လါစဲးပထ့ဘၢၣ် ၅သီ, ၂၀၂၅နံၣ်, ခ့ၣ်အဲးစံၣ်,
တနံၣ်အံၤ(၂၀၂၅)နံၣ်လၢၥ်လါဒံၣ်စဲဘၢၣ်အပူၤသုးကီၣ်ကးတီခိၣ်ရိၣ်မဲကမၤဝဲတၢ်ဃုထၢအဂီၢ်,ဒိးသန့ၤထီၣ်သးလၢကမျၢၢ်တၢ်ပၥ်သူၣ်ပၥ်သးအဖီခိၣ်ကပၣ်ဃုၥ်ပၣ်ဂီၢ်ဝဲဒ်အကြၢးဝဲဘၣ်ဝဲအသိးအဂ့ၢ်,သုးခိးကီၢ်ဆၢ(BGF)ခိၣ်နၢ်တဖၣ်စံးဝဲဒၣ်န့ၣ်လီၤ.
တၢ်ဃုထၢအံၤတဘၣ်ထွဲဒီးသုးဂ့ၢ်ဝီဘၣ်အဃိကမျၢၢ်ပၣ်ဃုၥ်ပၣ်ဂီၢ်လၢတၢ်ထၢနုၥ်တၢ်ဖးမ့အိၣ်,ဒ်သိးတၢ်တြီမၤတံၥ်တၥ်သုတအိၣ်တဂ့ၤအဂီၢ်ကဟံးန့ၢ်ဝဲတၢ်ဘံၣ်တၢ်ဘၢအဂ့ၢ်,(BGF)သုးဟီၣ်ကဝီၤ(၂)အခိၣ်သုးခိၣ်ကျၢၢ်ဖိစီၤတ့ၤဝ့စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“တၢ်ဃုထၢတခါအံၤန့ၣ်တဘၣ်ဃးဒီးသုးဂ့ၢ်ဝီဘၣ်အဃိန့ၣ်ပကွၢ်လၢကမျၢၢ်လီၤ.ကမျၢၢ်သးမ့ဆူၣ်လၢကထၢနုၥ်မဲခီပလဲၤတြီအီၤတသ့ဘၣ်,ကမျၢၢ်တၢ်ဘၣ်သးမ့အိၣ်လၢအကဆွံမဲမနုၤမတၤခီန့ၣ်ပဆိၣ်မိၣ်လၢဒ်သိးသုတကဲထီၣ်တၢ်တြီမၤတံၥ်တၥ်တအိၣ်တဂ့ၤအဂီၢ်အိၣ်ဒၣ်ပကကွၢ်ထွဲအဝဲသ့ၣ်လၢတၢ်ဘံၣ်တၢ်ဘၢတကပၤလီၤ.တၢ်ဃုထၢအံၤပကမၤသကိးတၢ်ဒီးသုးကီၣ်ကးလၢအဂၤလီၤဆီခီတအိၣ်ဘၣ်.နါက့တၢ်ဃုထၢအံၤတၢ်ကမၤအီၤဒၣ်လၢခူပူၤဝ့ၢ်ပူၤလၢသုးကီၣ်ကးဖီၣ်ဝဲတုၤတၢ်လီၢ်တၢ်ကျဲတဖၣ်န့ၣ်လီၤမ့မ့ၢ်လၢဖီၣ်ဝဲတတုၤတၢ်လီၢ်သ့ၣ်တဖၣ်ခီမၤဝဲတသ့ဘၣ်”အဂ့ၢ်စံးဝဲဒၣ်န့ၣ်လီၤ.
သုးကီၣ်ကးအတၢ်ဃုထၢအံၤမ့ၢ်ဝဲတၢ်လၢအကဆှၢဝဲခါဆူညါထံရူၢ်ဒံၣ်မိၣ်ကရံၣ်စံၣ်သနူအဃိ,ကဒုးအိၣ်ထီၣ်ကမျၢၢ်တၢ်ဘံၣ်တၢ်ဘၢတၢ်မုၥ်တၢ်ခုၣ်တၢ်အိၣ်မူအိၣ်ဂဲၤအဂီၢ်နၢ်ပၢၢ်ဒီးတူၢ်လိၥ်ဝဲလၢအရ့ဒိၣ်ဝဲအဂ့ၢ်,သုးခိးကီၢ်ဆၢ(BGF)ထုးထီၣ်ပၥ်ဖျါဝဲလံၥ်တဘ့ၣ်ဖဲတနံၤအံၤလါစဲးပထ့ဘၢၣ်(၅)သီအနံၤန့ၣ်လီၤ.
