လါအီကူး ၂၈ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ်(ရၤမတံ)ဝ့ၢ် ကဝီၤဒ့ပူၤ ကမျၢၢ်ပိၥ်ခွါတဂၤလၢ(KNU/KNLA-PC)သုးခိၣ်တဂၤ ဖီၣ်က့ၤကိးအီၤဝံၤသံကွံၥ်ဝဲတၢ်ဂ့ၢ်အံၤ သုတကဲထီၣ်တၢ်ထံၣ်ကမၣ်တဂ့ၤအဂီၢ်တၢ်တီၣ်ဖျါထီၣ်ဆူလီၢ်ခၢၣ်သးအအိၣ်လံအဂ့ၢ်န့ၣ် ကရူၢ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတနံၤအံၤန့ၣ်လီၤ.
မၠၣ်ဝတံၣ် ကဝီၤဒ့(၄)အပူၤ ဖဲအပူၤကွံၥ်လါအီကူး ၂၄ သီ ဟါခီ ၉း၃၀ အဆၢကတီၢ် သးပှၢ်(ရာအိမ်မှူး)အံၤ ကဝီၤဒ့ပူၤကမျၢၢ် အူမိဝ့ (၄၀)နံၣ်ဘျဲၣ်တဂၤအံၤ ဆိၣ်အီၤထုအီၤအဃိ သးပှၢ်အံၤထိတီၢ်ဝဲကမျၢၢ်တဂၤအံၤတကးဒံးဘၣ်လဲၤတၢၣ်ဝဲအဟံၣ်ကပၤကညီတၢ် မုၥ်တၢ်ခုၣ်ကီၣ်ကးကရၢ(PC) သုးခိၣ် ကိၤနဲၤ ဝံၤတၢ်လဲၤဆှၢအီၤဆူ ကရူၢ်(၁၈)တြဲၤတၢ်သမံသမိးလီၢ်အံၤအဂ့ၢ်န့ၣ် ကရူၢ်ပှၤဘၣ်မူ ဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ဘၣ်ဆၣ်ကမျၢၢ်တဂၤလၢ(PC)သုးခိၣ်ကိၤနဲၤဖီၣ်က့ၤကိးအီၤဆူ(၁၈)တၢ်သမံသမိးတြဲၤအံၤ မုၢ်ဆ့ၣ်ထီၣ်လါအီကူး ၂၅ သီ ဂီၤခီ ၅း၀၀ နၣ်ရံၣ် ဃၣ်ဃၣ်အဆၢကတီၢ်န့ၣ် အသးသမူတအိၣ်လၢၤဘၣ်သံကွံၥ်ဝဲဒၣ်ဘၣ်ဆၣ် တၢ်ဂ့ၢ်လၢအကဲထီၣ်သးတဖၣ်အံၤ ခိၣ်နၢ်တၢ်ဖီခိၣ်တသ့ၣ်ညါထွဲဝဲဘၣ်အဂ့ၢ်န့ၣ် (PC)ပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးအံၤ မၠၣ်ဝတံၣ်(PC)တၢ်ရ့လိၥ်မုၥ်လိၥ်ဝဲၤဒၢး ပှၤဘၣ်မူဘၣ်ဒါ စီၤအဲၣ်ဒိၣ် စံးဝဲလၢ“တၢ်ကဲထီၣ်သးခါန့ၣ် ယတအိၣ်မၠၣ်ဝတံၣ်ဘၣ်.တၢ်န့ၣ်ကမျၢၢ်တဂၤန့ၣ်အဆိၣ်သးပှၢ်(ရာအိမ်မှူး)ဘျီသးပှၢ်န့ၣ်တီၢ်အီၤဧါတဲတဘၣ်ဘၣ်. (ရာအိမ်မှူး)န့ၣ် ဟဲတၢၣ်(PC) ဗျူဟာ-၃ သုးခိၣ်ကိၤနဲၤဘျီပှၤလဲၤဖီၣ်အီၤ. အလဲၤဖီၣ်တၢ်န့ၣ်နီၢ်ကီၢ်ကဘၣ်တဲကျၢပှၤ,တတဲ ကျၢ ပှၤဘၣ်.ခဲအံၤ အကစၢ်လဲၤဖီၣ်,အကစၢ်ထၢနုၥ်လီၤဝဲဝံၤပှၤသံမးပသ့ၣ်ညါထွဲက့ၤ. ယသံကွၢ်ပှၤဖိသၣ်အိၣ်ခိးတၢ် တဖၣ်န့ၣ်သုတီၢ်အီၤဧါ. တဲဝဲလၢ တတီၢ်ဝဲဘၣ်,ပှၤဟဲဆှၢခါန့ၣ်အိၣ်ဒ်အံၤလီၤ.