လါနိၣ်ဝ့ဘၢၣ် ၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ်အပူၤ အပူၤကွံၥ်စှၤသီအခါ ဘူးဒးကညီသုးမုၢ်ဒိၣ်(DKBA) အပှၤ ဖီၣ်ဝဲသဝီဖိ(၂)ဂၤဒီး ဖဲန့ၣ်အကျါတဂၤန့ၣ်တုၤလၢခဲအံၤတပျၢ်လီၤဝဲဒံးဘၣ် မၢတၢ်လဲၤရ့ထီၣ်ဝဲဒီးစ့အကလီၢ်(၅၀)ကၠးအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.
ဖဲအပူၤကွံၥ်လါအီးကထိဘၢၣ် ၃၀ သီ ဒီး တလါအံၤလါနိၣ်ဝ့ဘၢၣ်ထီၣ် ၁ သီအနံၤန့ၣ် ဟ့ၣ်ထီၣ်ဝဲတၢ်ဂ့ၢ်လၢပှၤသ့ၣ်တဖၣ်အံၤ မ့ၢ်ဝဲကီၢ်သူလ့ၤအပှၤတၢ်မဲၥ်ချံအဃိ (DKBA)သုးခိၣ်ဘိၤဘံၣ်အပှၤဖီၣ်ဝဲဝၣ်မံၤပှၢ်သဝီဖိ စီၤဖီထံခုၣ်(၄၀)နံၣ်အံၤဒီး ထံဃီဝါသဝီဖိ စီၤမၠ့ၣ်စိ(၄၆)နံၣ် ခံဂၤအံၤန့ၣ်လီၤ.
တကီၢ်ခါခဲအံၤပှၤကမျၢၢ်(၂)ဂၤအကျါဝၣ်မံၤပှၢ်သဝီဖိန့ၣ် ဖဲလါနိၣ်ဝ့ဘၢၣ် ၃ သီအနံၤ တၢ်ပျၢ်လီၤက့ၤဝဲလံဘၣ်ဆၣ် မ့မ့ၢ်ထံဃီဝါ သဝီဖိ စီၤမၠ့ၣ်စိအံၤန့ၣ် တုၤလၢခဲအံၤတၢ်တပျၢ်လီၤဝဲဒံးဘၣ်ဒီး(DKBA)မၢပှၤဟဲက့ၤရ့ထီၣ်အိမလၢစ့ပယီၤအကလီၢ်ယဲၢ်ဆံ (၅,၀၀၀,၀၀၀) အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဘၣ်ဃးဒီးတၢ်ဂ့ၢ်အံၤ လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤစံးဝဲလၢ“အဖီၣ်ပှၤကမျၢၢ်န့ၣ်ခဲလၢၥ်(၂)ဂၤ,လၢထံဃီဝါတဂၤ ဒီးဝၣ်မံၤပှၢ်တဂၤ.လၢဝၣ်မံၤပှၢ်တဂၤန့ၣ်ပျၢ်လီၤဝဲလံ.မ့မ့ၢ်လၢထံဃီဝါသဝီဖိတဂၤန့ၣ်တပျၢ်လီၤဝဲဒံးဘၣ်.ခဲအံၤပနၢ်ဟူအဒုးဃၥ်အီၤ.မၢပှၤဟဲရ့ထီၣ်အီၤအကလီၢ်ယဲၢ်ဆံ.မ့ရ့ထီၣ်သးန့ၣ်တလိၣ်ကဲသီခါသုး(DKBA)ဘၣ်.မ့တရ့ထီၣ်သးဘၣ်န့ၣ်ကဘၣ်ကဲသီခါသုးဒ်န့ၣ်.ပှၤခံဂၤအံၤအဝဲသ့ၣ်တဲဝဲလၢအကဲကီၢ်သူလ့ၤတၢ်မဲၥ်ချံမီၤနီၤ.အနီၢ်ကီၢ်န့ၣ်ပှၤသ့ၣ်တဖၣ်အံၤကဲဝဲပှၤသဝီဖိလီၤ.ဖဲအသမံသမိးဝဲအခါထံၣ်ဝဲလၢဖိပူၤလၢအိၣ်ဒီးပှၤလၢအံၤတကပၤအဖိနီၣ်ဂံၢ်.နကဲပှၤသဝီဖိဒုပှၤဆဲးနၤဖိဒုနကဘၣ်ဖီၣ်ဝဲလီၤသၢၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ပှၤသဝီဖိလၢတၢ်ဖီၣ်ဝဲ(၂)ဂၤအံၤ (DKBA)တကပၤမ့လိၥ်ကွီၢ်အဝဲသ့ၣ်လၢဟ့ၣ်တၢ်ကစီၣ်ဆူကီၢ်သူလ့ၤပှၤအအိၣ်ဘၣ်ဆၣ် မ့မ့ၢ်တခီ ပှၤခံဂၤအံၤမ့ၢ်ဝဲကမျၢၢ်အတၢ်ဘၣ်ထွဲတအိၣ်ဝဲဒီးကီၢ်သူလ့ၤပှၤနီမံၤဘၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ တဂၤဃီဝဲန့ၣ် စံးအါထီၣ်ဝဲန့ၣ်လီၤ.
