိၣ်လၢမဲၢ်ကရီသ၀ီ ဖဲအ၀ဲသ့ၣ်ဟဲက့ၤဒိးစဲးကၢး က့ၤတုၤဖဲ လၢနိၣ်မကွံၢ်ကရူၢ် ဖၠၢသ၀ီဃၢၤ လ့ခီၣ်ထံးအခါန့ၣ် ဘၣ်၀ဲဒၣ်ဒီး(တဲးမဲ)မ့ၣ်ပိၢ် လၢ(DKBA)ဒိးလီၤဃၥ်၀ဲဒ်အံၤ လီၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
“တၢ်ဂ့ၢ်ကဲထီၣ်အဂ့ၢ်အကျိၤန့ၣ်အ၀ဲသ့ၣ်န့ၣ်အိၣ်လၢမဲၢ်ကရီသ၀ီဟဲက့ၤထီၣ်မီၤနီၤ.အဟဲက့ၤထီၣ်တၢ်န့ၣ်အဆၢကတီၢ်တလၢ. မ့မ့ၢ်လၢအ၀ဲသ့ၣ်(DKBA)န့ၣ်သးအုး၀ဲလၢပှၤကလဲၤမၤအီၤအဃိမုၢ်မ့ဟါန့ၣ်အ၀ဲသ့ၣ်ဒိးလီၤဃၥ်၀ဲ(တဲးမဲ)မ့ၣ်ပိၢ်န့ၣ်.အဃိလၢန့ၣ်ခံဂၤ ဟဲက့ၤထီၣ်ဒိးဒီးစဲးကၢးအ၀ဲသ့ၣ်ကိးဃါ၀ဲတချုးလၢၤဘၣ်ဘျီအတၢ်ပိၢ်ထီၣ်၀ဲန့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ကမျၢၢ်လၢအဘၣ်ဒိ(၂)အံၤမ့ၢ်၀ဲ သ့ၣ်၀ါကီးတယးသ၀ီဖိ (၄၀)နံၣ်, ထိတီၣ်သ၀ီဖိ (၃၆)နံၣ် ဒီး ပှၤခံဂၤအံၤမ့ၣ်ပိၢ်ဘၣ်၀ဲ အခီၣ်,အစု, အချၢဃံ တမ့ၢ်ဘၣ်ဒိဘၣ်ထံးဒိၣ်ဒိၣ်မုၢ်မုၢ်ဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဖၠၢသ၀ီလ့ခီၣ်ထံးတၢ်လီၢ်လၢတၢ်ကဲထီၣ်သးခဲအံၤန့ၣ် ခီဖျိဘူးဒးကညီသုးမုၢ်ဒိၣ်(DKBA) သုးခိၣ်ဘိၤဘံၣ်အပှၤ အိၣ်ဆီလီၤသးအဃိ ကဲထီၣ်တၢ်ပျံၤတၢ်ဖုး,တၢ်နိးတၢ်ဘျးအလၢကမျၢၢ်တၢ်လဲၤတၢ်က့ၤအဂီၢ်အဂ့ၢ်န့ၣ် လီၢ်က၀ီၤပှၤဘၣ်မူ ဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
“မ့နီၢ်နီၢ်အသုသ့ၣ်အိၣ်ဖဲလ့ခီၣ်ထံးန့ၣ်တကြၢးဘၣ်.ဘၣ်မနုၤလဲၣ်ပှၤလ့ၢ်လိၤလ့ၢ်ထီၣ်အါ.မ့၀ံၤအ၀ဲသ့ၣ်ဒိးလီၤဃၥ်တၢ်ဒ်အံၤအတကြၢးဘၣ်မီၤနီၤ.အ၀ဲသ့ၣ်အိၣ်ဖဲန့ၣ်ပှၤသ၀ီဖိနါက့ဘၣ်ပျံၤဘၣ်ဖုးတၢ်အိၣ်စ့ၢ်.ဟးထီၣ်ဟးလီၤအဆၢကတီၢ်မ့စဲၤခံန့ၣ်ဘၣ်ပျံၤဘၣ်ဖုးတၢ်.အ၀ဲသ့ၣ်နါက့ကဲပှၤပျဲၢ်ဘျီပှၤမၢအိၣ်ဒီးဘၣ်အိၣ်၀ဲန့ၣ်.