လါယူၤ ၂၃သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၆),ဒူပျၥ်ယၥ်ကီၢ်ရ့ၣ်, ကီးတရံးကီၢ်ဆၣ်,တီနီၢ်မုၢ်ထီၣ်ဟီၣ်ကဝီၤပူၤ ထံကပျၢၤပယီၤသုးကလၢၤလၢ ဟဲအိၣ်ဆီလီၤသးန့ၢ်(၂၈)နံၣ် တဖျၢၣ်အံၤ ဖဲအပူၤကွံၥ်လါယူၤ(၂၂)သီဂီၤခီအဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO)တီခိၣ်ရိၣ်မဲ(PDF)သုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲဒၣ်အဂ့ၢ် သ့ၣ်ညါဘၣ်လၢ လီၢ်ကဝီၤ KNLA အပှၤဘၣ်မူဘၣ်ဒါအအိၣ်န့ၣ်လီၤ.
ထံကပျၢၤပယီၤသုးကလၢၤအံၤ စးထီၣ်လါယူၤထီၣ်(၂)သီအနံၤ အခါလံၤလံၤ တၢ်ပၢၢ်ဆၢသုးပၥ်ဖှိၣ်တဖၣ်ကဝီၤဃၥ်ဝဲဒီးတၢ်ဆၢကတီၢ်ယံၤအသီ(၂၀)ဘျဲၣ်ဝံၤအလီၢ်ခံတၢ်ထီၣ်မၤနၢ်ကွံၥ်အီၤဒ်အံၤလီၤအဂ့ၢ် လီၢ်ကဝီၤ KNLA အပှၤဘၣ်မူဘၣ်ဒါတဂၤစံးဘၣ်ဝဲဒၣ် ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲဒၣ်လၢ“သုးကလၢၤဝဲအံၤ တၢ်ကထီၣ်မၤန့ၢ်အီၤအဂီၢ် တၢ်ဆၢကတီၢ်လၢၤဘူးကအိၣ်လၢအလါန့ၣ်လီၤ.ပယီၤသုးသ့ၣ်တဖၣ်ဃ့ၢ်ထီၣ်ကွံၥ်လၢအသုးကလၢၤအပူၤဒီးမ့ၢ်အလဲၤဃ့ၢ်ဖဲလဲၣ်န့ၣ်တၢ်တသ့ၣ်ညါဒ်ဘၣ်.လၢကီၢ်ကၠီၣ်တဲၣ်ကပၤဒီးပတနၢ်ဟူတၢ်ကစီၣ်နီတမံၤဒံးဘၣ်.မ့ၢ်အက့ၤပၥ်ဖှိၣ်သးဒီးဂီၤလ့ၤဒုးယၤသုးကလၢၤဧါန့ၣ်တသ့ၣ်ညါဒံးဘၣ်.”အဂ့ၢ်စံးဝဲဒၣ်န့ၣ်လီၤ.
ဘၣ်ဃးဒီးတၢ်ထီၣ်မၤန့ၢ် ထံကပျၢၤပယီၤသုးးကလၢၤအံၤ ဒ်သိးကသ့ၣ်ညါဘၣ်တၢ်လီၤတံၢ်လီၤဆဲးအဂီၢ် ခ့ၣ်အဲးစံၣ်ဆဲးကျိးသံကွၢ်ဒီး ပှၤတီခိၣ်ရိၣ်မဲတၢ်ဒုး ကညီဒီကလုၥ်ဂၢၤသးကရၢသုးရ့ၣ်(၈)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် အဲၣ်မၠးထူဘၣ်ဆၣ်ဆဲးကျိးတန့ၢ်ဒံးဘၣ်အဂ့ၢ်ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ.
ဒ်လီၢ်ကဝီၤ KNLA အပှၤဘၣ်မူဘၣ်ဒါလၢအအိၣ်ဘူးဖဲန့ၣ်စံးဝဲဒၣ်အသိးန့ၣ် ပယီၤသုးလၢအဟဲအိၣ်ဆီလီၤသးဖဲထံကပျၢၤသ့ၣ်တဖၣ်အံၤမ့ၢ်ဝဲ ခီၣ်သုးရ့ၣ်(ခလရ-၃၂)ဒီး ခီၣ်ချ့သုးရ့ၣ်(ခမရ-၅၅၅)သ့ၣ်တဖၣ်ဒီးပှၤနီၣ်ဂံၢ်ကအိၣ်အဂၤ(၆၀)ဃၣ်ဃၣ်အဂ့ၢ် စံးဝဲဒၣ်န့ၣ်လီၤ.
မၤနၢၤပျီလီၤဝံၤအလီၢ်ခံဖဲ ၁၉၉၅နံၣ်,လါမ့ၤအဆၢကတီၢ် ခ့ၣ်အဲၣ်ယူၣ်က့ၤပၥ်ဝဲထံကပျၢၤတၢ်လီၢ်အံၤဒ်အမ့ၢ်အဝဲသ့ၣ် လီၢ်ခၢၣ်သးအသီတခါအသိးဘၣ်ဆၣ် တချုးပှဲၤထီၣ်(၂)နံၣ်ဖဲ ၁၉၉၇နံၣ် လါဖ့ၤဘြူၤအါရံၤအဆၢကတီၢ် ပယီၤသုးမုၢ်ဒိၣ်ဟဲထီၣ်မၤန့ၢ်ကွံၥ်ဝဲဒၣ်ဒီးအိၣ်ဆီလီၤဝဲသး(၂၈)နံၣ်ဝံၤအလီၢ်ခံ ဘၣ်တၢ်က့ၤထီၣ်မၤန့ၢ်ကဒါက့ၤအီၤအဂ့ၢ် ခ့ၣ်အဲၣ်ယူၣ်လီၢ်ခၢၣ်သးတၢ်ကစီၣ်စ့ၢ်ကီးၥ်ဖျါဝဲဖဲတနံၤအံၤအိၣ်ဝဲဒၣ်န့ၣ်လီၤ.
ထံကပျၢၤပယီၤသုးကလၢၤဝဲအံၤန့ၣ်အိၣ်ယံၤဝဲဒီးကီၢ်ကၠီၣ်တဲၣ်ကီၢ်ဆၢထဲ (၂)ကံလိဘျဲၣ်ဒီး သုးကလၢၤဝဲအံၤလီၤဝံၤအလီၢ်ခံ တီနီၢ်မုၢ်ထီၣ်ဟီၣ်ကဝီၤပူၤ ပယီၤသုးကလၢၤအိၣ်တ့ၢ်ဝဲခံဖျၢၣ်ဒ်အမ့ၢ် ဂီၤလ့ၤဒုးယၤသုးကလၢၤဒီး အူးကြ့ၢ်ထၣ်သုးကလၢၤသ့ၣ်ဒီးတကီၢ်ခါခဲအံၤဖဲအူးကြ့ၢ်ထၣ်ပယီၤသုးကလၢၤစ့ၢ်ကီးတၢ်ဒုးကဲထီၣ်ဝဲအဖၢမုၢ်အဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
