လါအီးကထိဘၢၣ် ၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ် ကရၢ လူပျဲၢ်ကီၢ်ဆၣ်,နိၣ်နဲၣ်သဝီကရူၢ်အပူၤ လီၢ်ကဝီၤပိၥ်မုၣ်တဂၤလၢအမ့ၢ်နီၢ်ဆံးဖိတဂၤ ဒုးကွၢ်လုၢ်အဖိလၢပှၤစုပူၤဝံၤအလီၢ်ခံ တုၤခဲအံၤတန့ၢ်တၢ်ဆဲးကျိးဒီးအဖိဒံးဘၣ်အဖီခိၣ် ဟဲတီၣ်ထီၣ်ဝဲဒၣ်တၢ်ဂ့ၢ်လၢ လီၢ်ကဝီၤ ကညီဒီကလုၥ်ပၢၤကီၢ်သုးအအိၣ်အဂ့ၢ် သ့ၣ်ညါဘၣ်လၢ လူၢ်ပျဲၢ်ကီၢ်ဆၣ် ပၢၤကီၢ်အပှၤဘၣ်မူဘၣ်ဒါအအိၣ်န့ၣ်လီၤ.
ကမျၢၢ်ပိၥ်မုၣ်လၢအမ့ၢ်နီၢ်ဆံးဖိအံၤ အိၣ်ဝဲဒၣ်လၢ သုးက့(၁),ဒူသထူၣ်ကီၢ်ရ့ၣ်,ဘံလ့ကီၢ်ဆၣ်တကပၤဒီးခီဖျိတၢ်အိၣ်သးအဖီခိၣ်သုးလီၢ်သုးကျဲ ဟဲအိၣ်ဝဲဒၣ်ဖဲ သုးက့(၇),ဖၣ်အၣ်ကီၢ်ရ့ၣ်,လူၢ်ပျဲကီၢ်ဆၣ်အပူၤဃုၥ်ဒီးအဟံၣ်ဖိဃီဖိဒီးအဖိခဲလၢၥ်အိၣ်ဝဲ(၇)ဂၤအဂ့ၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ်(၂၀၂၂)နံၣ်လါဖ့ၤဘြူၤအါရံၤ(၂၃)သီအနံၤအဆၢကတီၢ်န့ၣ် ခီဖျိပှၤလၢတၢ်ဘၢၣ်စၢၤတဂၤတဲအီၤလၢကီၢ်ကၠီၣ်တဲၢ်ဝ့ၢ်ဘီကီးအပူၤန့ၣ် သ့ၣ်ခိၣ်လၢအဲၣ်ဒိးကွၢ်လုၢ်ပှၤဖိအိၣ်ဝဲအဖီခိၣ် မၤဝဲဒၣ်လံၥ်ဃံးဃၥ်ဝံၤဒီးဟ့ၣ်လီၤဝဲအဖိဝံၤတုၤခဲအံၤန့ၢ်သၢနံၣ်ဘျဲၣ်လံဘၣ်ဆၣ်တဒိးန့ၢ်ဘၣ်တၢ်ဆဲးကျိးဒီးအဖိဘၣ်အဃိဟဲတီၣ်ဖျါထီၣ်ဝဲတၢ်ဂ့ၢ်တၢ်ကျိၤအိၣ်ဝဲဒၣ်အဂ့ၢ် KNU ဖၣ်အၣ်ကီၣ်ရ့ၣ်,လူၢ်ပျဲၢ်ကီၢ်ဆၣ် ပၢၤကီၢ်ခိၣ်ခံ သုးခိၣ်ဖိစီၤကၠ့ၤခံ စံးဘၣ်ဝဲဒၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲဒၣ်လၢ“မုဂါဝဲန့ၣ်အမံၤလၢနီၢ်ဆံးဖိန့ၣ်လီၤ.(နီၢ်တ….)