လါအီကူး ၁၁ သီ, ၂၀၂၅ နံၣ်, ခ့ၣ်အဲးစံၣ်
ဖဲမဟါလါအီကူး ၁၀ သီ ဟါခီ ၇း၄၇ မံးနံးတုၤလၢ ၈း၁၀ မံးနံးအဆၢကတီၢ် သုးမီၤစိရိၤအကဘီယူၤလဲၤတ့ၢ်လီၤမ့ၣ်ပိၢ်တဖၣ် လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ဝဲၤလီၢ်ခိၣ်သ့ၣ်တၢ်လီၢ် အဃိ ဘၣ်ဒိတဂၤဒီး တၢ်သူၣ်ထီၣ်ဟးဂီၤဝဲအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးမီၤစိရိၤ(Y12)အကဘီယူၤဟဲတ့ၢ်လီၤမ့ၣ်ပိၢ်လၢ(သုးက့ ၇)သုးဝဲၤလီၢ်ခိၣ်သ့ၣ်ဘျီဝဲအံၤ တ့ၢ်လီၤဝဲမ့ၣ်ပိၢ်(၆)ဘျီကအိၣ် လၢ အဖျၢၣ် (၂၀)ဘျဲၣ် လီၤတဲၥ်ပိၢ်ဖးထီၣ်ဝဲလၢကျိၣ်ယီၢ်လ့ခိၣ်ဃၢၤတကပၤအဃိ ဘၣ်ဒိ(၁)ဂၤဒီးဟံၣ်ဃီတၢ်သူၣ်ထီၣ်, ခိသွဲဝဲၤဒၢး ဟးဂီၤဝဲအိၣ် အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤ စံးဝဲဒ်အံၤန့ၣ်လီၤ.
အဝဲစံးဝဲလၢ“ကဘီယူၤဟဲခးလီၤတၢ်ဘျီဝဲအံၤတ့ၢ်လီၤဝဲမ့ၣ်ပိၢ်ခဲလၢၥ်(၂၇)ဖျၢၣ်.ပှၤဘၣ်ဒိဒုအိၣ်တဂၤလီၤ. မ့ဝံၤအဘၣ်ဟးဂီၤဝဲ တၢ်ဆါဟံၣ် တစဲးတမွဲးဒီး ခိသွဲရူတစဲးဖိဒ်န့ၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ် -ကညီတၢ်ကစီၣ်ဖဲတဂီၤအံၤန့ၣ်လီၤ.
ဘၣ်ဃးတၢ်ကဲထီၣ်သးဘျီဝဲအံၤဒ်သိးကသ့ၣ်ညါဘၣ်တၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤတၢ်အိၣ်သးလီၤတံၢ်လီၤဆဲးအဂီၢ်န့ၣ် ပခ့ၣ်အဲၣ်စံၣ်-ကညီတၢ်ကစီၣ် ဆဲးကျိးဝဲခ့ၣ်အဲၣ်ယူၣ်/သုးက့ ပှၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်ဘၣ်တုၤလၢခဲအံၤ န့ၣ်လီၤ.
ဟီၣ်ကဝီၤဖဲန့ၣ်အပူၤ တချုးသုးမီၤစိရိၤကဘီယူၤလဲၤခးလီၤတၢ်ကဲထီၣ်ဒံးဘၣ်အခါန့ၣ် (KNLA)သုးဖိသံၣ်ဖိဃုၥ်ဒီး ကမျၢၢ် လၢအိၣ်ဖဲန့ၣ်တဖၣ်နၢ်ဟူစိဃၥ်ဝဲတၢ်ကစီၣ်လၢကဘီယူၤကဟဲခးလီၤတၢ်အဃိ တနီၤန့ၣ်ဟးပလဲၥ်သးစိဃၥ်သးလၢ တၢ်ဘံၣ် တၢ်ဘၢလီၢ်အိၣ်န့ၣ်လီၤ.
