လါယူၤ ၁၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်ပူၤ ဘူးဒးကညီသုးမုၢ်ဒိၣ်(DKBA)သုးခိၣ်ဘိၤဘံၣ်အပှၤလၢအိၣ်ဆီလီၤ သး ဖဲနိၣ်မကွံၢ်ကရူၢ် ဖၠၢသ၀ီလ့ခီၣ်ထံးအံၤတဖၣ်တၢ်လဲၤခး၀ဲအဃိ သံဘၣ်ဒိဘၣ်ထံးအိၣ်အဂ့ၢ်န့ၣ် လီၢ်က၀ီၤကမျၢၢ်ဒီးပှၤဘၣ်မူ ဘၣ်ဒါတဖၣ် စံး၀ဲအသိးသ့ၣ်ညါဘၣ်န့ၣ်လီၤ.
ဖဲမဟါလါယူၤ ၁၅ သီ ဂီၤခီ ၁ နၣ်ရံၣ်ဘျဲၣ်အဆၢကတီၢ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁ သုးဒ့(၂) အပှၤလဲၤခး၀ဲ(DKBA)အပှၤဒီး ဖဲန့ၣ်(DKBA)တကပၤသံဘၣ်ဒိဘၣ်ထံးအိၣ်ဘၣ်ဆၣ်သံဘၣ်ဒိဘၣ်ထံးပှဲၤဂၤလဲၣ်န့ၣ် မၤလီၤတံၢ်အီၤအဖၢမုၢ်လီၤအဂ့ၢ်န့ၣ် လီၢ်က၀ီၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤ.
“ပှၤလဲၤခးအီၤန့ၣ်ကဘၣ်ဖဲမဟါ ၁၅ သီ ဂီၤခီ ၁း၁၄ မံးနံးန့ၣ် ပှၤလဲၤခးအီၤ.အဘၣ်ဒိဒီးအသံန့ၣ်လီၤတံၢ်လံ. တၢ်ပှၤလဲၤခးအီၤန့ၣ် တယံၤဘၣ်ဘူးဘူးဖိလီၤ,နကွၢ်စိ၀ဲဖျါမ့ၣ်အူကဲၤန့ၣ်.တၢ်မၢၤလၢအသံပှဲၤဂၤဘၣ်ဒိပှဲၤဂၤလဲၣ်န့ၣ်ပတသ့ၣ်ညါထွဲဘၣ်ပဃုသ့ၣ်ညါအီၤအဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးတၢ်လဲၤခး(DKBA)ဒ်အံၤအဖီခိၣ်အ၀ဲသ့ၣ်တကပၤက့ၤခးစိကဒါ၀ဲမီးထးဖိကအိၣ်ခံထံၣ်သၢထံၣ်ဒီး လၢန့ၣ်အမဲၥ်ညါ ခီဖျိအ၀ဲသ့ၣ်ပှၤသံဘၣ်ဒိဘၣ်ထံးအိၣ်အဃိ ဖဲမဟါအနံၤန့ၣ်ကျဲ၀ဲန့ၣ်ကမျၢၢ်လ့ၢ်ထီၣ်လ့ၢ်လိၤန့ၢ်၀ဲဘၣ်ဆၣ် မ့မ့ၢ်လၢပှၤ ကလဲၤထံၣ် ဒီးအ၀ဲသ့ၣ်လိၤလိၤန့ၣ်လဲၤထံၣ်တသ့လၢၤဘၣ်အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဖဲန့ၣ်တဖၣ် စံး၀ဲန့ၣ်လီၤ.
ဘၣ်ဃးတၢ်ဂ့ၢ်ကဲသးဘျီ၀ဲအံၤဒ်သိးကသ့ၣ်ညါပၥ်ဂၢၢ်ပၥ်ကျၢၤတၢ်သံတၢ်ဘၣ်ဒိဘၣ်ထံးတၢ်အိၣ်သးလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ် (DKBA) ပှၤဘၣ်မူဘၣ်ဒါအိၣ်၀ဲဘၣ်ဆၣ်ဆဲးကျိးတန့ၢ်၀ဲဘၣ်န့ၣ်လီၤ.
ဖၠၢသ၀ီလ့ခီၣ်ထံးလၢတၢ်ကဲထီၣ်သးဖဲမဟါအနံၤအံၤအပူၤကွံၥ်(DKBA)တအိၣ်၀ဲဘၣ်ဆၣ်စးထီၣ်ဖဲ(၂၀၂၁)သုးဟံန့ၢ်တၢ်စိတၢ်ကမီၤ၀ံၤ လီၢ်ခံန့ၣ်သုးဘိၤဘံၣ်အပှၤဟဲအိၣ်ဆီလီၤသးအိၣ်ထီၣ်၀ဲဒီးလၢအ၀ဲသ့ၣ်အိၣ်ဆီလီၤသးဒ်အံၤအဖီခိၣ်စ့ၢ်ကီးဟီၣ်က၀ီၤ(KNU) တကပၤတတူၢ်လိၥ်၀ဲဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲဒ်အံၤန့ၣ်လီၤ.