ယတဲအီၤလၢတၢ်ဂ့ၢ်ကဲထီၣ်သးအံၤတဘၣ်ဃး(PC)ဘၣ်တၢ်ကဘၣ်လဲၤဆှၢလၢပၢၤကီၢ်အအိၣ်ဒ်န့ၣ်.အဝဲသ့ၣ်ခီလဲၤဖီၣ်အစၢ်တုၤလၢပှၤသံဘျီလီၤဘၣ်က့ၤလၢ(PC)အခိၣ်လိၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကိၤနဲၤအံၤမ့ၢ်ဝဲ(PC)သုးခိၣ်တဂၤအသိးကမျၢၢ်အံၤသံဝဲဒၣ်လၢကရူၢ်အတၢ်သမံသမိးတြဲၤတၢ်လီၢ်အဃိ ပှၤအါဂၤထံၣ်ဝဲလၢ ကရူၢ်ကရၢအံၤမၤသံဝဲကမျၢၢ်အံၤဘၣ်ဆၣ် မ့မ့ၢ်တဃီမၤဒၣ်လၢအကစၢ်သးတကးဒံးဘၣ်လၢအတၢ်ဖံးတၢ်မၤအဃိ မၤဘၣ်ဒိက့ၤဝဲ တၢ်ကရၢကရိဒီတဖုအဖီခိၣ် ဒ်တၢ်သိၣ်တၢ်သီအိၣ်အသိးတၢ်တီၣ်ဖျါထီၣ်အီၤဆူလီၢ်ခၢၣ်သး အိၣ်လံအဂ့ၢ်န့ၣ် (PC)ပှၤဘၣ်မူ ဘၣ်ဒါတဂၤဃီဝဲန့ၣ် စံးအါထီၣ်ဝဲန့ၣ်လီၤ.
“အခဲအံၤသုခိၣ်ကိၤနဲၤအတၢ်ဖံးတၢ်မၤအံၤယတီၣ်ဖျါထီၣ်တၢ်ဂ့ၢ်လၢလီၢ်ခၢၣ်သးဝဲၤလီၢ်ခိၣ်သ့ၣ်အအိၣ်လံ.လီၢ်ခၢၣ်သးခိၣ်နၢ်တဖၣ်န့ၣ်အမၤဝဲဒ်လဲၣ်န့ၣ်အိၣ်က့ၤလၢအဝဲသ့ၣ်မူဒါလီၤ.တၢ်လၢနကဲသုးန့ၣ်နကဘၣ်နၢ်ပၢၢ်သုးတၢ်သိၣ်တၢ်သီမီၤ.ခဲအံၤအမၤတၢ်န့ၣ်တတဲကျၢတၢ်ရ့လိၥ်မုၥ်လိၥ်ဝဲၤဒၢး,တတဲကျၢပှၤဘၣ်မူဘၣ်ဒါဘၣ်,တၢ်ဂ့ၢ်ကီကဲထီၣ်မးလီၤဘၣ်က့ၤလၢတၢ်ကရၢကရိအခိၣ်လိၤ.အနီၢ်ကီၢ်မ့ဖီၣ်မ့မၤတမံၤဂ့ၤတမံၤဂ့ၤကဘၣ်တဲကျၢ(တၢ်ရ့လိၥ်မုၥ်လိၥ်ဝဲၤဒၢး),ပမ့တဲမးအဝဲသ့ၣ်မၤသ့မီၤ.ခဲအံၤအဝဲသ့ၣ်မၤလၢအကစၢ်သး တၢ်ဂ့ၢ်ကီထီၣ်မးလီၤက့ၤလၢပခိၣ်လိၤ.”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးဘၣ်ဃးတၢ်ဂ့ၢ်လၢအဟဲကဲထီၣ်သးအံၤတဖၣ် တဘၣ်ဃးဒီးကညီတၢ်မုၥ်တၢ်ခုၣ်ကီၣ်ကးကရၢ(PC)တၢ်ကရၢကရိ ဘၣ်ဒီး မ့မ့ၢ်တခီတချုုးတၢ်ဖီၣ်က့ၤကိးကမျၢၢ်တဂၤအံၤဒံးဘၣ်အခါခီဖျိ(ရာအိမ်မှူး)မၤဒၢၣ်ထိဖှိၣ်ဝဲအဃိသံဝဲအဂ့ၢ်န့ၣ် ကမျၢၢ်လၢ အိၣ်ဘူးဖဲန့ၣ်တဖၣ်ပဲၥ်ထံနီၤဖးဝဲအိၣ်ဘၣ်ဆၣ်လၢကပၥ်ဂၢၢ်ပၥ်ကျၢၤတၢ်ဂ့ၢ်အံၤလီၤတံၢ်လီၤဆဲးလီၤအဂီၢ် ပခ့ၣ်အဲးစံၣ်- ကညီတၢ် ကစီၣ်ဃုသ့ၣ်ညါဝဲအဖၢမုၢ်န့ၣ်လီၤ.
