လါအီးကထိဘၢၣ် ၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်ဟီၣ်ကဝီၤ နိၣ်ဖိ,ထံမူထၣ်လီၢ်ကဝီၤဒူသဝီကမျၢၢ်လၢဃ့ၢ်ထီၣ်တဖၣ် ဖဲမဟါအနံၤန့ၣ် သုးခိးကီၢ်ဆၢ(BGF)သုးခိၣ်စီၤတ့ၤဝ့ အဟံၣ်ဖိဃီဖိလဲၤဟ့ၣ်လီၤဝဲတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
စးထီၣ်ဖဲအပူၤကွံၥ်လါစဲးပထ့ဘၢၣ်ထီၣ်အခါန့ၣ် ကီးတရံး-မၠၣ်ဝတံၣ်အ့ရှါကျဲလၢ(KNLA)သုးပၥ်ဖှိၣ်ဒိၣ်စိဝဲအံၤ ပယီၤသုး ဟဲက့ၤ ထီၣ်ဝဲန့ၢ်ဝံၤ လၢနိၣ်ဖိ,ထံမူထၣ်သဝီတကပၤဒီး လ့က့ၣ်ကိၥ်ဝ့ၢ်သီတကပၤန့ၣ် တၢ်ဒုးတၢ်ယၤက့ၤဆူၣ်ထီၣ်ကဒါဒီး ပယီၤသုးခး လီၤကျိဖးဒိၣ်အဃိ လီၢ်ကဝီၤဒူသဝီကမျၢၢ်လၢအိၣ်ဖဲန့ၣ်ပှၤနီၣ်ဂံၢ်လၢအကလးဘၣ်ဃ့ၢ်ထီၣ်ဝဲဒၣ်န့ၣ်လီၤ.
လီၤဆီဒၣ်တၢ်မ့မ့နိၣ်ဖိ,ထံမူထၣ်,ပီလီ,သၤပယီၤ,ခၠ့ၤတီၤသဝီ,ကမရၤသဝီ ကမျၢၢ်ပၥ်ဖှိၣ်(၂၅၀၀)ဃၣ်ဃၣ်လၢအလဲၤစံၣ်အိၣ်ဖဲ ကၠီၤခိၣ်,ကွံလ့,ကၢၢ်ဂီၤ,ထံခၠၣ်လါ,ထံလီၤသံးသ့ၣ်တဖၣ်အံၤန့ၣ် ဖဲမဟါလါအီးကထိဘၢၣ် ၅ သီအနံၤန့ၣ် BGF သုးဟီၣ်ကဝီၤ-၂ အခိၣ် သုးခိၣ်ကျၢၢ်ဖိ စီၤတ့ၤဝ့ ဒီး အမါ လဲၤဟ့ၣ်လီၤဝဲတၢ်ဆီၣ်ထွဲမၤစၢၤဝဲဂံၢ်ခီၣ်ထံးတၢ်အီၣ်တၢ်အီဒီးတၢ်ကူတၢ်သိး သ့ၣ်တဖၣ် အဂ့ၢ်န့ၣ် Hpa Ann View ပၥ်ဖျါဝဲလၢအ(facebook)ပူၤအသိး သ့ၣ်ညါဘၣ်န့ၣ်လီၤ.