ဒ်လီၢ်ကဝီၤပှၤဘၣ်မူဘၣ်ဒါစံးဝဲအသိးန့ၣ် ပှၤလၢအဖီၣ်ဝဲဝၣ်မံၤပှၢ်ဒီးထံဃီဝါသဝီဖိ(၂)ဂၤအံၤန့ၣ်မ့ၢ်ဝဲ (DKBA)သုးခိၣ်စီၤအဲၣ်ဒိၣ်, သုးခိၣ် စီၤသီမၠး ဒီးလၢန့ၣ်အမဲၥ်ညါပှၤသဝီဖိခံဂၤအံၤဖဲတၢ်ဖီၣ်အဝဲသ့ၣ်အခါတၢ်ထိတၢ်တီၢ်,တၢ်မၤဒၢၣ်မၤလီၤ အဝဲသ့ၣ် နးနးကျံၤ ကျံၤအိၣ်ဝဲဒၣ်န့ၣ်လီၤ.
တကးဒံးဘၣ် ဝၣ်မံၤပှၢ်သဝီဃၢၤကျဲဖးဒ့လၢကလဲၤဆူပြၢးကီးချံသန့ဒီးထံဃီဝါချံသန့လၢ(DKBA)ဂုၥ်ကျဲးစၢးနုၥ်လီၤဆီလီၤတြဲၤ ဖဲအပူၤကွံၥ်လါအီးကူးအခါအံၤန့ၣ် ဖဲတလါအံၤလါနိၣ်ဝ့ဘၢၣ်ထီၣ် ၁ သီအနံၤ အဝဲသ့ၣ်တ့ထီၣ်အလီၢ်အကျဲဒ်သုးကလၢၤအသိးဝံၤ စးထီၣ်ဆီလီၤ တြဲၤခိးထၢဝဲ(မီၤခိၤ)သိလ့ၣ်,ဆဲးကၢးလၢအိၣ်ဟဲက့ၤလီၤလၢမၠၣ်ဝတံၣ်ထံဆၢကီၢ်ဆၢတကပၤအံၤလံအဂ့ၢ်န့ၣ် ကမျၢၢ်လၢအိၣ်ဘူး ဖဲန့ၣ် တဂၤစ့ၢ်ကီး စံးဝဲန့ၣ်လီၤ.
“ခဲအံၤအဝဲသ့ၣ်တ့ထီၣ်အလီၢ်အကျဲဝံၤလၢၤလံ.တ့ထီၣ်ဝဲဒ်သိးပယီၤတ့ထီၣ်အသုးကလၢၤန့ၣ်မီၤနီၤ.အိၣ်ခိးဃ့အိၣ်တၢ်ဖဲန့ၣ်လီၤ. သိလ့ၣ်လၢအလံၥ်လဲၢ်တအိၣ်(without)ကါဖိန့ၣ်ဃ့အီၣ်ဝဲတခိၣ်(၅၀,၀၀၀),မ့မ့ၢ်ကါလၢအတီၣ်တၢ်ဖိတၢ်လံၤတဖၣ်န့ၣ်ဃ့ဝဲတခိၣ်န့ၣ်(၁၀၀,၀၀၀)ဘျဲၣ်ညါ.လၢဆဲးကၢး (မီၤခိၤ)ခီန့ၣ်တခိၣ်န့ၣ်ဃ့ဝဲ(၅၀၀၀). အအိၣ်ခိးတၢ်တခါန့ၣ်ဘၣ်လၢပှၤလ့ၢ်ထီၣ်လ့ၢ်လိၤ အကျဲကွၢ် ဝဲ လၢကအီၣ်ဘၣ်ဝဲအဃိဆီလီၤဝဲတြဲၤလီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိး(DKBA)လၢအအိၣ်ဆီလီၤသးဖဲတြဲၤအံၤတဖၣ်တၢ်တယးကွၢ်ဝဲလၢအဂံၢ်ဘါကအိၣ်ဝဲအဂၤ(၅၀)ခိၣ်ဃၢၤဒီး အဝဲသ့ၣ်အံၤဒ်သိးတၢ်လဲၤခးအဝဲသ့ၣ်သုတန့ၢ်ညီညီတဂ့ၤအဂီၢ် တြဲၤတၢ်သမံသမိးလီၢ်အံၤအမဲၥ်ညါ လၢဝၣ်မံၤပှၢ်သဝီပူၤ စ့ၢ်ကီး(DKBA)အပှၤအိၣ်ဆီလီၤသးဝးဝးတရံးန့ၣ်လီၤ.
တကီၢ်ခါခဲအံၤစ့ၢ်ကီးဟီၣ်ကဝီၤပူၤဖဲန့ၣ်စးထီၣ်လၢ(DKBA)ဆီလီၤတြဲၤန့ၣ် စးထီၣ်ဟါခီ ၆း၀၀ နၣ်ရံၣ် တုၤဂီၤခီ ၆း၀၀ နၣ်ရံၣ် မ့တမ့ၢ်တၢ်အိၣ်ဆူၣ်အိၣ်ချ့တၢ်ဂ့ၢ်တၢ်ကျိၤဘၣ်န့ၣ်ဟးထီၣ်က့ၤလီၤတန့ၢ်ဝဲလၢၤဘၣ်အဂ့ၢ်န့ၣ် လီၢ်ကဝီၤကမျၢၢ် စံးဝဲအသိး သ့ၣ်ညါဘၣ်န့ၣ်လီၤ.