ကွၢ်ဝဲဒၣ်လၢနီၢ်ဆံးဖိဟံၣ်ဖိဃီဖိန့ၣ်တဘၣ်ဂီၢ်ဘၣ်ဒီး လဲၤတဲဝဲလၢ လၢဝ့ၢ်ဘီကီးပူၤန့ၣ်ပှၤကွၢ်လုၢ်ပှၤဖိသ့ၣ်ခိၣ်အိၣ်တဂၤ,သ့ၣ်ခိၣ်ဝဲန့ၣ်မ့ၢ်စ့ၢ်ကီးပှၤဖဲနိၣ်နဲၣ်ဟီၣ်ကဝီၤလီၤ.အဝဲခီန့ၣ်တဟဲက့ၤလၢအနီၢ်ကစၢ်ဘၣ်.လၢတၢ်ဘၢၣ်စၢၤန့ၣ်(နီၢ်တ….)ကျဲၤန့ၢ်ဝဲဒၣ်န့ၣ်လီၤ.မၤဝဲဒီးလံၥ်ဃံးဃၥ်မူၤနီၢ်ဝံၤဆှၢထီၣ်ဝဲဆူသ့ၣ်ခိၣ်အအိၣ်န့ၣ်လီၤ.ဖဲန့ၣ်တၢ်ဟ့ၣ်လီၤအီၤအကလီၢ်(၂၀)ကၠးသနၥ်က့အဝဲတဲယၤလၢဒိးန့ၢ်ဘၣ်ဝဲ(၁၅)ကလီၢ်လီၤ.တၢ်ဂ့ၢ်သ့ၣ်တဖၣ်အံၤန့ၣ်မ့ၢ်ဝဲယနၢ်ဟူဘၣ်လၢနီၢ်ဆံးဖိအိၣ်တကပၤလီၤ.လၢအဝဲတကပၤခဲမဆ့ၣ်န့ၣ်ပကိးထံၣ်လိၥ်သးဒီးအဝဲသ့ၣ်န့ၣ်လီၤ.တမ့ၢ်လၢတၢ်ဂ့ၢ်လီၤတံၢ်ဒံးဘၣ်.ပကဘၣ်မၤလီၤတံၢ်အါထီၣ်အီၤဒံးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဒ်လီၢ်ကဝီၤပိၥ်မုၣ်လၢအဖိလီၤမၢ်ဒီးလဲၤပၥ်ဖျါထီၣ်ဝဲလၢ ကညီဒီကလုၥ်ပၢၤကီၢ်အအိၣ်ဒီး ကညီဒီကလုၥ်ပၢၤကီၢ်ပၥ်ဖျါဝဲဒၣ်အသိးန့ၣ် လၢတၢ်ဟ့ၣ်ကွၢ်လုၢ်အဖိဆူပှၤစုပူၤဘျီဝဲအံၤန့ၣ်အိၣ်ဒီးလံၥ်အုၣ်သး,မုၢ်နံၤမုၢ်သီန့ၣ်ဖဲ(၂၀၂၂)နံၣ်လါဖြ့ၤဘြူၤအါရံၤ(၂၃)သီ, လံၥ်ဃံးဃံၥ်ပူၤလဲၤမ့ၢ်တုၤလၢန့ၣ် န့ၣ် ကဘၣ်ဒုးတဲတၢ်ဒီးဟံၣ်ဖိဃီဖိ(၁)လါမ့တမ့ၢ်(၂)လါတဘျီ,ပၣ်ဃုၥ်ဒီးပှၤအုၣ်ကီၤတၢ်(၅)ဂၤ, အဆိကတၢၢ်န့ၣ် ဟ့ၣ်ဒုစိဝဲလၢအဖိမုၣ်လၢအဆံးတဂၤဒီးဖဲန့ၣ်အခါန့ၣ်အသးနံၣ်အိၣ်(၁၁)နံၣ်,မၤကဒီး(၂)လါဃၣ်ဃၣ်ဝံၤအလီၢ်ခံ ပှၤလၢတၢ်ဘၢၣ်စၢၤတဂၤန့ၣ်ဟဲတဲအီၤလၢအဖိမုၣ်ဆံးတဂၤန့ၣ်အိၣ်ဝဲတဂၤတမုၥ်ဘၣ်ဒီးမၢအနီလဲၤထီၣ်အိၣ်ဒီးအီၤအဃိအနီလၢအဒိၣ်တဂၤလဲၤထီၣ်ကဒါဒီးဖဲန့ၣ်အခါအသးနံၣ်အိၣ်(၁၃)နံၣ်ဒီးတၢ်န့ၣ်ဝံၤအလီၢ်ခံ တုၤခဲအံၤတန့ၢ်တၢ်ဆဲးကျိးဒီးအမိလၢၤဘၣ်အဂ့ၢ် စံးဝဲဒၣ်န့ၣ်လီၤ.