လီၢ်ကဝီၤကမျၢၢ်လၢလဲၤဃ့ၢ်ထီၣ်ဖဲန့ၣ်သ့ၣ်တဖၣ်အါဒၣ်တက့ၢ်အကူအသိးအတၢ်ဖိတၢ်လံၤတပၣ်ဃုၥ်ဝဲဘၣ်ဒီး တကးဒံးဘၣ်ခဲအံၤ ဒူသဝီတၢ်လီၢ်လၢအဝဲသ့ၣ်အိၣ်အလီၢ်န့ၣ်စ့ၢ်ကီးတၢ်ဘၣ်ယိၣ်အိၣ်ဒံးအဃိပှၤလၢကဟဲထီၣ်ဃ့ၢ်ဒံး သ့ၣ်တဖၣ်ကဆဲး ဆီၣ်ထွဲမၤစၢၤဝဲအဂ့ၢ်န့ၣ် သုးခိၣ်စီၤတ့ၤဝ့ စံးဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် စးထီၣ်ဖဲတၢ်ဒုးက့ၤကဲထီၣ်ကဒါဖဲလ့က့ၣ်ကိၥ်ဟီၣ်ကဝီၤဒီးနိၣ်ဖိထံမူထၣ်သဝီအခါန့ၣ် ကမျၢၢ်ပှၤနီၣ်ဂံၢ်လၢအကလးဘၣ်ဃ့ၢ်ထီၣ်အကျါ မ့မ့ၢ်လ့က့ၣ်ကိၥ်ဟီၣ်ကဝီၤကမျၢၢ်ပှၤလီၢ်အိၣ်ဒုဖိအဂီၢ်န့ၣ် တၢ်ဆီလီၤပၥ်လီၤ ဝဲလီၢ်အိၣ်ကဒုလီၢ်(၈)တီၤဒီးလၢပှၤသ့ၣ်တဖၣ်အံၤအဂီၢ်လိၣ်ဘၣ်စ့ၢ်ကီးဝဲတၢ်ဆီၣ်ထွဲမၤစၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးခိၣ်စီၤတ့ၤဝ့ လၢအလဲၤဆီၣ်ထွဲမၤစၢၤကမျၢၢ်ပှၤလီၢ်အိၣ်ကဒုဖိသ့ၣ်တဖၣ်အံၤန့ၣ် ဖဲအပူၤကွံၥ်တနံၣ်အံၤလါမးရှး ဟီၣ်ခိၣ်ဟူး ကဲထီၣ်အခါဒီး လါယူၤလံ တၢ်စူၤထံဒိၣ်ဃိၣ်ယွၤအခါန့ၣ်စ့ၢ်ကီး ကမျၢၢ်လၢအသဂၢၢ်ဘၣ်ခိၣ်ဃၢၤန့ဆၢၣ်တၢ်တတၢၥ်တနါ သ့ၣ်တဖၣ်အံၤ အဝဲဆီၣ်ထွဲမၤလီၤဝဲစ့တကးဒံးဘၣ် ဖဲဟီၣ်ကဝီၤတၢ်အိၣ်သးတမုၥ်တခုၣ်ဘၣ်အကတီၢ်အံၤစ့ၢ်ကီး လၢတၢ်ဘူၣ် တၢ်ဘါ,ကူၣ်သ့ဒီးဆူၣ်ချ့ကမျၢၢ်ဖိဒံဖိသၣ်တၢ်လိၣ်ဘၣ်အဂီၢ် တ့ထီၣ်ဝဲကၠိ,တၢ်ဆါဟံၣ်သ့ၣ်တဖၣ်အိၣ်ဝဲဒၣ်န့ၣ်လီၤ.
လၢအတကပၤစ့ၢ်ကီး သုးခိၣ်စီၤတ့ၤဝ့ ဃုၥ်ဒီးစီၤခၠ့ၣ်သူၤ သ့ၣ်တဖၣ်အံၤ လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကၠါဖၠၣ် တၢ်ဖံးတၢ်မၤဒီး(အီၤလါ)တၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤအပူၤန့ၣ် ဘၣ်တၢ်ဖီၣ်ဃံးအဝဲသ့ၣ်လၢ အမဲရကၤထံကီၢ်ဒီး ယူရပၤကီၣ်ကး(EU)သ့ၣ်တဖၣ်အံၤန့ၣ်လီၤ.
၂၀၂၁ ဝံၤလီၢ်ခံတၢ်ဒုးတၢ်ယၤကဲထီၣ်,ကမျၢၢ်ထံဖိကီၢ်ဖိစ့ၢ်ကီးဘၣ်ဃ့ၢ်မှံဟးဖျိး,ဘၣ်သံဘၣ်ပှၢ်အဃိ ဟီၣ်ကဝီၤပူၤတၢ်မုၥ်တၢ်ခုၣ် ကအိၣ်အဂီၢ်ဖဲအပူၤကွံၥ်လါယူၤလံ ဒီး လါစဲးပထ့ဘၢၣ် ၃၀ သီအခါန့ၣ် ဒ် သုးခိးကီၢ်ဆၢ(BGF), တၢ်ဘၣ်ဘျုးဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA),တၢ်မုၥ်တၢ်ခုၣ်ကီၣ်ကးကရၢ(PC) ဒီး တၢ်ဘူၣ်တၢ်ဘါ ခိၣ်နၢ်ကမျၢၢ် ပၥ်ဖှိၣ်မၤဝဲတၢ်ဃ့ဘါထုကဖၣ် တၢ်ရဲၣ်တၢ်ကျဲၤအံၤဒံးန့ၣ်လီၤ.