ပှၤကမျၢၢ်နါက့ကနီစံၣ်ထီၣ်အဂီၢ်နီ၀ဲတဘူၣ်စ့ၢ်ဘၣ်.မ့ဘၣ်တဲန့ၣ်ကဲထီၣ်တၢ်တံၥ်တၥ်ကျဲတဘိမီၤနီၤ.ဒ်သိးတတံၥ်တၥ်ဘၣ်န့ၣ်၀ဲစ့ၢ်ကီးပမၤတသ့စ့ၢ်ဘၣ်”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်ကျဲအံၤပှၤကမျၢၢ်လ့ၢ်ထီၣ်လ့ၢ်လိၤလဲၤက့ၤဖံးမၤတၢ်အိၣ်၀ဲတပယူၥ်ဃီဒီးလၢတၢ်ဘံၣ်တၢ်ဘၢအဖီခိၣ်ဟီၣ်က၀ီၤပူၤ၀ဲန့ၣ် (DKBA)ထုးထီၣ်တ့ၢ်ဃၥ်တၢ်ကလုၢ်လၢစးထီၣ်ဂီၤခီ ၆း၀၀ နၣ်ရံၣ်တုၤဟါခီ ၆း၀၀ နၣ်ရံၣ်န့ၣ် လ့ၤတက့ၤဟးထီၣ်က့ၤလီၤ တန့ၢ်၀ဲဘၣ်အိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
လၢန့ၣ်အမဲၥ်ညါအပူၤကွံၥ်နံၣ်အခါစ့ၢ်ကီးတၢ်လီၢ်၀ဲန့ၣ်ခီဖျိလၢမ့ၣ်ပိၢ်အံၤအဃိ ပှၤကမျၢၢ်သ၀ီဖိအကျီၢ်,ပနၢ်သံဘၣ်ဒိ ဘၣ်ထံးကဲထီၣ် အိၣ်၀ဲအသိး ဖဲအပူၤကွံၥ်စှၤနွံအခါစ့ၢ်ကီးလၢနီဖးဒိၣ်ကရူၢ် ကၠီတလူၢ်သ၀ီ မုၢ်ထီၣ်တူၢ်ရ့ၣ်ကျီးပူၤန့ၣ် ခီဖျိ(DKBA)အမ့ၣ်ပိၢ် အံၤဃိ ကမျၢၢ်ဘၣ်ဒိကဲထီၣ်ဒံး၀ဲတဂၤအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
(DKBA)ကရူၢ်လၢအဘၣ်တၢ်တီခိၣ်ရိၣ်မဲအီၤလၢသုးခိၣ်ဘိၤဘံၣ်အံၤစးထီၣ်သုးဟံန့ၢ်တၢ်စိတၢ်ကမီၤ၀ံၤလီၢ်ခံန့ၣ် အတၢ်ပၥ်ဖှိၣ် မၤသကိးတၢ်ဒီးသုးမီၤစိရိၤအိၣ်၀ဲဖျိဖျိဖျါဖျါ၀ံၤလီၢ်ခံစးထီၣ်ဖဲန့ၣ်(DKBA)ကရူၢ်အံၤဒီးဟီၣ်က၀ီၤ(KNLA) သုးရ့ၣ်-၁ အဘၢၣ်စၢၤ တၢ်ဖ့ၣ်စၢ ကဲထီၣ်၀ဲတုၤလၢခဲအံၤအဂ့ၢ်န့ၣ် သ့ၣ်ညါဘၣ်လီၤ.
လၢတၢ်န့ၣ်အဃိကယဲၢ်မ့ၢ်ဟီၣ်က၀ီၤတၢ်လီၢ်လၢ(DKBA)အပှၤအိၣ်ဆီလီၤသးအခိၣ်အဃၢၤန့ၣ် လၢတၢ်ဘံၣ်တၢ်ဘၢဒီးတၢ် ဒီသဒၢလီၤက့ၤသးအဂီၢ် ဘူးဒးသုးမုၢ်ဒိၣ်အပှၤဒိးလီၤဃၥ်၀ဲမ့ၣ်ပိၢ်,ဒီး(တိုက်မိုင်း)မ့ၣ်ပိၢ်ဘၣ်ဟဲအိၣ်ထီၣ်၀ဲဒ်အံၤလီၤအဂ့ၢ်န့ၣ် ကမျၢၢ်လၢအိၣ်ဘူးဖဲန့ၣ်တဖၣ်စံး၀ဲန့ၣ်လီၤ.
