လါအီးကထိဘၢၣ် ၁၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၅),မုၢ်တြီၢ်ကီၢ်ရ့ၣ် စးထီၣ်လါအီးကထိဘၢၣ်(၁)သီတုၤ(၁၅)သီ,လၢ(၁၅)သီအတီၢ်ပူၤ တၢ်ဒုးကဲထီၣ်ဝဲဒၣ်လၢသုးကရူၢ်ဒီးကညီဒီကလုၥ်တၢ်ထူၣ်ဖျဲးသုးမုၣ်ဒိၣ်(KNLA)သုးက့(၅)အဘၢၣ်အစၢၤ အိၣ်ဝဲ(၅၂)ဘျီအဂ့ၢ် ခ့ၣ်အဲၣ်ယူၣ် -မုၢ်တြီၢ်ကီၢ်ရ့ၣ် ပၥ်ဖျါဝဲဖဲတနံၤလါအီးကထိဘၢၣ်(၁၆)သီအနံၤအံၤန့ၣ်လီၤ.
ခီဖျိတၢ်ဒုးကဲထီၣ်လၢခံခီခံကပၤဒ်န့ၣ်အဃိ ပယီၤသုးတကပၤသံဝဲ(၁၄)ဂၤအကျါပၣ်ဃုၥ်ဝဲသုးရ့ၣ်ခိၣ်(၁)ဂၤဒီးသုးခိၣ်စိ(၁)ဂၤအမဲၥ်ညါဘၣ်ဒိဝဲဒၣ်(၂၈)ဂၤအဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်ပၥ်ဖျါဝဲဒၣ်အသိး လၢ(KNLA) တကပၤစ့ၢ်ကီးတၢ်ဘၣ်ဒိဘၣ်ထံးအိၣ်ဝဲဒၣ်တဆံးတက့ၢ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်စံးဝဲဒၣ်န့ၣ်လီၤ.
တကတီၢ်ဃီ (၁၅)သီတီၢ်ပူၤ သုးကရူၢ်ဟဲတ့ၢ်လီၤဝဲဒၣ် မ့ၣ်ပိၢ်ဒီးဒြိ(၆)ဘျီ,ဒီး(Jet fighter) (၅)ဘျီ, ခးလီၤစ့ၢ်ကီးဝဲကျိဖးဒိၣ်(၁၂၀-MM) လၢသဝီပူၤ(၂)ဘျီအဖီခိၣ် ဘၣ်သံဝဲဒၣ်လီၢ်ကဝီၤကမျၢၢ်(၁)ဂၤ,ဒီးဘၣ်ဒိဝဲဒၣ်(၃)ဂၤအသိး ကမျၢၢ်ဟံၣ်,တၢ်ဘူၣ်တၢ်ဘါလီၢ်,ဒီးတၢ်မၤလိကၠိသ့ၣ်တဖၣ်ဘၣ်ဟးဂီၤအိၣ်ဝဲဒၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် ပၥ်ဖျါဃုၥ်စ့ၢ်ကီးဝဲဒၣ်န့ၣ်လီၤ.
လၢန့ၣ်အမဲၥ်ညါ သုးကရူၢ်အံၤလၢကမၤဝဲတခီတၢၤတၢ်ဃုထၢလၢ ခါလၢကဟဲ ၂၀၂၅လါဒံၣ်စဲဘၢၣ်ဒီး၂၀၂၆နံၣ်လါယူနူၤအါရံၤအတီၢ်ပူၤအဂီၢ်ဟဲနုၥ်လီၤဝဲဒၣ်လၢမုၢ်တြီၢ်ကီၢ်ရ့ၣ်ဟီၣ်ကဝီၤလၢအမ့ၢ် တလးအီခိၣ်သဝီ,ကမးမိၢ်ဝ့ၢ် ဒွဲၣ်လိကီၢ်ဆၣ် ဒီးဖဲကမးမိၢ်ဝ့ၢ်အပူၤန့ၣ် သုးကရူဟဲပၥ်လီၤဝဲဒၣ်တၢ်ဖး(၄)ဖျၢၣ်,လၢကဝီၤဒ့(၄)ဘ့ၣ်ဒ်အမ့ၢ်ကဝီၤဒ့(၁,၂,၃,၄,)ဒီးကဝီၤဒ့တဘ့ၣ်စုၥ်စုၥ်ပၥ်လီၤဝဲဒၣ်တၢ်ဖးဒၢတဖျၢၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် စံးဝဲဒၣ်အသိးသ့ၣ်ညါဘၣ်န့ၣ်လီၤ.
