လါနိၣ်ဝ့ဘၢၣ် ၁၃ သီ, ၂၀၂၅ နံၣ်, ခ့ၣ်အဲးစံၣ်
လၢတၢ်ပၣ်ဃုၥ်ပၣ်ဂီၢ်လၢကၠါဖၠၣ်တၢ်လံၣ်အီၣ်လီအီၣ်တၢ်ဖံးတၢ်မၤပူၤအံၤအဃိ ဖဲမဟါလါနိၣ်ဝ့ဘၢၣ် ၁၂ သီအနံၤန့ၣ် ကီၢ်အမဲရကၤပဒိၣ်ကျိၣ်စ့ဝဲၤကျိၤထုးထီၣ်ဘိးဘၣ်ရၤလီၤဝဲလၢကဟံဝဲဂ့ၢ်ဝီဆူ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီ သုးမုၢ်ဒိၣ်(DKBA) ခိၣ်နၢ်ဒိၣ်ထီ ၄ ဂၤ န့ၣ်လီၤ.
ဘၣ်ဆၣ်လၢ(ကၠါဖၠၣ်)တၢ်ဖံးတၢ်မၤပူၤအကျါ ကရူၢ်ကရၢပူၤပှၤအဂၤတၢ်ပၣ်ဃုၥ်ပၣ်ဂီၢ်မ့အိၣ်သနါက့ ဘၣ်ဃးလၢတၢ်ဖံးတၢ်မၤ အပူၤအံၤအတၢ်ပၣ်ဃုၥ်ဂီၢ်တအိၣ်ဝဲဘၣ်အဂ့ၢ်န့ၣ် (DKBA)သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ ခီၣ်ဆၢကဒါဝဲန့ၣ်လီၤ.
အဝဲစံးဝဲလၢ“မ့ဘၣ်တဲတၢ်ကရၢကရိပူၤဒုပှၤမၤဒုအိၣ်သနါက့မ့ဘၣ်ဃးလၢယၤခီဘၣ်ဃးတၢ်တခါန့ၣ်တပၣ်ထွဲဃုၥ်နီမံၤမီၤ. တၢ်မၢၤလၢတၢ်ကရၢကရိမူဒါခိၣ်နၢ်တဂၤအဖီခိၣ်ကတဲဝဲလၢမူဒါအိၣ်အဃိကမၤဝဲဒ်န့ၣ်လီၤဧါ.ယဲခီတၢ်ကရၢကရိပူၤမ့ဘၣ်ဃးလၢသုးဂ့ၢ်ဝီတခါ,လၢဘၣ်လဲၤမၤထံရူၢ်ကီၢ်သဲးတၢ်ကရၢကရိခၢၣ်စးပလဲၤရ့လိၥ်သးဒီးပယီၤအဃိပှၤထၢနုၥ်ဃုၥ်ပှၤဒ်န့ၣ်ခီဧါတယးတဘၣ်လၢၤစ့ၢ်ဘၣ်တခါန့ၣ်.လၢပတၢ်ကရၢကရိပူၤအံၤပှၤပၣ်အိၣ်တနီၤ,ပှၤတပၣ်ဘၣ်အိၣ်ဒီဒူၣ်မီၤ.ပှၤမံၤဖျါခဲလၢၥ်ယၤခီဒုမ့တပၣ် ဃုၥ်ဘၣ်ဆၣ်လၢတၢ်ကရၢကရိပူၤမူဒါခိၣ်တဂၤအသိးဟံဃုၥ်ဝဲအရ့ဒ်န့ၣ်လီၤဧါသၢၣ်”အဂ့ၢ်န့ၣ် စံးဝဲန့ၣ်လီၤ.
လၢကၠါဖၠၣ်တၢ်လံၣ်အီၣ်လီအီၣ်တၢ်ဖံးတၢ်မၤအပူၤန့ၣ် (DKBA)ခိၣ်နၢ်ဒိၣ်ထီလၢကီၢ်အမဲရကၤကဟံဂ့ၢ်ဝီ ၄ ဂၤအံၤမ့ၢ်ဝဲ သုးရိၣ်မဲ ခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ, ပၢဆှၢသုးဂ့ၢ်ဝီခိၣ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ, သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ ဒီး သုးခိၣ်ကျၢၢ်ဖိ စဲကၠီၤလၣ် ခိၣ်နၢ်ဒိၣ်ထီၣ် သ့ၣ်တဖၣ်အံၤ န့ၣ်လီၤ.
