လါစဲးပထ့ဘၢၣ် ၃သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်,တၢ်ကြဲၢ်ကီၢ်ဆၣ်ပံးတခးသဝီကရူၢ်,နီၣ်တၢၢ်ခံသဝီ,ကညီကူၣ်သ့ဆဲးလၤဝဲၤကျိၤ(KECD)တၢ်မၤလိကၠိအပူၤတနံၤအံၤလါစဲးပထ့ဘၢၣ်(၃)သီအနံၤအပူၤသုးကီၣ်ကးတ့ၢ်လီၤကၤမံးကၤစံၣ်ဒြိအဃိ,ကၠိသရၣ်သရၣ်မုၣ်ဒီးကၠိဖိခဲလၢၥ်(၃)ဂၤဘၣ်ဒိဘၣ်ထံးဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
နီၢ်တၢၢ်ခံသဝီ,နီၢ်ဂံၢ်(၇၀၈၂)ကီၢ်သူလ့ၤဂံၢ်ခီၣ်ထံးတီၤခၢၣ်သးတၢ်မၤလိကၠိအပူၤ,တနံၤအံၤ(၉)နၣ်ရံၣ်ခိၣ်ဃၢၤတၢ်သိၣ်လိမၤလိအဆၢကတီၢ်,ကၤမံၣ်ကၤစံၣ်ဒြိတဘ့ၣ်လီၤတဲၥ်ပိၢ်ဖးထီၣ်ဝဲအဃိ,ကၠိပူၤသရၣ်သရၣ်မုၣ်ဒီးကၠိဖိတဖၣ်ဘၣ်ဒိဘၣ်ထံးဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
“ဟဲထီၣ်န့ၣ်ပသ့ၣ်ညါဘၣ်သၢဘ့ၣ်,နါက့လီၤတဲၥ်တဘ့ၣ်လီၤ.ကၠိဖိ(၁)ဂၤကၠိသရၣ်(၁)ဂၤသရၣ်မုၣ်(၁)ဂၤဘၣ်ဒိဘၣ်ထံးဝဲန့ၣ်လီၤ.ကၠိတၢ်ဟးဂုၤဟးဂီၤအိၣ်တအိၣ်ဒုပတသ့ၣ်ညါဘၣ်ဒံးဘၣ်”အဂ့ၢ်စံးဝဲဒၣ်န့ၣ်လီၤ.
သုးကီၣ်ကးအံၤတ့ၢ်လီၤဝဲဒြိအဃိ,ပှၤကညီတၢ်ဘၣ်ဒိဘၣ်ထံးအိၣ်ဝဲအသိး,ကၠိဝဲၤဒၢးဒီးကၠိခိၣ်ဒုးတၢ်လီၢ်တၢ်ကျဲတဖၣ်ဟးဂီၤကွံၥ်ဝဲအဂ့ၢ်,သ့ၣ်ညါဘၣ်ဒ်ခ့ၣ်အဲၣ်ယူၣ်လီၢ်ခၢၣ်သးအတၢ်ပၥ်ဖျါအိၣ်ဝဲအသိးန့ၣ်လီၤ.
ဒ်န့ၣ်အသိး,သုးကီၣ်ကးအံၤဂီၤခီအဆၢကတီၢ်မၤဝဲဒြိတၢ်ထီၣ်ဒုးအိၣ်အသိး,မုၢ်ဃ့ၢ်လီၤအဆၢကတီၢ်စ့ၢ်ကီးကဘီယူၤဟးဆှၣ်တၢ်အဃိလီၢ်ကဝီၤကမျၢၢ်တဖၣ်အိၣ်ဒီးတၢ်ပျံၤတၢ်ဖုးအဂ့ၢ်,သ့ၣ်ညါဘၣ်ဒ်ကမျၢၢ်လီၢ်ကဝီၤဖိတဖၣ်စံးဝဲဒၣ်အသိးန့ၣ်လီၤ.
(၂၀၂၄)နံၣ်လၢၥ်ဒီး(၂၀၂၅)နံၥ်တဝၥ်အပူၤဖၣ်အၣ်ကီၢ်ရ့ၣ်ခ့ၣ်အဲၣ်ယူၣ်သုးက့(၇)ဟီၣ်ကဝီၤအပူၤ,ကညီတၢ်ထူၣ်ဖျဲးသုးမုၢ်ဒိၣ်(KNLA)ဝဲၤကျိၤဝဲၤဒ့တၢ်လီၢ်တၢ်ကျဲတဖၣ်အပူၤသုးကီၣ်ကးတ့ၢ်လီၤဝဲကၤမံးကၤစံၣ်ဒြိအိၣ်ဝဲတစှၤန့ၢ်(၃)ဘျီလံအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,အပူၤကွံၥ်လါအီကူၥ်အပူၤစ့ၢ်ကီးသုးကီၣ်ကးကဘီယူၤတ့ၢ်လီၤဝဲမ့ၣ်ပိၢ်တစှၤန့ၢ်အဖျၢၣ်(၂၀)လၢကျိၣ်ယီၢ်လ့တၢ်လီၢ်တၢ်ကျဲတဖၣ်အပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
