လါအီးကထိဘၢၣ် ၁၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄) မ့ပၠ့ၤသဝီအပူၤ ပယီၤသုးလၢအနုၥ်လီၤအိၣ်ဆီသးဖဲန့ၣ်တဖၣ်ဒွဲၣ်အူအီၣ်ကဒီးဝဲ ပှၤသဝီဖိအ ဟံၣ်တစှၤန့ၢ်(၁၀)ဖျၢၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
ဖဲအပူၤကွံၥ်လါအီးကထိဘၢၣ် ၁၃ သီ ဟါခီအဆၢကတီၢ်န့ၣ် ပယီၤသုးလၢအအိၣ်ဖဲပလၣ်ဝ့ၢ်ဃၢၤ မ့ပၠ့ၤ(မင်းပြင်)သဝီပူၤတဖၣ်အံၤ နုၥ်လီၤဒွဲၣ် အူအီၣ်ကဒီးဝဲသဝီဖိလၢအဃ့ၢ်ထီၣ်ဟးပလဲၥ်သးသ့ၣ်တဖၣ်အံၤအဟံၣ်အဃီအဂ့ၢ်န့ၣ် လီၢ်ကဝီၤသဝီဖိလၢအိၣ်ဘူးဖဲန့ၣ် တဂၤ စံးဘၣ်ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တုၤလၢခဲအံၤပယီၤသုးအိၣ်ဒံးဖဲသဝီပူၤလီၤ.သဝီလၢအိၣ်ဖဲန့ၣ်တဖၣ်န့ၣ်အပူၤကွံၥ်လၢညါတဘျီပယီၤသုးကျိၤဟဲထီၣ်အခါ အဝဲသ့ၣ်စံၣ်ထီၣ်ဒီတသဝီလီၤ.ဟံၣ်အိၣ်ဖဲန့ၣ်တဖၣ်န့ၣ်ကွၢ်လၢပယီၤသုးအဲၣ်ဒိးဒွဲၣ်အူအီၣ်ဝဲန့ၣ်ဒွဲၣ်ဝဲလီၤ.ဒွဲၣ်အူဝဲကအိၣ်လၢအဖျၢၣ်(၁၀)လံ” အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤလၢ(မ့ပၠ့ၤ)သဝီအပူၤန့ၣ် တၢ်ဒုးဆဲးကဲထီၣ်ဒံးဝဲလၢပယီၤသုးဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်အဘၢၣ်စၢၤဒီး တၢ်သံတၢ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် တၢ်ပၢၢ်ဆၢကရူၢ်အပှၤတဂၤ စံးဝဲဒ်အံၤန့ၣ်လီၤ.
“ဖဲအပူၤကွံၥ်လါစဲးပထ့ဘၢၣ်လၢၤအခါန့ၣ်ပယီၤသုးကျိၤတဖၣ်ဟဲထီၣ်ဒီး ဒွဲၣ်အူအီၣ်ကွံၥ်ပှၤဟံၣ်ပှၤဃီ.တၢ်တဘျီန့ၣ်အခါန့ၣ်ပပှၤသံဒံး တဂၤဒံး.အဃိတုၤလၢခဲအံၤခံခီခံကပၤအဘၢၣ်စၢၤအိၣ်ဒံးလၢတၢ်ဖ့ၣ်စၢအပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးကျိၤလၢအနုၥ်လီၤသ့ၣ်တဖၣ်အံၤအိၣ်ဟဲထီၣ်ဝဲလၢ(ပလၣ်ဝ့ၢ်)တကပၤဒီး နုၥ်လီၤအိၣ်ဆီလီၤသးလၢ(မ့ပၠ့ၤ)သဝီပူၤဝံၤ ဒွဲၣ်အူအီၣ်မၤဟးဂီၤဝဲကမျၢၢ်ဟံၣ်ကဲထီၣ်ဝဲတလီၢ်လီၢ်အဂ့ၢ်န့ၣ် ပှၤလၢအမၤစၢၤပှၤလီၢ်အိၣ်ကမှံဖိတဖၣ်စံးဝဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါအီးကထိဘၢၣ် ၁၃ သီ ဂီၤခီ ၁၀ နၣ်ရံၣ်အဆၢကတီၢ်န့ၣ်စ့ၢ်ကီး အမျိၥ်သုး(၃၀၂)သုးရ့ၣ်လၢအနီၣ်ဂံၢ်ကအိၣ် (၁၀၀)ဃၣ်ဃၣ်လၢအိၣ်မီၤမဲၤစှီၤ (မောင်မယ်ရှောင်)သဝီပူၤအံၤတဖၣ် လၢကဆှၢထီၣ်ကျိချံပှၥ်သၣ်အဂီၢ်ဖဲအဝဲသ့ၣ်ဟးထီၣ်အခါ ခီဖျိ တၢ်ပၢၢ်ဆၢသုးပၥ်ဖှိၣ်ကရူၢ်ခိးခးဝဲလၢတၢ်ဘၢၣ်စၢၤအဃိ သံဒံးဝဲ(၅)ဂၤအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးကရူၢ်အအိၣ် န့ၣ်လီၤ.