ဒ်န့ၣ်အသိးဘၣ်ဃးကီၢ်အမဲရကၤပဒိၣ် ကဟံဂ့ၢ်ဝီလၢကရူၢ်ကရၢခိၣ်နၢ်တဖၣ်အဖီခိၣ်အံၤန့ၣ် ပၢဆှၢသုးဂ့ၢ်ဝီခိၣ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ လၢအပၣ်ဃုၥ်လၢတၢ်ဟံဂ့ၢ်ဝီပူၤအကျါအံၤစ့ၢ်ကီး စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ကီၢ်အမဲရကၤထံကီၢ်အံၤပဆိမိၣ်ဒိၣ်အဝဲသ့ၣ်ဒိၣ်မးလီၤ.လၢဟီၣ်ခိၣ်ချၢအံၤပှၤကူၣ်ဘၣ်ကူၣ်သ့အိၣ်အါကတၢၢ်ဒီးထံကီၢ်အံၤသ့ပဲၥ်ဖးနီၤဖးတၢ်ဂ့ၤ,တဂ့ၤန့ၣ်လီၤ.ခဲအံၤပမ့ဘၣ်ကွၢ် သုးရိၣ်မဲခိၣ်ကျၢၢ်အနီၢ်ကစၢ်စီၤစတံ,သုးဂ့ၢ်ဝီခိၣ် စီၤစ့ၤဝ့တဖၣ်အံၤ အတၢ်ပၣ်ဃုၥ်ပၣ်ဂီၢ်တအိၣ်နီတမံၤဘၣ်ဒီးသုးခိၣ်စီၤစတံန့ၣ်တရူးဟ့ၣ်အီၤစ့မးတဟံဝဲဘၣ်.ပှၤသ့ၣ်တဖၣ်အံၤထၢနုၥ်ဃုၥ်ဝဲ. မ့မ့ၢ် ယၤန့ၣ်လၢတၢ်ကရၢကရိအခၢၣ်စးန့ၣ်တဘျီတခီၣ်ယဟးထီၣ်တၢ်အိၣ်ဖှိၣ်အိၣ်လီၤ.ဘၣ်ဆၣ်မ့မ့ၢ်အဝဲသ့ၣ် ခံဂၤအံၤအတၢ်ပၣ်ဃုၥ် တအိၣ်နီမံၤဘၣ်.”အဂ့ၢ်န့ၣ် စံးစ့ၢ်ကီး ဝဲန့ၣ်လီၤ.
ဒ်ကီၢ်အမဲရကၤပဒိၣ်ကျိၣ်စ့ဝဲၤကျိၤအလံၥ်တၢ်ပၥ်ဖျါပူၤပၥ်ဖျါဝဲအသိးန့ၣ် (DKBA)ခိၣ်နၢ်ဒိၣ်ထီလၢတၢ်ပၥ်ဖျါအမံၤသ့ၣ်တဖၣ်အံၤ အတၢ်ပၥ်ဖှိၣ်ပၣ်ဃုၥ်ပၣ်ဂီၢ်အိၣ်ဝဲလၢ(ကၠါဖၠၣ်)တၢ်ဖံးတၢ်မၤပူၤဒီး ဒိးန့ၢ်ဘၣ်ဝဲတၢ်ဘၣ်ဘျုးအါမးအဂ့ၢ်န့ၣ် စံးဝဲန့ၣ်လီၤ.
တကးဒံးလၢကီၢ်အမဲရၤကၤအတၢ်ဟံဂ့ၢ်ဝီဘျီဝဲအပူၤန့ၣ် DKBA အမဲၥ်ညါ (Trans Asia International Holding Group Thailand Company Limited) ဒီး (Troth Star Company Limited)လၢအပၥ်ဖှိၣ် မၤသကိးတၢ်ဒီး(DKBA)အံၤဒီး ကၠီၣ်တဲၣ်ထံဖိကီၢ်ဖိ(Chamu Sawang)သ့ၣ်တဖၣ်အံၤစ့ၢ်ကီး တၢ်ကဟံဃုၥ်ဝဲဂ့ၢ်ဝီအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
လၢတၢ်ကၠါဖၠၣ်တၢ်ပၣ်ဃုၥ်ပၣ်ဂီၢ်အံၤအဃိ ကီၢ်အမဲရကၤကျိၣ်စ့ဝဲၤကျိၤလၢအဟံဝဲ DKBA သုးခိၣ် ၄ ဂၤလၢဂ့ၢ်ဝီခဲ အံၤန့ၣ် ဖဲအပူၤကွံၥ် (၂၀၂၅)လါမ့ၤအခါန့ၣ်စ့ၢ်ကီး သုးခိၣ် စီၤခၠ့ၣ်သူၤ ဃုၥ်ဒီးအဖိခွါ ၂ ဂၤ တၢ်ဘိးဘၣ်ရၤလီၤဒံးဝဲလၢတၢ်ကဟံ အရ့ဒံးန့ၣ်လီၤ.