“ပှၤတဲအီၤလၢအိၣ်တံၥ်တၥ်လၢၤကျဲဖဲန့ၣ်တဂ့ၤ.အိၣ်လၢကစၢ်လီၢ်လၢဃိၣ်ဖိန့ၣ်ဘၣ်လံ.ဘၣ်ဆၣ်အ၀ဲသ့ၣ်ဟးပြၤလီၤတၢ်လီၢ်ဒီဒူၣ်.လၢညါပလဲၤဖံးလဲၤမၤတၢ်,ပှၤလဲၤလၢမၠဲၤကလ့န့ၣ်ပလ့ၢ်လိၤလ့ၢ်ထီၣ်ဖဲကျဲတဘိန့ၣ်လီၤ.အ၀ဲသ့ၣ်အိၣ်ဘျီပလဲၤတဘူၣ်လၢၤဘၣ်. တံၥ်တၥ်ကျဲမီၤနီၤ.အ၀ဲသ့ၣ်အိၣ်ဒီးကျိဘျီပှၤသ၀ီဖိတဲတဘူၣ်ဘၣ်,အ၀ဲသ့ၣ်ဟဲအိၣ်ဖဲန့ၣ်ပှၤသ၀ီဖိတဲရးရးလီၤ.ဘၣ်မနုၤလဲၣ်ပှၤလဲၤဃုဖံးအီၣ်မၤအီၣ်တအါတိၢ်အါယးလၢၤဘၣ်”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်စးထီၣ်ဖဲ(DKBA)ဟဲအိၣ်ဆီလီၤသးဖဲန့ၣ်၀ံၤလီၢ်ခံန့ၣ်တၢ်လဲၤခးအ၀ဲသ့ၣ်အိၣ်လံ၀ဲတစှၤန့ၢ်(၄)ဘျီလံဒီး ဖဲအပူၤ ကွံၥ်လါယူၤ ၈ သီ ဟါခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး ခီဖျိအ၀ဲသ့ၣ်တၢ်ပၥ်ပနီၣ်တၢ်ဆၢကတီၢ်တလၢအဃိ နိၣ်မကွံၢ်ကရူၢ် ကမျၢၢ်ပိၥ်ခွါ(၂)ဂၤ ဘၣ်၀ဲဒီးအ၀ဲသ့ၣ်မ့ၣ်ထုးမ့ၣ်ပိၢ်ဘၣ်ဆၣ်တၢ်ဘၣ်ယိၣ်တအိၣ်၀ဲဘၣ်ကဲထီၣ်ဒံး၀ဲဒၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်(၂၀၂၄)လါအီးကထိဘၢၣ်အခါန့ၣ်စ့ၢ်ကီး လၢနီဖးဒိၣ်ကရူၢ်အပူၤ သုးခိၣ်ဘိၤဘံၣ်လဲၤဆီလီၤအပှၤလၢ ၀ၣ်တရဲၢ်သ၀ီကၠိမဲၥ်ညါကဲထီၣ်ဒံး၀ဲဒီးဘၣ်ဆၣ်ခီဖျိကမျၢၢ်သ၀ီဖိဒီးဟီၣ်က၀ီၤခ့ၣ်အဲၣ်ယူၣ်ပှၤဘၣ်မူဘၣ်ဒါစ့ၢ်ကီးတတူၢ်လိၥ်၀ဲဘၣ် ကဲထီၣ်ဒံး၀ဲန့ၣ်လီၤ.
လၢတၢ်န့ၣ်အဃိစးထီၣ်ဖဲန့ၣ် သုးရ့ၣ်-၁ အပှၤလဲၤခးအ၀ဲသ့ၣ်ကအိၣ်လၢ(၂)ဘျီညါအသိး(DKBA)တကပၤစ့ၢ်ကီး ခးလီၤကဒါကျိ ဖးဒိၣ်အိၣ်၀ဲဒၣ်ဒီး တၢ်ဘၣ်ဂံၥ်ဂူၥ်ကဲထီၣ်၀ံၤလီၢ်ဖဲန့ၣ်သုးခိၣ်ဘိၤဘံၣ်အပှၤလၢအိၣ်ဆီလီၤသးဖဲကၠိမဲၥ်ညါအံၤတဖၣ် ဟးထီၣ်သုးက့ၤလီၢ်ဆူဒူသ၀ီတၢ်လီၢ်အဂၤ ဟဲအိၣ်ထီၣ်၀ဲဒၣ်န့ၣ်လီၤ.