လၢန့ၣ်အမဲၥ်ညါဒ်သိးကဒိးန့ၢ်ဘၣ်ခံခီခံကပၤ တၢ်ပၥ်ဖျါအဂီၢ် ခါလၢကဟဲလါအီးကထိဘၢၣ်အသီ(၁၀)အနံၤန့ၣ် ကကိးထံၣ်ဝဲဒၣ်ပှၤလၢအအုၣ်ကီၤသး(၅)ဂၤသ့ၣ်တဖၣ်အဂ့ၢ် ခ့ၣ်အဲၣ်ယူၣ်,လူၢ်ပျဲၢ်ကီၢ်ဆၣ်,ပၢၤကီၢ်ခိၣ်ခံ သုးခိၣ်ဖိစီၤကၠ့ၤခံတဲအါထီၣ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီမ့ၢ်ကွၢ်ကဒါက့ၤဖိသၣ်မုၣ်လၢအတၢ်ဆဲးဒီးကျိးလီၤမၢ်ဒီးအမိ ခံဂၤအံၤ အဟးထီၣ်တၢ်ဆၢကတီၢ်အသးနံၣ်ဒီးအခဲအံၤန့ၣ် ဖိသၣ်မုၣ်လၢအဒိၣ်တဂၤန့ၣ်အခဲအံၤကအိၣ်ဝဲဒၣ်(၁၆)နံၣ်ဒီးအဆံးတဂၤန့ၣ်ကအိၣ်ဝဲဒၣ်(၁၄)နံၣ်န့ၣ်လီၤ.
ဒ်န့ၣ်အသိးတကီၢ်ခါခဲအံၤ လၢ(Social Media) ပူၤတၢ်ဂီၤမူဟးထီၣ်တခါလၢဖိသၣ်မုၣ်ခံဂၤဖျါလၢတူၢ်ဘၣ်တၢ်စုဆူၣ်ခီတကးလၢဘၣ်တၢ်ထံၣ်န့ၢ်အီၤလၢကျဲကပၤန့ၣ် တၢ်န့ၣ်မ့ၢ်ဝဲဒၣ်အဖိမုၣ်သ့ၣ်တဖၣ်အဂ့ၢ် ဖိသၣ်လီၤမၢ်(၂)ဂၤအမိၢ်န့ၣ်တဲလီၤတ့ၢ်ဝဲဒၣ်အိၣ်န့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်န့ၣ် တၢ်ဂ့ၢ်ဝဲအံၤမ့ၢ်တလၢအကါဒိၣ်တခါအဃိ ကီၢ်ဆၣ်ပတီၢ်ကသမံသမိးဝံၤဒီးကတီၣ်ထီၣ်ဆူကီၢ်ရ့ၣ်တဆီဒီးဆူလီၢ်ခၢၣ်သးတဆီအဂ့ၢ် ခ့ၣ်အဲၣ်ယူၣ်-လူၢ်ပျဲၢ်ကီၢ်ဆၣ်အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