တကးဒံးဘၣ်,တၢ်ဃုထၢဘျီဝဲအံၤတနီၤဖးဝဲတၢ်အဒူၣ်အဆၢလၢထံရူၢ်ကီၢ်သဲးပၣ်တံၣ်တဖၣ်အဖီခိၣ်ဘၣ်ဒီးမ့မ့ၢ်တခီလၢတၢ်ထဲသိးတုၤသိးအပူၤကမၤစၢၤဝဲပှၤဟ့ၣ်တၢ်ဖး,မၤတၢ်ဃုထၢတဖၣ်လၢတၢ်ဒီသဒၢဝဲတၢ်ဘံၣ်တၢ်ဘၢအဂီၢ်အမဲၥ်ညါ,ဘၣ်ဃးဒီးတၢ်ဃုထၢအံၤ(BGF)ကရူၢ်ကရၢတူၢ်လိၥ်ဆီၣ်ထွဲဝဲလၢလၢပှဲၤပှဲၤအသိး,ဒ်သိးကမ့ၢ်ဝဲတၢ်ဃုထၢလၢပှၤကိးဂၤဒဲးပၣ်ဃုၥ်ပၣ်ဂီၢ်သ့ဝဲအဂီၢ်,ကဟံးဝဲတၢ်ဘံၣ်တၢ်ဘၢလၢကညီကီၢ်စဲၣ်ဟီၣ်ကဝီၤတဖၣ်အပူၤအဂ့ၢ်,ပၥ်ဖျါစ့ၢ်ကီးဝဲဒၣ်လၢလံၥ်ထုးထီၣ်ပၥ်ဖျါအပူၤန့ၣ်လီၤ.
သုးကီၣ်ကးအံၤကမၤဝဲတၢ်ဃုထၢအဂီၢ်နီၤဖးလီၤဝဲအကူၥ်တဖၣ်အိၣ်ဝဲဒီးအဆိကတၢၢ်တၢ်ဃုထၢအကူၥ်(၁)အံၤကစးထီၣ်မၤဝဲဖဲ(၂၀၂၅)နံၣ်လါဒံၣ်စဲဘၢၣ်(၂၈)သီအနံၤအပူၤအဂ့ၢ်,ဘိးဘၣ်ရၤလီၤတ့ၢ်ဝဲဖဲအပူၤကွံၥ်လါအီကူၥ်(၁၈)သီအနံၤန့ၣ်လီၤ.
ဒ်န့ၣ်အသိး,တၢ်ဘိးဘၣ်ရၤလီၤဝံၤအလီၢ်ခံစးထီၣ်မၤဝဲတၢ်မၤတၢ်ဟ့ၣ်တၢ်သ့ၣ်ညါနၢ်ပၢၢ်လၢအဘၣ်ဃးဒီး(တၢ်ဖးစဲးဖီကဟၣ်)(မြန်မာအီလက်ထရောနစ်မဲပေးစက်)(MEVM)တၢ်သ့တၢ်ဘၣ်လၢအတၢ်ပၢဟီၣ်ကဝီၤခူပူၤဝ့ၢ်ပူၤတဖၣ်အိၣ်ဝဲဒီး,အပူၤကွံၥ်လါအီကူၥ်(၂၆)သီအနံၤအပူၤစးထီၣ်မၤက့ၤဝဲလၢကညီကီၢ်စဲၣ်ဖၣ်အၣ်ကီၢ်ရ့ၣ်,ဖၣ်အၣ်ဝ့ၢ်ဟီၣ်ကဝီၤအပူၤတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,သုးကီၣ်ကးအတၢ်ဃုထၢအံၤမ့ၢ်ဒၣ်တၢ်အ(ယီၤ)အဘျၣ်လၢတၢ်မၤထီထီၣ်မီၤစိရိၤအသးသမူထီရီၤအဂီၢ်,တၢ်ဟံးန့ၢ်ဆူၣ်တၢ်စိတၢ်ကမီၤအံၤကဖိးသဲစးအဂီၢ်ဒီး,တၢ်ကမၤမူထီၣ်က့ၤ(၂၀၀၈)တၢ်ဘျၢခိၣ်သ့ၣ်အဂီၢ်အဂ့ၢ်,(KNU)ခိၣ်နၢ်ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢတၢ်န့ၣ်အဃိ,ဘၣ်ဃးဒီးသုးကီၣ်ကးအတၢ်ဃုထၢဘျီဝဲအံၤအဖီခိၣ်,ကညီဒီတကလုၥ်,ဖီၣ်စုကဝဲၤကရူၢ်ကရၢ,ကညီထံရူၢ်ကီၢ်သဲးကရၢ,ထံရူၢ်ကီၢ်သဲးပၣ်တံၣ်ခဲလၢၥ်ဒီးကမျၢၢ်ထံဖိကီၢ်ဖိသ့ၣ်တဖၣ်ကပၥ်ဝဲဒ်ဒီကလုၥ်မူဒါဒီးတဘၣ်ပၣ်ဃုၥ်ပၣ်ဂီၢ်ဘၣ်အမဲၥ်ညါကဘၣ်ပၣ်ဃုၥ်ဝဲလၢတၢ်ထီဒါတၢ်ဃုထၢတၢ်ရဲၣ်တၢ်ကျဲၤလၢတအိၣ်ဒီးတၢ်စုဆူၣ်ခီၣ်တကးအကျဲတဂ့ၤအဂ့ၢ်,(KNU)ဆီၣ်တခူဘိးဘၣ်ရၤလီၤတ့ၢ်ဝဲဖဲအပူၤကွံၥ်လါအီကူၥ်(၂၆)သီအနံၤအိၣ်ဝဲဒၣ်န့ၣ်လီၤ.
