လါနိၣ်ဝ့ဘၢၣ် ၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ တဂီၤအံၤပယီၤသုးနီၣ်ဂံၢ်(၉)သုးကလၢၤ,အမျိၥ်သုးဃုၥ်ဒီး ကဘီယူၤလဲၤတ့ၢ်လီၤဝဲမ့ၣ်ပိၢ်အဖျၢၣ်(၃၀)အံၤလၢကရူၢ် ၅ ဘ့ၣ်ပူၤအဃိ ကမျၢၢ်ဘၣ်ဒိဘၣ်ထံးဝဲ(၃)ဂၤအဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲန့ၣ်လီၤ.
ဖဲတနံၤအံၤဂီၤခီ ၁၁း၂၀ တုၤ ၁၁း၄၉ မံးနံး ဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်တအိၣ် ကဘီယူၤလဲၤတ့ၢ်လီၤဝဲမ့ၣ်ပိၢ် တဖၣ်လၢ တမီၤဒီးကရူၢ်,ထံညၣ်ပီၢ်ကရူၢ်,စွ့ၣ်ယီၣ်ပၠးကရူၢ်,တရွဲၢ်ခံကရူၢ်,နဲၢ်ဖီထၣ်ကရူၢ် ဒူသဝီပူၤ ပၥ်ဖှိၣ်အိၣ်ဝဲ(၂၉)ဖျၢၣ်အဃိ ကမျၢၢ်ပိၥ်ခွါ (၂)ဂၤ, ပိၥ်မုၣ်(၁)ဂၤဘၣ်ဒိဝဲဒီး ကဘီယူၤအမဲၥ်ညါလၢပယီၤသုးကလၢၤအံၤတဆီခးလီၤစ့ၢ်ကီးဝဲကျိဖးဒိၣ်တကတီၢ်ဃီ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲအသိးသ့ၣ်ညါဘၣ်န့ၣ်လီၤ.
ဘၣ်ဃးပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်ဘျီဝဲအံၤ သဝီဖိတဂၤစံးဝဲလၢ“လၢအဘီယူၤဒီးခး,လၢနီၣ်ဂံၢ်(၉) နါက့ခးလီၤကျိဖးဒိၣ်,လၢဒြိနါက့ဟဲခးလီၤတၢ်လီၤ.လီၤတဲၥ်လၢထံညၣ်ပီၢ်,မးအ့းဆၣ်.ဖဲန့ၣ်အက့ဖျိးဘၣ်သရၣ်မုၣ်တဂၤ.တဘျီဃီ က့ၤရ့းကဒါလၢထံညၣ်ပီၢ်,မံၣ်ခၠီအဲၣ်မ့ဝံၤလဲၤကဒါလၢနီၣ်ကတိးလဲၤကွံၥ်လီၤဝဲလၢနီၣ်ကတိးသဝီထးခီ,သဝီလၥ်ခီ ဘၣ်ဝဲပှၤကမျၢၢ် ၂ ဂၤ. ဘၣ်လၢပှၤမၤဘူၣ်ထီၣ်ပှၤသံပှၤဖီအီၣ်တၢ်ဆၢကတီၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒူသဝီလၢကျိဖးဒိၣ်ဒီးကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤမ့ၢ်ဝဲ ကလီၤဃၢၤ(မံၣ်ခၠီအဲၣ်),မးအ့းဆၣ်,ထံညၣ်ပီၢ်,ကြူမဲသဝီ, နီၣ်ကတိးသဝီထးခီ လၥ်ခီ ,တမီးဒီး,နဲၣ်ဖီထၣ်,တရွဲၢ်ဝၢ်,စွ့ၣ်ယီၣ်ပၠးသဝီဒီး တုၤလၢမုၢ်ဃ့ၢ်လီၤ ၃း၀၀ နၣ်ရံၣ်ခိၣ်ဃၢၤန့ၣ် ပယီၤသုးခးဒံးလီၤကျိဖးဒိၣ်,ပျၢ်လီၤဒြိလဲၤတ့ၢ်လီၤမ့ၣ်ပိၢ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီပယီၤသုးခးလီၤကျိဖးဒိၣ်ဒီးကဘီယူၤတ့ၢ်လီၤမ့ၣ်ပိၢ်ဘျီဝဲအံၤ ကမျၢၢ်ဘၣ်ဒိဘၣ်ထံးအကျါပၣ်ဃုၥ်ဝဲကၠိသရၣ်မုၣ် တဂၤအမဲၥ်ညါ ကၠိဒီးကမျၢၢ်ဟံၣ်တၢ်သူၣ်ထီၣ်ဟးဂီၤအိၣ်တစှၤန့ၢ်(၄)ဖျၢၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဂၤဃီ ဝဲန့ၣ်စံးအါထီၣ်ဝဲန့ၣ်လီၤ.
ဒ်လီၢ်ကဝီကမျၢၢ်စံးဝဲအသိးန့ၣ် ဖဲတဂီၤအံၤတၢ်ပၢၢ်ဆၢသုးကရူၢ်လဲၤမၤဟးဂီၤဝဲ ဘံလ့-ကၠဲၣ်ကီၤဘၢၣ်စၢၤ လ့ၣ်မ့အူကျိၤအဃိ ကဘီယူၤဘၣ်ဟဲက့ၤခးလီၤကဒါတၢ်ကဲထီၣ်ဒ်အံၤလီၤဒီး တချုးကဘီယူၤဟဲခးလီၤတၢ်ဒံးဘၣ်န့ၣ်အပူၤကွံၥ်စှၤ သီအခါပယီၤသုး ခးစိဃီၤကျိဖးဒိၣ်အိၣ်ဝဲအဂ့ၢ်န့ၣ် ကမျၢၢ်တဖၣ်စံးဝဲန့ၣ်လီၤ.
