လါအီးကထိဘၢၣ် ၂၂ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤအပူၤ ပှၤဒဲကဝီၤဖိလၢအကလဲၤမၤကထံပိၥ်ကျီးဒီးလါမယါကျီးတၢ်ဖံး တၢ်မၤတဖၣ် ဖဲမဟါအနံၤန့ၣ်စးထီၣ်ဟးထီၣ်တနီၤလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ် စံစးက့း(Si Sa Ket)ကီၢ်ရ့ၣ်ဒီး ကၠၤထၣ်ဘူရံၤကီၢ်ရ့ၣ်ပူၤ ကထံပိၥ်ကျီးဒီးလါမယါကျီးတၢ်ဖံးတၢ်မၤလီၢ်လၢတၢ်လိၣ် ဘၣ်ဝဲပှၤမၤတၢ်ဖိလၢအကလးဘျဲၣ်အံၤ ဖဲမဟါလါအီးကထိဘၢၣ် ၂၁ သီအနံၤန့ၣ် ကမျၢၢ်လၢတီၣ်ထီၣ်ဃၥ်တၢ်ဖံး တၢ်မၤအံၤတဖၣ် အကျါစးထီၣ်ဟးထီၣ်ဝဲ(၁၂၅)ဂၤလံအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တၢ်ဟးထီၣ်ဘျီဝဲအံၤကထံပိၥ်ကျီးတၢ်မၤလီၢ်န့ၣ်ဟးထီၣ်ဘၣ်ဝဲ(၄၄)ဂၤဒီး မ့မ့ၢ်လၢ (လါမယါ)သၣ်ကျီးခီန့ၣ် ဟးထီၣ်ဘၣ်ဝဲ (၈၁)ဂၤန့ၣ်လီၤ. ဒ်န့ၣ်အသိးပှၤလၢအဟးထီၣ်သ့ၣ်တဖၣ်အံၤပိၥ်ခွါနီၣ်ဂံၢ်အါန့ၢ်ဒံးပိၥ်မုၣ်အနီၣ်ဂံၢ် အဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဝဲန့ၣ်လီၤ.
အစံးဝဲလၢ“ပှၤပိၥ်မုၣ်ပိၥ်ခွါလဲၤခဲလၢၥ်လီၤ.ဘၣ်ဆၣ်ပိၥ်မုၣ်န့ၣ်လဲၤအါလၢ(လါမယါ)ကျီး .မ့မ့ၢ်လၢကထံပိၥ်ကျီးခီဒု ကမျၢၢ်သးဆူၣ် လၢအဲၣ်ဒိးလဲၤဘၣ်ဆၣ်တနီၤန့ၣ်ဘၣ်ယိၣ်ဝဲလၢအဘူးဒီးကီၢ်ဆၢအဃိတၢ်ဘၣ်ယိၣ်ဘၣ်ဘှီကအိၣ်တမံၤမံၤဧါဒ်န့ၣ်.ကကွၢ်ဝဲလၢအသမူသကိးလဲၤဝံၤမးအဝဲသ့ၣ်ကလဲၤအါထီၣ်ဒ်န့ၣ်လီၤ.အနီၢ်ကီၢ်ကီၢ်ဆၢန့ၣ်တၢ်ဘၣ်ယိၣ်ဘၣ်ဘှီတအိၣ်နီမံၤဘၣ်.” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
မဲၢ်လးဒဲကဝီၤအပူၤဘၣ်ဃးကထံပိၥ်တၢ်မၤဒီး(လါမယါ)တၢ်မၤလၢကၠီၣ်တဲၣ်တၢ်မၤကစၢ်လိၣ်ဘၣ်ဝဲအံၤ လီၤဆီဒၣ်တၢ်(လါမယါ) ကျီးတၢ်မၤအံၤပှၤဒဲကဝီၤဖိတီၣ်ထီၣ်မံၤစရီလၢကလဲၤမၤဝဲအံၤအနီၣ်ဂံၢ်အိၣ်(၇၀၀)ခိၣ်ဃၢၤညါဘၣ်ဆၣ် မ့မ့ၢ်ကထံပိၥ်တၢ်မၤန့ၣ် ပှၤတီၣ်ထီၣ်မံၤစရီအိၣ်စှၤကိၥ်ဖိလီၤအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ် လါအီးကထိဘၢၣ် ၁၅ သီအနံၤန့ၣ်စ့ၢ်ကီး လၢ(ကီးစၣ်)တၢ်တ့ဟံၣ်တ့ဃီတၢ်ဖံးတၢ်မၤအဂီၢ် အဆိကတၢၢ် ပှၤဒဲကဝီၤဖိ(၂၀)ဂၤ ဟးထီၣ်တ့ၢ်ဒံးဝဲဒီး တကးဒံးဘၣ်လၢကဟဲ ၂၇ သီအနံၤစ့ၢ်ကီး လၢကထံပိၥ်ကျီးတၢ်မၤအဂီၢ် ပှၤဒဲကဝီၤဖိ ကဟးထီၣ်ကဒီးအသီ တဒူၣ်တၢ်ရဲၣ်တၢ်ကျဲၤအိၣ်အဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲန့ၣ်လီၤ.