တကးဒံးဘၣ်ဖဲန့ၣ်ဝံၤဖဲလါစဲးပထ့ဘၢၣ်အခါန့ၣ်စ့ၢ်ကီး သုးခိၣ်စီၤခၠ့ၣ်သူၤဒီးသုးခိၣ်စီၤတ့ၤဝ့,သုးခိၣ်စီၤမိၣ်သိၤ လၢအမံၤ ဟူသၣ်ဖျါလၢ အတၢ်ပၣ်ဃုၥ်ပၣ်ဂီၢ်အိၣ်လၢ (ကၠါဖၠၣ်) တၢ်ဖံးတၢ်မၤပူၤအကျါအံၤစ့ၢ်ကီး အမဲရကၤ(OFAC)ဘိဘၣ်ရၤလီၤတ့ၢ် ဝဲလၢကဟံဝဲဂ့ၢ်ဝီစ့ၢ်ကီးန့ၣ်လီၤ.
ဒ်ကီၢ်အမဲရကၤပဒိၣ်ထုးထီၣ်ပၥ်ဖျါဝဲအသိးန့ၣ် ထဲဒၣ်(၂၀၂၄)နံၣ်အတီၢ်ပူၤ ခီဖျိလၢ(ကၠါဖၠၣ်)တၢ်လံၣ်အီၣ်လီအီၣ် တၢ်ဖံးတၢ်မၤ အံၤအဃိ အမဲရကၤထံဖိကီၢ်ဖိအစ့ဆှူကွံၥ်အါအါဂီၢ်ဂီၢ်ဒီး လၢထံဂုၤကီၢ်ဂၤတၢ်ဆီၣ်သနံးအကလုၥ်ကလုၥ်အပူၤဘၣ်ဆၣ်တုၤ လၢခဲအံၤတၢ်သ့ၣ်တဖၣ်အံၤတလီၤမၢ်ဒံးဝဲဘၣ်အမဲၥ်ညါ ဟဲအါထီၣ်ဝဲ(၆၆)မျးကယၤအဂ့ၢ်န့ၣ် စံးဝဲန့ၣ်လီၤ.
လၢတၢ်န့ၣ်အဃိတကတီၢ်ခါခဲအံၤ ဒ်သိး(ကၠါဖၠၣ်)တၢ်ဖံးတၢ်မၤလၢအပညိၣ်ဝဲပှၤကီၢ်အမဲရၤထံဖိကီၢ်ဖိသ့ၣ်တဖၣ်အံၤ ကလီၤမၢ် ကွံၥ်အဂီၢ်န့ၣ် ကီၢ်အမဲရကၤပဒိၣ် ဒုးအိၣ်ထီၣ်ဝဲကရူၢ်လီၤဆီလၢအဘၣ်တၢ်ကိးအမံၤလၢ(Scam Center Strike Force) အံၤလံ န့ၣ်လီၤ.
ကၠါဖၠၣ်တၢ်ဖံးတၢ်မၤအံၤအိၣ်ဆီလီၤသးလၢကညီကီၢ်စဲၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ သူမှဲကျိဝၢ်ခီ သုးမီၤစိရိၤစုတီၤဖီလၥ် စွ့ၤကိၣ်ကိၤ(BGF),(DKBA) ဟီၣ်ကဝီၤပူၤဒီး ဒ်န့ၣ်အသိးခီဖျိလၢထံဂုၤကီၢ်ဂၤအတၢ်ဆီၣ် သနံးအံၤအဃိ ဖဲအပူၤကွံၥ်လါအီး ကထိဘၢၣ်အခါန့ၣ် သုးမီၤစိရိၤဒီး (BGF)နုၥ်လီၤမၤဟးဂီၤဝဲတၢ်သူၣ်ထီၣ်ဘှီထီၣ်ဒံးဖဲ (KK Park)ကရၢၢ်ပူၤအံၤန့ၣ်လီၤ.