ဘၣ်ဆၣ်ကဘီယူၤဟဲခးလီၤတၢ်ဘျီဝဲအံၤလၢတၢ်တပၥ်သူၣ်ပၥ်သးပူၤ ဟဲတ့ၢ်လီၤဝဲမ့ၣ်ပိၢ်အါအါဂီၢ်ဂီၢ်ဒ်အံၤအဖီခိၣ် ကမျၢၢ်ဃုၥ်ဒီး ပှၤကၠိဖိလၢအိၣ်ဘူးတၢ်လီၢ်ဖဲန့ၣ်အခိၣ်အဃၢၤတဖၣ်ဃ့ၢ်ထီၣ်ဝဲဆူထံဝၢ်ခီ ကီၢ်ကၠီၣ်တဲၣ် မဲၢ်တရံးတကပၤအါအါဂီၢ်ဂီၢ်လၢမုၢ်ခံး တၢ်နၤဒီးဖဲတဂီၤအံၤကမျၢၢ်တနီၤက့ၤခီဃီၤကဒါလၢန့ၣ်တကပၤအိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢကဟဲခဲမုၢ်ဆ့ၣ်လါအီကူး ၁၂ သီအံၤ မ့ၢ်ဝဲကညီပှၤဒူပှၤဃိးမၤထူရၤမုၢ်နံၤပှဲၤထီၣ်(၇၅)ဝီတဝီ အဖီခိၣ် တၢ်လဲၤတ့ၢ်လီၤ မ့ၣ်ပိၢ်အံၤကမ့ၢ်တၢ်ဟ့ၣ်တၢ်ပလီၢ်တခါသ့ဝဲအသိး တကီၢ်ခါခဲအံၤပယီၤသုးကလၢၤလၢအိၣ်ကီၢ်ကၠီၣ်တဲၣ်-ကီၢ်ပယီၤ ထံဆၢကတီၢ်ဆၢတၢ်လီၢ်တဖၣ်စ့ၢ်ကီး တၢ်ထီၣ်န့ၢ်ဝဲခဲလၢၥ်ဃၣ်ဃၣ်လံအဃိ လၢတၢ်သးတမံအဖီခိၣ် ဘၣ်လဲၤခးလီၤတၢ်အံၤ သ့ဝဲ အဂ့ၢ်န့ၣ် တၢ်ပဲၥ်ထံနီၤဖးစံးဝဲအိၣ်န့ၣ်လီၤ.
(သုးက့ ၇)လီၢ်ခၢၣ်သးသးသုးဝဲၤလီၢ်ခိၣ်သ့ၣ်ဟီၣ်ကဝီၤအခိၣ်အဃၢၤတၢ်လီၢ်လၢသုးမီၤစိရိၤကဘီယူၤဟဲတ့ၢ်လီၤတၢ်ဘျီဝဲၤအံၤ အပူၤကွံၥ် စးထီၣ်ဖဲ(၂၀၂၄) လါအီးကထိဘၢၣ် တဘျီ, တနံၣ်အံၤ(၂၀၂၅)လါယနူၤအါရံၤ တဘျီ, လါမးရှး တဘျီ, လါယူၤ ၁၂ သီ တဘျီ တၢ်လဲၤတ့ၢ်လီၤဝဲဒီး(Kamikazi) ဒြိ မ့ၣ်ပိၢ်စုၥ်စုၥ်ကဲထီၣ်ဝဲဒံးဘၣ်ဆၣ် မ့မ့ၢ်တၢ်ဟဲခးလီၤတၢ်ဒီးကဘီယူၤဒ်အံၤမ့ၢ်တၢ်အဆိ ကတၢၢ်တဘျီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤဟီၣ်ကဝီၤဒူသဝီတၢ်လီၢ်လၢအိၣ်ဘူးဖဲန့ၣ်အပူၤတဖၣ်ခီဖျိလၢမဟါကဘီယူၤလဲၤတ့ၢ်လီၤမ့ၣ်ပိၢ်ဒိၣ်ဒိၣ်မုၢ်မုၢ်အံၤအဃိ ကမျၢၢ်တဖၣ်ဘၣ်အိၣ်လၢတၢ်ပျံၤတၢ်ဖုးဒီးကၠိစ့ၢ်ကီးဘၣ်တၢ်ပံးဃၥ်ဝဲခဲလၢၥ်ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူ ဘၣ်ဒါအအိၣ်န့ၣ်လီၤ.