တကီၢ်ခါခဲအံၤဒဲကဝီၤတဖၣ်အပူၤ လံၥ်လဲၢ်တၢ်မၤနီၣ်မၤဃါအိၣ်ဝဲအကလုၥ်ကလုၥ်ဒီး တကတီၢ်ဃီလၢတၢ်ဖံးတၢ်မၤအဂီၢ် ပှၤမၤ တၢ်ဖိလၢကၠီၣ်တဲၣ်လဲၤထၢဝဲစရီသ့ၣ်တဖၣ်အံၤ ကဘၣ်မ့ၢ်ပှၤအိၣ်ဒၣ်ထဲ(ပလး)တၢ်ဂီၤလီၤဘၣ်ဆၣ် ပှၤဒဲကဝီၤဖိလၢ အအိၣ်ဒီး လံၥ်လဲၢ်တၢ်မၤနီၣ်မၤဃါလၢအဂၤသ့ၣ်တဖၣ်ဒ်သိးကန့ၢ်လဲၤမၤဘၣ်တၢ်အဂီၢ် ခိၣ်နၢ်ဘၣ်ထွဲပှၤဘၣ် မူဘၣ်ဒါ ဂုၥ်ကျဲးစၢးကတိၤခဲးန့ၢ် တၢ်လံအဂ့ၢ်န့ၣ် ဒဲကဝီၤခိၣ် စီၤဆါဒ့ စံးအါထီၣ်ဝဲန့ၣ်လီၤ.
တကးဒံးဘၣ်မဲၢ်လးဒဲကဝီၤအပူၤ လၢကဟဲခါတလါအံၤဘူးကလၢၤန့ၣ် တၢ်ရဲၣ်တၢ်ကျဲၤအိၣ်လၢကၠီၣ်တဲၣ်တၢ်ဖံးတၢ်မၤကစၢ် သ့ၣ်တဖၣ်ကဟဲကိးအါထီၣ်ကဒီးတၢ်မၤလၢအဂုၤအဂၤတဖၣ်အိၣ်ဝဲအဂ့ၢ်န့ၣ် သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအအိၣ် န့ၣ်လီၤ.
ဘၣ်ကီဘၣ်ခဲဒဲကဝီၤတဖၣ်အပူၤကၠီၣ်တဲၣ်ဟ့ၣ်အခွဲးလၢကဟးထီၣ်မၤတၢ်လၢတၢ်ချၢလၢအဖိးသဲစးဝံၤလီၢ်ခံ လီၤဆီဒၣ်တၢ် မဲၢ်လးဘၣ်ကီဘၣ်ခဲဒဲကဝီၤအပူၤ ကၠီၣ်တဲၣ်တၢ်မၤကစၢ်တဖၣ်ဟဲကိးဝဲတၢ်ဖံးတၢ်မၤအကလုၥ်ဒ်အမ့ၢ် လါမယါကျီး, ကထံပိၥ်ကျီး တၢ်ထုးထီၣ်ဆ့က့ၤ(စပီး)တၢ်မၤလီၢ်,သိလ့ၣ်တိၣ်ယိၣ်တၣ် မ့ၣ်အူပျံၤတၢ်မၤလီၢ် ဒီး ကီးစၣ်(တၢ်တ့ဟံၣ် တ့ဃီ)တၢ်ဖံးတၢ်မၤသ့ၣ် တဖၣ် အံၤန့ၣ်လီၤ.
လီၤဆီဒၣ်တၢ်လါမယါကျီးဒီးကထံပိၥ်ကျီးန့ၣ်လိၣ်ဘၣ်ဝဲပှၤမၤတၢ်ဖိအိၣ်လၢအကလးညါဘၣ်ဆၣ် မ့မ့ၢ်ဆ့ကၤစပီး တၢ်မၤလီၢ် န့ၣ်လိၣ်ဘၣ်ဝဲ(၃၅၀)ဂၤ,မ့ၣ်အူပျံၤတၢ်မၤလီၢ်န့ၣ်လိၣ်ဘၣ်ဝဲထဲ(၅၀)ဂၤအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဘၣ်တ့ၢ်ဃၥ် ခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
တကီၢ်ခါခဲအံၤတၢ်ဖံးတၢ်မၤလၢကၠီၣ်တဲၣ်တၢ်မၤကစၢ်လိၣ်ဘၣ်ဝဲ(၅)ခါလၢၥ်အံၤ လၢမဲၢ်လးဒဲကဝီၤအပူၤတၢ်ထၢပှၤဒဲကဝီၤဖိလၢ ကလဲၤမၤတၢ်အမံၤစရီဝံၤဝဲခဲလၢၥ်လံအသိး နိၣ်ဖိဒဲကဝီၤဒီးအူးဖၠၣ်ဒဲကဝီၤအပူၤစ့ၢ်ကီး တၢ်စးထီၣ်ထၢဝဲစရီလံအိၣ်ဝဲလံအဂ့ၢ်န့ၣ် သ့ၣ်ညါဘၣ်လၢဒဲကဝီၤဘၣ်ထွဲပှၤဘၣ်မူဘၣ်ဒါ အအိၣ်န့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲကဝီၤအိၣ်ဝဲ(၉)ဘ့ၣ်လၢအမ့ၢ် မဲၢ်လး,အူးဖၠၣ်,နိၣ်ဖိ,မဲၢ်ရၤမိၢ်,မဲၢ်လးအူး,ထါမဟ့ၣ်, ဘၣ်ဒီၤယါ,ကရ့ၣ်နံၣ်ဒဲကဝီၤနီၣ်ဂံၢ်(၁)ဒီးဒဲကဝီၤနီၣ်ဂံၢ်(၂)ဒီး ဒဲကဝီၤကိးဘ့ၣ်ဒဲးပှၤနီၣ်ဂံၢ်ပၥ်ဖှိၣ်အိၣ်ဝဲ(၁၀၀၀၀၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
