လါနိၣ်ဝ့ဘၢၣ် ၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိလၢ အဃ့ၢ်ထီၣ်ဟဲက့ၤဘၣ်ဝဲဟီၣ်ကဝီၤပူၤကျဲတဖၣ်အံၤ တၢ်တဘၣ်တူၢ်လိၥ်ဝဲဘၣ်အဂ့ၢ်န့ၣ် ကီၢ်ရ့ၣ်ထုးထီၣ်ဝဲဂ့ၢ်ဂီၢ်အူတၢ်ကလုၢ်ဖဲ လါနိၣ်ဝ့ဘၢၣ် ၅ သီအနံၤန့ၣ်လီၤ.
(ကၠါဖၠၣ်)အီၤလါတၢ်လံၣ်တၢ်လီတၢ်ဖံးတၢ်မၤလၢအိၣ်ဖဲမၠၣ်ဝတံၣ်ဝ့ၢ်ဃၢၤအံၤတဖၣ် အပူၤကွံၥ်လါအီးကထိဘၢၣ် သုးမီၤစိရိၤပၥ်မၤ အသးလၢနုၥ်လီၤမၤဆှဲလဲဝဲတၢ်ဒီး ဖဲန့ၣ်ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိသ့ၣ်တဖၣ်ဘၣ်တၢ်ဆှၢဟးထီၣ်ခူသူၣ်အဝဲသ့ၣ်လၢကျဲ အကလုၥ်ကလုၥ်အိၣ်အဖီခိၣ် ကြုၢ်တုကီၢ်ဆၣ်ပူၤလၢဒုးယၤတၢ်ဖ့ၣ်စၢဆဲးကဲထီၣ်ဝဲအဖၢမုၢ်အံၤတၢ်တဘၣ်တူၢ်လိၥ်အဝဲသ့ၣ်ဘၣ် အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဒ်န့ၣ်အသိးလၢတၢ်ဆှၢခူသူၣ်ဝဲထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိအံၤအပူၤန့ၣ် မ့ၢ်ဝဲကညီဖီၣ်စုကဝဲၤကရူၢ်လၢအဆီၣ်ထွဲမၤစၢၤဝဲ သုးမီၤစိရိၤအံၤလီၤအသိး ကျဲလၢတၢ်ဆှၢခီဝဲ(ကၠါဖၠၣ်)ပှၤမၤတၢ်ဖိတဖၣ်အံၤမ့ၢ်ဝဲဟီၣ်ကဝီၤကျဲလၢတၢ်ပံးဃၥ်တ့ၢ်ဝဲအဃိ ဒ်သိး တၢ်ထံၣ်ကမၣ်သုတအိၣ်ထီၣ်တဂ့ၤအဂီၢ် တၢ်ဘၣ်ထုးထီၣ်ဝဲတၢ်ကလုၢ်ဒ်အံၤလီၤအဂ့ၢ်န့ၣ် ကီၢ်ဆၣ်ခိၣ် ပဒိၣ်မါကၠၤညိၤ စံးဝဲ န့ၣ်လီၤ.
အဝဲစံးဝဲလၢ“ပထုးထီၣ်လံၥ်ခဲအံၤန့ၣ်ဘၣ်ဃးလၢ(ကၠါဖၠၣ်)တဖၣ်န့ၣ်(DKBA)ဒီး(PC)ဟဲက့ၤဆှၢအဝဲသ့ၣ်ဖဲပဟီၣ်ကဝီၤကျဲအံၤမီၤ.ပတဒုးနုၥ်လီၤအဝဲသ့ၣ်ဘၣ်,ပမ့ပျဲနုၥ်လီၤန့ၣ်ပဘၣ်သုးအုးလၢကဘံဘူဒီးပပှၤအဃိပဘၣ်ထုးထီၣ်ဝဲတၢ်သိၣ်တၢ်သီဒ်အံၤလီၤ. အဝဲသ့ၣ်ဟဲက့ၤဆှၢ(ကၠါဖၠၣ်)တဖၣ်န့ၣ်န့ၢ်လၢတၢ်ဒုးတၢ်ယၤအပူၤကျဲလၢပှၤပံးဃၥ်အီၤတဖၣ်မီၤ.ကျဲခီန့ၣ်ပပံးဃၥ်ပတဒုးလဲၤပှၤနီတဂၤဘၣ်.အဝဲသ့ၣ်ဟဲက့ၤဆှၢဝဲဒ်အံၤအဃိလၢပဂီၢ်န့ၣ်တၢ်ကီတၢ်ခဲအိၣ်ထီၣ်စ့ၢ်ကီးလီၤ.ခံထံၣ်တထံၣ်ဘၣ်ဃးလၢ(ကၠါဖၠၣ်)န့ၣ်ပခ့ၣ်အဲၣ်ယူၣ်တြီဃၥ်ဝဲပတတူၢ်လိၥ်ဘၣ်.အဝဲသ့ၣ်နုၥ်လီၤဝဲအိၣ်ဒီးတၢ်ဂ့ၢ်န့ၣ်ဖျါလၢပမၤသကိးတၢ်ဒီးအဝဲသ့ၣ်အဃိပဘၣ်ထုးထီၣ်ဝဲတၢ်သိၣ်တၢ်သီတခါအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်တကီၢ်ခါခဲအံၤလၢတၢ်ဂ့ၢ်အိၣ်ထီၣ်ဒ်အံၤအဖီခိၣ်ဒီး ဟီၣ်ကဝီၤဖဲန့ၣ်အပူၤတုၤလၢခဲအံၤဒုးယၤတၢ်ဖ့ၣ်စၢဆဲးကဲထီၣ်ဒံး ဝဲလၢဟီၣ်ကဝီၤ(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤအဃိ ကမျၢၢ်ထံဖိကီၢ်ဖိအမဲၥ်ညါဖီၣ်စုကဝဲၤကရူၢ်ကရၢစ့ၢ်ကီး ကလူၤပိၥ်မၤထွဲဝဲတၢ်ကလုၢ်အံၤအဂ့ၢ်န့ၣ် ကြုၢ်တုကီၢ်ဆၣ်ခိၣ် ပဒိၣ်မါကၠၤညိၤ စံးအါထီၣ်ဝဲန့ၣ်လီၤ.
