လါအီကူး ၁၇ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)သုးဝဲၤလီၢ်ခိၣ်သ့ၣ် တၢ်လီၢ် အပူၤကွံၥ်ကျိဖးဒိၣ်အဃိ ကမျၢၢ်လၢအလဲၤဃ့ၢ်ထီၣ်အိၣ်ကဒုသးဖဲသူမှဲကျိဝၢ်ခီ မဲၢ်တရံးသီခါဖၠၣ်တဖၣ်အံၤ ဖဲမဟါအနံၤန့ၣ်က့ၤကဒါ ဆူအဟံၣ်အဃီအတၢ်လီၢ်တၢ်ကျဲလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်လါအီကူး ၁၀ သီဟါခီအဆၢကတီၢ်န့ၣ် လၢတၢ်တပၥ်သူၣ်ပၥ်သးအပူၤ သုးမီၤစိရိၤအကဘီယူၤလဲၤ တ့ၢ်လီၤဝဲမ့ၣ်ပိၢ် လၢ(သုးက့ ၇)သုးဝဲၤလီၢ်ခိၣ်သ့ၣ် ကျိၣ်ယီၢ်လ့အခိၣ်အဃၢၤဒီး ဖဲန့ၣ်ကမျၢၢ်ဃုၥ်ဒီးပှၤကၠိဖိလၢအိၣ်ဖဲတၢ်ခိၣ်တၢ်ဃၢၤဒီတကျိၤ ပှၤနီၣ်ဂံၢ်လၢအကထိဃ့ၢ် ထီၣ်ဝဲဆူကီၢ်ကၠီၣ်တဲၣ်တကပၤန့ၣ်လီၤ.
ကမျၢၢ်လၢဃ့ၢ်ထီၣ်တဖၣ်အကျါ ပိၥ်ခွါ(၃၂)ဂၤ,ပိၥ်မုၣ်(၄၄)ဂၤ,ဖိသၣ်ပိၥ်ခွါဆံး(၅၆)ဂၤဒီးဖိသၣ်ပိၥ်မုၣ်ဆံး(၈၁)ဂၤ ပၥ်ဖှိၣ်ခဲလၢၥ် (၂၁၃)ဂၤ လၢအလဲၤအိၣ် ကဒုသးဖဲမဲၢ်တရံးသီခါဖၠၣ်အံၤတဖၣ်ဃ့ထီၣ်ဝဲလၢကက့ၤဆူအဟံၣ်အဃိ ဖဲမဟါအနံၤန့ၣ်ကၠီၣ်တဲၣ် သုးပှၤဘၣ်မူဘၣ်ဒါ က့ၤဆှၢ ကဒါဝဲဆူကီၢ်ပယီၤတကပၤလံအဂ့ၢ်န့ၣ် ကၠီၣ်တဲၣ်တၢ်ကစီၣ်သန့ပၥ်ဖျါထီၣ်ဝဲန့ၣ်လီၤ.
ကမျၢၢ်သ့ၣ်တဖၣ်အံၤဃ့ၢ်ထီၣ်တၢ်ဆၢကတီၢ်အိၣ်လၢတနွံဃၣ်ဃၣ်လံဒီးလၢတၢ်ကဲထီၣ်သးအံၤအဃိကၠိ ပံး,ပှၤကၠိ ဖိစ့ၢ်ကီး တထီၣ်ဘၣ်ကၠိယံၤလံအဃိ တကီၢ်ခါခဲအံၤကမျၢၢ်လၢလဲၤအိၣ်သီခါဖၠၣ်တဖၣ်န့ၣ်အမဲၥ်ညါကမျၢၢ်လၢအလဲၤစံၣ်အိၣ် လၢအသမူ သကိး, အဘူးအတံၢ်ဟံၣ်တဖၣ်စ့ၢ်ကီးအါဒၣ်တက့ၢ်က့ၤဃီၤကဒါဆူထံဝၢ်ခီအတၢ်လီၢ်တၢ်ကျဲလံအဂ့ၢ်န့ၣ် ကမျၢၢ်လၢအိၣ် ဘူးဖဲန့ၣ်တဖၣ် စံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤ လီၢ်ကဝီၤကမျၢၢ်ပိၥ်မုၣ်တဂၤစံးဝဲလၢ “အဝဲသ့ၣ်စံၣ်ထီၣ်ကအိၣ်လၢတနွံလံ.ကၠိစ့ၢ်ကီးပံးပှၤကၠိဖိ တထီၣ် ဘၣ်ကၠိလၢၤဘၣ်မီၤ.ခဲအံၤတသီခံသီအတီၢ်ပူၤအံၤကဘီယူၤ ဟဲဆှၣ်တၢ်တအိၣ်လၢၤဘၣ်.ဖဲတၢ်ကဲထီၣ်သးဝံၤ တသီ ခံသီန့ၣ် ကဘီယူၤဟဲဆှၣ်တၢ်ဒံး.အဝဲက့ၤအိၣ်နါက့ဘၣ်အိၣ်ကနၣ်ကွၢ်တၢ်အိၣ်သး.ခဲမုၢ်ဆ့ၣ်န့ၣ်ကၠိကက့ၤအိးထီၣ်ကဒါလီၤ.တၢ်အိၣ်သးမ့တဂ့ၤဘၣ်န့ၣ်ပှၤခိၣ်ပှၤနၢ်ဒုးသ့ၣ်ညါကဒါဝဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤကမျၢၢ်တဖၣ်က့ၤကဒါဆူအဟံၣ်အဃီလံဘၣ်ဆၣ် ခါဆူမဲၥ်ညါတၢ်အိၣ်သးကမၤသးဒ်လဲၣ်တသ့ၣ်ညါဒံးဘၣ် အဃိ (ခ့ၣ်အဲၣ်ယူၣ်)ခိၣ်နၢ်ပှၤဘၣ်မူဘၣ်ဒါတဲဃၥ်ကမျၢၢ်တဖၣ်လၢကလဲၤကက့ၤကဟးထီၣ်က့ၤလီၤလၢတၢ်ပလီၢ်ပဒီပူၤအဂ့ၢ်န့ၣ် ကမျၢၢ်တဖၣ် စံးဝဲန့ၣ်လီၤ.
(သုးက့ ၇)သုးဝဲၤလီၢ်ခိၣ်သ့ၣ်တၢ်လီၢ်အံၤသုးဟံန့ၢ်တၢ်စိတၢ်ကမီၤဝံၤလီၢ်ခံစးထီၣ်ဖဲ(၂၀၂၁)တုၤလၢတနံၣ်အံၤ(၂၀၂၄)လါယူၤန့ၣ် တၢ်လဲၤတ့ၢ်လီၤတၢ်ဒီးဒြိအိၣ်ဘၣ်ဆၣ် မ့မ့ၢ်လၢတၢ်လဲၤခးလီၤတၢ်ဒီးကဘီယူၤအံၤမ့ၢ်တၢ်အဆိကတၢၢ်တဘျီဒီး ဒ်န့ၣ်အသိးကဘီယူၤ လဲၤခးလီၤတၢ်ဘျီဝဲအံၤ ပှၤကညီသံမ့တအိၣ်ဘၣ်ဆၣ် သုးဖိဘၣ်ဒိတဂၤဒီးတၢ်သူၣ်ထီၣ်ဟးဂီၤဝဲအိၣ်စှၤကိၥ်ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
