လါယူၤ ၂၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, ကစၢၢ်ဒိၣ်ကီၢ်ဆၣ် ဖဲအပူၤကွံၥ်လါယူၤ(၂၆)သီအနံၤန့ၣ်က ညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးရ့ၣ်(၁၂),အသုးဒ့(၂)ဒီးတၢ်ပၢၢ်ဆၢသုးပၥ်ဖှိၣ်နုၥ်လီၤခးဝဲပယီၤသုးတၢ်လီၢ်ဖဲ(မ့ဒး)သဝီသီခါဖၠၣ်ကရၢၢ်အပူၤဝံၤဒိၣ်စိန့ၢ်က့ၤဝဲတၢ်လီၢ်အဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဝဲဒၣ်န့ၣ်လီၤ.
ပယီၤသုးလၢအဟဲအိၣ်ဆီလီၤပၥ်လီၤအတၢ်လီၢ်တၢ်ကျဲဖဲ(မ့ဒး)သဝီသီခါဖၠၣ်ကရၢၢ်အပူၤသ့ၣ်တဖၣ်အံၤဖဲလါယူၤ(၂၆)သီ, မုၢ်ဃ့ၢ်လီၤ(၁)နၣ်ရံၣ်အဆၢကတီၢ်(KNLA)ဒီးတၢ်ပၢၢ်ဆၢသုးပၥ်ဖှိၣ်စးထီၣ်နုၥ်လီၤခးဝဲဒၣ်ဒီးဖဲမုၢ်ဃ့ၢ်လီၤ(၃)နၣ်ရံၣ် အဆၢကတီၢ်တၢ်ထီၣ်ဒိၣ်စိန့ၢ်က့ၤဝဲတၢ်လီၢ်အံၤအဂ့ၢ်(KNLA)သုးရ့ၣ်(၁၂)အသုးရ့ၣ်ခိၣ်သုးခိၣ်ဒိၣ်ဂီၢ်ဂ့ၢ်စီၤဒါဒါစံးဝဲဒ်အံၤန့ၣ်လီၤ.
“ဖဲ(၂၆)သီန့ၣ်ပပှၤနုၥ်လီၤခးဝဲဒၣ်မီၤနီၤ. ပပှၤနုၥ်လီၤခးဝဲဒၣ်ဒီးဒုၣ်ဒါန့ၣ်ဘၣ်ဒိဘၣ်ထံးအါဝဲအဃိဂုၥ်လီၤက့ၤအခံန့ၣ် လီၤ. မ့မ့ၢ်လၢတၢ်ဒုးန့ၣ်တၢ်ဆၢကတီၢ်ယံၥ်ဝဲ(၂)နၣ်ရံၣ်လီၤ. ပယီၤသုးန့ၣ်က့ၤဂုၥ်လီၤက့ၤအခံဖဲအသုးကလၢၤ(ဝ့ဝး)အ ပူၤန့ၣ်လီၤ. အဝဲသ့ၣ်န့ၣ်ကဟဲထီၣ်ဒိၣ်စိဟီၣ်ကဝီၤဒီးကဟဲဆ့ၣ်နီၤဝဲဒၣ်မီၤနီၤ. မ့ၢ်လၢပပှၤခးဝဲအဃိဂုၥ်က့ၤဝဲအခံလီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲတၢ်နုၥ်လီၤခးဝဲပယီၤသုးလၢအိၣ်ဆီလီၤအသးဖဲ(မ့ဒး)သဝီအပူၤအဆၢကတီၢ်ပယီၤသုးအပှၤသ့ၣ်တဖၣ်ဂုၥ်လီၤက့ၤအခံဆူ(ဝ့ဝၣ်)သုးကလၢၤအပူၤန့ၣ်လီၤ. တၢ်ဒုးဘျီဝဲအံၤအပူၤန့ၣ်ပယီၤသုးကီၣ်ကးအပှၤသံ(၅)ဂၤအသိးတၢ်မၤန့ၢ်ဃုၥ် စ့ၢ်ကီးဝဲဒီးပယီၤသုးသုးတၢ်ဖိတၢ်လံၤ,ကျိချံပှၥ်သၣ်သ့ၣ်တဖၣ်အဂ့ၢ်သုးခိၣ်ဒိၣ်ဂီၢ်ဂ့ၢ်စီၤဒါဒါစံးအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါဘျံးဒဝဲၢ်ကီၢ်ရ့ၣ်သုးက့နီၣ်ဂံၢ်(၄)ဟီၣ်ကဝီၤအပူၤဖဲတၢ်ထီၣ်မၤန့ၢ်ကွံၥ်ဝဲပယီၤသုးထံခံဒုးယၤသုးကလၢၤအံၤဝံၤအလီၢ်ခံဒ်သိးလၢတၢ်ကက့ၤထီၣ်မၤန့ၢ်က့ၤဝဲဒၣ်ထံခံသုးကလၢၤအံၤအဂီၢ်ပယီၤသုးကီၣ်ကးအသုးကျိၤသၢဘိဟဲထီၣ်ဟူးဂဲၤအါထီၣ်ဝဲဒၣ်အဂ့ၢ်လီၢ်ကဝီၤ(KNLA)အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဘျံးဒဝဲၢ်ကီၢ်ရ့ၣ်, ပလီကီၢ်ဆၣ်ဟီၣ်ကဝီၤအပူၤဖဲမဟါလါယူၤ(၂၈)သီအနံၤန့ၣ်ကညီဒီကလုၥ်ဂၢၤသးကရၢ() သုးရ့ၣ်(၇)ဒီးတၢ်ပၢၢ်ဆၢသုးသ့ၣ်တဖၣ်နုၥ်လီၤခးဝဲ(ပၠူဆီထံး)တၢ်လီၢ်ဖဲ(ကၠီၣ်ကၣ်)သဝီအပူၤဒီးတၢ်ထံၣ်န့ၢ်ဝဲ(ပၠူဆီထံး)အစိၢ်(၃)စိၢ်အမဲၥ်ညါတၢ်မၤန့ၢ်ဃုၥ်တၢ်စုကဝဲၤ(၅)ခိၣ်ဒီးကျိချံပှၥ်သၣ်သ့ၣ်တဖၣ်အါအါဂီၢ်ဂီၢ်အဂ့ၢ်လီၢ်ကဝီၤတၢ်ပၢၢ်ဆၢသုးပၥ်ဖှိၣ်ထုးထီၣ်ပၥ်ဖျါဝဲစ့ၢ်ကီးန့ၣ်လီၤ.