တကတီၢ်ဃီ(ကၠါဖၠၣ်)တၢ်ဖံးတၢ်မၤအမဲၥ်ညါလၢဒုးယၤတၢ်ဟူးတၢ်ဂဲၤအပူၤစ့ၢ်ကီးခီဖျိလၢဘူးဒးကညီသုးမုၢ်ဒိၣ်(DKBA),သုးခိးကီၢ်ဆၢ (BGF)ဒီးကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)ကရူၢ်အတၢ်မၤသကိးတၢ်ဒီးပယီၤသုးအံၤအဃိ တၢ်ကီတၢ်ခဲ အိၣ်လၢတၢ်ကဘှါဆှဲတၢ်ဂ့ၢ်ကီအဂီၢ်ဒီးဒုးယၤတၢ်ရဲၣ်တၢ်ကျဲၤတကပၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
လၢတၢ်န့ၣ်အဃိစးထီၣ်ဖဲဟါခီ ၆း၀၀ နၣ်ရံၣ်တုၤ ဂီၤခီ ၆း၀၀ နၣ်ရံၣ်အတီၢ်ပူၤ တၢ်တဘၣ်ဟးထီၣ်က့ၤလီၤဘၣ်အသိး ထံဂုၤ ကီၢ်ဂၤ(ကၠါဖၠၣ်)ပှၤမၤတၢ်ဖိလၢအဃ့ၢ်ထီၣ်ဟဲက့ၤကျဲဖဲကြုၢ်တုကီၢ်ဆၣ်ပူၤတဖၣ်လ့ၤတက့ၤတၢ်တဘၣ်တူၢ်လိၥ်အီၤဘၣ်, ဖဲတၢ်အိၣ်သးတဂၢၢ်တကျၢၤ ဘၣ်အတီၢ်ပူၤတၢ်တဘၣ်အိးထီၣ်မၤတၢ်မၤကျိၣ်တၤစ့ဘၣ်ဒီးလၢသုးမီၤစိရိၤ အတၢ်ဟူးတၢ်ဂဲၤအံၤ အဃိကမျၢၢ်တဖၣ်ကခူၣ်လီၤဃၥ်တၢ်ပူၤအဂ့ၢ်န့ၣ် ဒူပျၥ်ယၥ်ကီၢ်ရ့ၣ် ဟ့ၣ်ပလီၢ်စံးဝဲန့ၣ်လီၤ.
ဒ်န့ၣ်အသိးဂ့ၢ်ဂီၢ်အူတၢ်ကလုၢ်လၢတၢ်ထုးထီၣ်ဝဲခဲအံၤတဖၣ် တၢ်မ့တလူၤပိၥ်မၤထွဲဝဲဘၣ်န့ၣ်တၢ်ကဟံဝဲအရ့ဒ်(ခ့ၣ်အဲၣ်ယူၣ်) တၢ်သိၣ်တၢ်သီတၢ်ဘျၢအိၣ်ဝဲအသိးအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ပယီၤသုးအံၤလၢကထီၣ်ဒိၣ်စိက့ၤခူပူၤဝ့ၢ်ပူၤဃုၥ်ဒီးထံဆၢကီၢ်ဆၢတၢ်လီၢ်လၢတၢ်ပၢၢ်ဆၢသုးပၥ်ဖှိၣ်ကရူၢ်မၤန့ၢ်ဃၥ်ဝဲတဖၣ်အံၤအဂီၢ်န့ၣ် လၢကြုၢ်တု-ကီးတရံးဟီၣ်ဝီၤဒုးယၤတၢ်ဟူးတၢ်ဂဲၤဒီတကတီၢ်အပူၤ (DKBA),(BGF),(PC)တဖၣ်အံၤပၥ်ဖှိၣ်ထီၣ်သးမၤစၢၤဝဲ ပယီၤသုးလၢကျဲအဘိဘိဒီး ဖဲန့ၣ်တဆီခဲအံၤအိၣ်ထီၣ်တုၤလၢဆှၢခူသူၣ်ဝဲ ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိလၢအိၣ်ဟးထီၣ်လၢ (KK Park)တၢ်လီၢ်အံၤတဖၣ်ဟဲအိၣ်ထီၣ်ဝဲဒၣ်ဒ်အံၤလီၤအဂ့ၢ်န့ၣ် တၢ်စံးဝဲအိၣ်န့ၣ်လီၤ.
