လါယူၤလံ ၃၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်(သုးက့-၄)တၢ်ပၢဟီၣ်ကဝီၤအပူၤစးထီၣ်လၢလါယူၤလံထီၣ် (၁)သီအနံၤဒီးတုၤလီၤလၢ(၃၁)သီအနံၤလၢတလါအတီၢ်ပူၤအံၤပယီၤသုးဖိလၢအဟဲက့ၤပၥ်လီၤတၢ်စုကဝဲၤခဲလၢၥ်အိၣ်ဝဲအဂၤ(၁၀)အဂ့ၢ်ဒ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါသ့ၣ်တဖၣ်ပူၤအသိးသ့ၣ်ညါဘၣ်န့ၣ်လီၤ.
လၢတလါအတီၢ်ပူၤပယီၤသုးဖိလၢဟဲက့ၤပၥ်လီၤတၢ်စုကဝဲၤအဂၤ(၁၀)သ့ၣ်တဖၣ်အံၤဟဲက့ၤဟ့ၣ်လီၤအသးလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်-၄,သုးရ့ၣ်(၁၁)အစုပူၤ(၉)ဂၤ,ဒီးသုးရ့ၣ်(၁၂)အစုပူၤ(၁)ဂၤအဂ့ၢ်တၢ်ပၥ်ဖျါ သ့ၣ်တဖၣ်အပူၤပၥ်ဖျါဃၥ်ဝဲန့ၣ်လီၤ.
ပယီၤသုးဖိလၢအဟဲက့ၤပၥ်လီၤတၢ်စုကဝဲၤလၢ(သုးက့-၄)ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အစုပူၤသ့ၣ်တ ဖၣ်အံၤအါဒၣ်တၢ်က့ၢ်မ့ၢ်ဝဲပှၤသ့ၣ်တဖၣ်လၢသုးကီၣ်ကးဖီၣ်ဆူၣ်မၢဆူၣ်ကဲဝဲသုးသ့ၣ်တဖၣ်ဒီးခီဖျိနီၢ်ကစၢ်တအဲၣ်ဒိးကဲသုးဘၣ်အဃိဃ့ၢ်ဖျိးထီၣ်ဒီးဟဲက့ၤပၥ်လီၤတၢ်စုကဝဲၤဒ်အံၤလီၤအဂ့ၢ်လီၢ်ကဝီၤပှၤဘၣ်မူဘၣ်ဒါစံးတ့ၢ်ဝဲန့ၣ်လီၤ.
လၢန့ၣ်အမဲၥ်ညါမ့ၢ်ဘၣ်ကွၢ်က့ၤဝဲလၢတလါအတီၢ်ပူၤတၢ်မၤန့ၢ်ဝဲတၢ်စုကဝဲၤကျိချံပှၥ်သၣ်လၢပယီၤသုးဖိလၢဟဲက့ၤဟ့ၣ်လီၤသးအအိၣ်သ့ၣ်တဖၣ်န့ၣ် MA1ကျိ (၅) ခိၣ်, ကျိချံ (၆၀၈) ဖျၢၣ်, ကျိဆၣ်ဒၢ (၁၇) ဘ့ၣ်သ့ၣ်တဖၣ်အံၤအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤခီဖျိတၢ်ဒုးတၢ်ယၥ်ကဲထီၣ်ဝဲတပယူၥ်ဃီဒီးတၢ်ဒုးအပူၤပယီၤသုးတၢ်သံတၢ်ဘၣ်ဒိအါဝဲအဖီခိၣ်ပယီၤသုးအံၤလၢကဂုၥ်လီၤက့ၤလီၢ်ခံအဂီၢ်ဂုၥ်ဝဲတသ့ခီဖျိတၢ်ခိးခးဝဲအဃိဘၣ်အိၣ်ကတၥ်ထီအသးဒီးတနီၤဃုကျဲဃ့ၢ်ဖျိးထီၣ်ဟဲက့ၤပၥ်လီၤတၢ်စုကဝဲၤအိၣ်အသိးတနီၤဃ့ၢ်ထီၣ်တဖျိးစ့ၢ်ကီးအိၣ်ဝဲအဂ့ၢ်ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
