လါနိၣ်ဝ့ဘၢၣ် ၁၄ သီ ၂၀၂၅ နံၣ်, ခ့ၣ်အဲးစံၣ်
DKBA ခိၣ်နၢ်ဒိၣ်ထီ(၄)ဂၤဖဲမဟါအနံၤအမဲရံၣ်ကၤထုးထီၣ်လၢကဟံဂ့ၢ်ဝီဝံၤလီၢ်ခံ ဖလူလီၢ်ကဝီၤခီဖျိလၢပယီၤသုးအကျိဖးဒိၣ် အံၤအဃိ (DKBA)အပှၤသံဘၣ်ဒိဘၣ်ထံးဝဲ(၃)ဂၤ ဒီး ကမျၢၢ်ဘၣ်ဒိသံဘၣ်ဒိဘၣ်ထံး တစှၤန့ၢ်(၁၀)ဂၤအဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲန့ၣ်လီၤ.
ဖဲမဟါလါနိၣ်ဝ့ဘၢၣ် ၁၃ သီ မုၢ်ထူၣ် ၁၂း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ် (ကၠါဖၠၣ်)တၢ်မၤလီၢ်လၢအိၣ် DKBA ဟီၣ်ကဝီၤ ဖလူဖးဒိၣ်သဝီ ဖယါကိ(ဘုရားကုန်း)ကပၤအံၤ ပယီၤသုးခးလီၤဝဲကျိဖးဒိၣ်လီၤတဲၥ်ပိၢ်ဖးထီၣ်တဲလၢတၢ်အိၣ်ခိးတၢ်လီၢ်ကပၤအဃိ (DKBA) ဒီးကမျၢၢ်သံဘၣ်ဒိဘၣ်ထံးဘၣ်ဟဲကဲထီၣ်ဝဲဒ်အံၤလီၤ တၢ်ကစီၣ်သန့တနီၤပၥ်ဖျါဝဲအိၣ်န့ၣ်လီၤ.
လၢပယီၤသုးအတၢ်ခးလီၤကျိဖးဒိၣ်ဘျီဝဲအံၤ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)အပှၤသံ ၁ ဂၤ, ဘၣ်ဒိ ၂ ဂၤအသိး ကမျၢၢ်သံ ၁ ဂၤ, ဘၣ်ဒိ ၈ ဂၤအဂ့ၢ်န့ၣ် (DKBA)ပှၤဘၣ်မူဘၣ်ဒါတကပၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤ အံၤ န့ၣ်လီၤ.
ဘၣ်ဃးသုးမီၤစိရိၤသူကဘီကယူၤ,ဒြိ,ခးလီၤတၢ်ဒီးကျိဖးဒိၣ်လၢ(DKBA)တၢ်ပၢဟီၣ်ကဝီၤပူၤအံၤတမ့ၢ်အကဲထီၣ်သးတၢ်တဘျီအံၤဘၣ် ဒီး မ့မ့ၢ်တခီဖဲအပူၤကွံၥ်လါအီးကူး ၃ သီအခါ ပယီၤသုးလဲၤတ့ၢ်လီၤဒြိမ့ၣ်ပိၢ်ဒံးလၢသုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ အဟံၣ် ကရၢၢ်ပူၤဝံၤ တကတီၢ်ဃီဖဲလါစဲးပထ့ဘၢၣ်အခါ ကၠီးခဲးလၢ(ကၠါဖၠၣ်)တၢ်ဖံးတၢ်မၤအိၣ်ဆီလီၤသးအံၤပယီၤသုးလဲၤတ့ၢ်လီၤဝဲဒီး ဒြိအဃိ တၢ်ဆါဟံၣ်ဟးဂီၤကဲထီၣ်ဒံးဝဲန့ၣ်လီၤ.
(DKBA)ကညီဖီၣ်စုကဝဲၤကရူၢ်အံၤ ဖဲအပူၤကွံၥ်(၂၀၁၅)နံၣ် လၢအူသ့စ့ၣ်ပဒိၣ်ပၢတၢ်စိၤအခါန့ၣ် မ့ၢ်ဖီၣ်စုကဝဲၤကရူၢ်တဒူၣ်လၢ အဆဲးလီၤဝဲထံကီၢ်ဒီဘ့ၣ်တၢ်ပတုၥ်တၢ်ခးလံၥ်ဃံးဃၥ်န့ၣ်လီၤ.
ဘၣ်ဆၣ်စးထီၣ်ဖဲ ၂၀၂၁ လီၢ်ခံတယံၤတမီၢ် (BGF)အမဲၥ်ညါကရူၢ်အံၤလၢ(ကၠါဖၠၣ်)တၢ်ဖံးတၢ်မၤအပူၤ ပၣ်ဃုၥ်ပၣ်ဂီၢ်အိၣ်အဃိ ဖဲလါနိၣ်ဝ့ဘၢၣ် ၁၂ သီအံၤ (DKBA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ, ပၢဆှၢသုးဂ့ၢ်ဝီခိၣ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ, သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ ဒီး သုးခိၣ်ကျၢၢ်ဖိ စဲကၠီၤလၣ် ၄ ဂၤအံၤ ကီၢ်အမဲရံၣ်ကၤထုးထီၣ်ဘိးဘၣ်ရၤလီၤ ဝဲလၢကဟံဝဲ ဂ့ၢ်ဝီအံၤန့ၣ်လီၤ.
ဒ်တၢ်ကစီၣ်သန့တဖၣ်ပၥ်ဖျါထီၣ်ဒီးပခ့ၣ်အဲးစံၣ်-ကညီတၢ်ကစီၣ်ဃုသ့ၣ်ညါဝဲအသိးန့ၣ် အီၤလါ(ကၠါဖၠၣ်)တၢ်လံၣ်အီၣ်လီအီၣ် တၢ်ဖံးတၢ်မၤသ့ၣ်တဖၣ်န့ၣ်အိၣ်ဆီလီၤသး (BGF)ဒီး(DKBA)တၢ်ပၢဟီၣ်ကဝီၤလၢအမ့ၢ်မၠၣ်ဝတံၣ်ဝ့ၢ်ပူၤ,စွ့ၤကိၣ်ကိၤ,ကၠီးခဲး ဒီးဂီၤလ့ၤ ဟီၣ်ကဝီၤတၢ်လီၢ်သ့ၣ်တဖၣ်အပူၤန့ၣ်လီၤ.
