လါဒံၣ်စ့ဘၢၣ် ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် အံလူၢ်ကရူၢ်အပူၤ ဖဲမဟါအနံၤပယီၤသုးကျိၤ နုၥ်လီၤဒီးခးလီၤကျိဖးဒိၣ်အဃိ သဝီဖိသံဝဲ ၂ ဂၤဒီး ဖီၣ်ဝဲသဝီဖိအိၣ်တနီၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤကမျၢၢ်အအိၣ်န့ၣ်လီၤ.
ဖဲမဟါလါဒံၣ်စ့ဘၢၣ် ၁၂ သီအနံၤန့ၣ် ပယီၤသုးကျိၤနုၥ်လီၤလၢဖိဝၣ်သ့ၤ(ဖိုး၀သိမ်),(ညောင်ထောက်),(ရှမ်းစု)ဒူသဝီတကပၤဒီးခးလီၤ ကျိဖးဒိၣ်လီၤတဲၥ်ပိၢ်ဖးထီၣ်ဝဲလၢဖိဝၣ်သ့ၤသဝီပူၤအဃိ ဘၣ်သံဝဲသဝီဖိပိၥ်ခွါ ၂ ဂၤဒီးဘၣ်ဒိဘၣ်ထံဒီးဝဲတဂၤအဂ့ၢ်န့ၣ် သဝီဖိလၢအိၣ်ဘူးဖဲန့ၣ်တဂၤ စံးဝဲန့ၣ်လီၤ.
အဝဲစံးဝဲလၢ“ဖဲမဟါအနံၤန့ၣ်ပယီၤသုးကျိၤနုၥ်လီၤလၢဖိဝါသ့ၤသဝီပူၤ.အဝဲသ့ၣ်ခးလီၤကျိဖးဒိၣ်အဃိသဝီဖိသံ ၂ ဂၤ ဘၣ်ဒိတဂၤ. အဝဲတဂၤန့ၣ်အသံလၢကျဲပူၤလီၤ.အဘၣ်သီသီအခါန့ၣ်ပှၤလဲၤထၢတဘူၣ်နီတဂၤဘၣ်.ပယီၤသုးတထံၣ်ချုးလၢၤဘၣ်မးပှၤလဲၤထၢ ဝံၤပှၤလဲၤဆှၢလၢတၢ်ဆါဟံၣ်ဘၣ်ဆၣ်ခီဖျိအသွံၣ်ထီၣ်အါအဃိသံဝဲလၢကျဲန့ၣ်.ခဲအံၤပယီၤသုးကျိၤဟဲနုၥ်လီၤလံဖဲအံလူၢ်ဖးဒိၣ်သဝီပူၤ သီခါဖၠၣ်န့ၣ်.အဝဲသ့ၣ်ဟဲထီၣ်ခါန့ၣ်ပှၤခိးလီၤအခိၣ်ဘၣ်ဆၣ်တတိဘၣ်.”အဂ့ၢ်န့ၣ် အံလူၢ်သဝီဖိ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
လၢန့ၣ်အမဲၥ်ညါပယီၤသုးကျိၤလၢအနုၥ်လီၤသ့ၣ်တဖၣ်အံၤဖဲဟဲတုၤလၢအံလူၢ်သဝီဖးဒိၣ်ပူၤအခါန့ၣ်စ့ၢ်ကီး ဖီၣ်ဝဲသဝီဖိအိၣ်ဝဲတနီၤ အဂ့ၢ်န့ၣ် သဝီဖိပိၥ်မုၣ်လၢအသ့ၣ်ညါတၢ်ဂ့ၢ်ကဲထီၣ်သးအံၤတဖၣ်စံးဝဲန့ၣ်လီၤ.
“ပယီၤသုးကျိၤလၢအနုၥ်လီၤဖဲမဟါတဒူၣ်န့ၣ်ခဲအံၤအဝဲသ့ၣ်မၤအါထီၣ်သုးဂံၢ်ဘါ.ခဲအံၤဟဲတုၤလၢဖိဝၣ်သ့ၤသဝီ,သပၠ့ၤနံၤသဝီ,အံလူၢ်သဝီဖးဒိၣ်ဒီဒူၣ်ညါလီၤ.ပနၢ်ဟူလၢအံလူၢ်သဝီဖးဒိၣ်တကပၤန့ၣ်ပယီၤသုးဖီၣ်ပှၤကမျၢၢ်အိၣ် ၃ ဂၤလံ”အဂ့ၢ်န့ၣ် စံးဝဲန့ၣ်လီၤ.
ကၠဲးထိၣ်ကီၢ်ဆၣ်ပူၤစးထီၣ်လၢသုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် ပယီၤသုးခးလီၤကျိဖးဒိၣ်တလီၢ်လီၢ်အမဲၥ်ညါ တၢ်ဒုးကဲထီၣ်ဝဲ လၢပယီၤသုးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ်အဘၢၣ်စၢၤအိၣ်ဝဲတလီၢ်လီၢ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါအံလူၢ်ကရူၢ်ဒူသဝီအပူၤအံၤအပူၤကွံၥ် ညီနုၢ်န့ၣ်ပယီၤသုးကျိၤနုၥ်လီၤဟူးဂဲၤအိၣ်ဝဲအသိး ဖဲမဟါခီဖျိ ပယီၤသုးကျိၤနုၥ်လီၤခးလီၤကျိဖးဒိၣ် ကမျၢၢ်စ့ၢ်ကီးသံဘၣ်ဒိဘၣ်ထံးအိၣ်ထီၣ်အဖီခိၣ်ကမျၢၢ်လၢအိၣ်ဘူးဖဲန့ၣ်တဖၣ်ခဲလၢၥ် ပျံၤတၢ်ဃ့ၢ် ထီၣ်ဟးပလဲၥ်သးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