တကးဒံးဘၣ်လၢတၢ်ကသ့ၣ်ညါအါထီၣ်ဘၣ်ကမျၢၢ်လၢအသံတဂၤအံၤအသံခီဖျိမနုၤတၢ်ဂ့ၢ်လဲၣ်ဒီးပှၤလၢအမၤကမၣ်တၢ်တဖၣ်တၢ်ကဟံထီၣ်ဖီၣ်ထီၣ်ဂ့ၢ်ဝီလီၤတံၢ်လီၤဆဲးအဂီၢ် ခီဖျိကမျၢၢ်လၢအသံတဂၤအံၤ အဟံၣ်ဖိဃီဖိတအဲၣ်ဒိးမၤထီထီၣ်တၢ်ဂ့ၢ်တၢ်ကျိၤ ဘၣ်အဃိ ဖဲမဟါလါအီကူး ၂၇ သီအနံၤန့ၣ် ဘၣ်တၢ်ပၥ်လီၤကွံၥ်အစိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် (KNU/KNLA-PC)သုးခိၣ်ကိၤနဲၤအံၤ တမ့ၢ်ကညီကလုၥ်ဘၣ် မ့မ့ၢ်တခီမ့ၢ်ဝဲပယီၤ ကလုၥ်တဂၤအသိး မ့ၢ်စ့ၢ်ကီးဝဲဒၣ် ပှၤမၤအီၣ်မုၢ်ကျိၤဝဲၤကွၥ်ဖိတဂၤ အဂ့ၢ်န့ၣ်လီၤ.
ဒ်န့ၣ်အသိးကဝီၤဒ့(၄)တဘ့ၣ်ဃီလၢတၢ်ကဲထီၣ်သးခဲအံၤန့ၣ်စ့ၢ်ကီး ဖဲမဟါလါအီကူး ၁၇ သီ ဟါခီ ၈း၀၀ နၣ်ရံၣ်ဃၣ်ဃၣ် အဆၢကတီၢ် လၢပှၤဘံးပှၤလိၤပှၤယီၢ်(အနှိပ်ခန်း)ကျးပူၤ ပှၤနီစဲးကၢးဖိ(၂)ဂၤအကျါတဂၤလဲၤဒီးခးသံကွံၥ်ဝဲ ကျးကစၢ်အဒီ မါဝၤ (၂)ဂၤလၢအသးနံၣ်ကအိၣ်(၃၀)ခိၣ်ဃၢၤဃုၥ်ဒီး အဖိခွါ(၂)နံၣ်ဘျဲၣ်တဂၤကဲထီၣ်ဒံးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်တၢ်ကဲထီၣ်သးဘျီဝဲအံၤမ့မ့ၢ်ပှၤလဲၤခးသံတၢ်ဖိ(၂)ဂၤခီန့ၣ်တုၤလၢခဲအံၤလီၢ်ကဝီၤပှၤဘၣ်မူဘၣ်ဒါလူၤဖီၣ်ဝဲတန့ၢ်ဒံး အဂ့ၢ်န့ၣ် လီၢ်ကဝီၤတၢ်ကစီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
မၠၣ်ဝတံၣ်ဝ့ၢ်လၢအိၣ်သူမှဲကျိတခီတဝၢ်ဝၢ်ဒီးကီၢ်ကၠီၣ်တဲၣ် မဲၢ်ဆီးဝ့ၢ်အံၤန့ၣ် သုးမီၤစိရိၤစုတီၤဖီလၥ်အပှၤအမဲၥ်ညါ ကညီသုးခိး ကီၢ်ဆၢ(BGF), တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဒီး ကညီတၢ်မုၥ်တၢ်ခုၣ်ကီၣ်ကးကရၢ (PC)ဖီၣ်စုကဝဲၤ ကရူၢ် ကရၢတဖၣ် အိၣ်ဆီလီၤသးဟူးဂဲၤဝဲဒီး လီၤဆီဒၣ်တၢ်(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံ တၢ်မၤသံမၤဝီလိၥ်သးလၢတၢ်ဖီၣ် က့ၤအမိၢ်လံၤမိၢ်ပှၢ်တဘၣ်ဘၣ်တၢ်ဂ့ၢ်အမဲၥ်ညါတၢ်ဟုၣ်တၢ်ဘျၣ်စ့ၢ်ကီးအါထီၣ်ဝဲကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
