လါဒံၣ်စဲဘၢၣ် ၅သီ, ၂၀၂၅နံၣ်, ခ့ၣ်အဲးစံၣ်,
န့ဆၢၣ်ခိၣ်ဃၢၤတဖၣ်သုတဟးဂီၤအါထီၣ်လၢၤတဂ့ၤဒီး,တၢ်ကကတီၤဝဲခိၣ်ဃၢၤန့ဆၢၣ်တဖၣ်အဂီၢ်,တၢ်ဒုးအိၣ်ထီၣ်ဝဲမူခိၣ်ကလံၤသီၣ်ဂီၤတၢ်ကသုၣ်ကသံးတၢ်မၤရဲၣ်ကျဲၤအဂ့ၢ်,ကီၢ်သူလ့ၤတၢ်ရဲၣ်သဲကတီၤခိၣ်ဃၢၤန့ဆၢၣ်ဒီးန့ဆၢၣ်တၢ်အိၣ်ယၢၤကမံတံၥ်(K-NRECC)ဘိးဘၣ်ရၤလီၤဝဲဒၣ်ဖဲမဟါလါဒံၣ်စဲဘၢၣ်(၄)သီအနံၤန့ၣ်လီၤ.
ခီဖျိမူခိၣ်ကလံၤသီၣ်ဂီၤဟီၣ်ခိၣ်ကပံၥ်ဒီးန့ဆၢၣ်ခိၣ်ဃၢၤတၢ်တတၢၤတနါတၢ်ဘၣ်ဒိဘၣ်ထံးအဃိ,ဒိဘၣ်ဝဲပှၤကညီတဖၣ်တဖၣ်တၢ်အိၣ်မူအိၣ်ဂဲၤဒီးတၢ်ဖံးအီၣ်မၤအီၣ်အကပၤကပၤအိၣ်ဝဲအဂ့ၢ်,ကီၢ်သူလ့ၤတၢ်ရဲၣ်သဲကတီၤခိၣ်ဃၢၤန့ဆၢၣ်ဒီးန့ဆၢၣ်တၢ်အိၣ်ယၢၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢတၢ်န့ၣ်အဃိ,တၢ်ဘိးဘၣ်ပၥ်ဖျါဝဲတၢ်ရဲၣ်ကျဲၤအံၤအတၢ်ပညိၣ်မ့ၢ်ဒ်သိးတၢ်ကဘၣ်ဟးဆှဲးဝဲတၢ်မၤဘၣ်ဒိခိၣ်ဃၢၤန့ဆၢၣ်ဒီးတၢ်ကပၥ်ဃုၥ်ပၣ်ဃုၥ်ပၣ်ဂီၢ်လၢတၢ်မၤဂ့ၤထီၣ်ခိၣ်ဃၢၤန့ဆၢၣ်အဂ့ၢ်,(KNRECC)နဲၣ်ရွဲၣ်ပဒိၣ်စီၤဆၢပှဲၤစံးဝဲဒ်အံၤန့ၣ်လီၤ. “မူခိၣ်ကလံၤသီၣ်ဂီၤတၢ်ကသုၣ်ကသံးသုတကဲထီၣ်လၢၤတဂ့ၤဒီးန့ဆၢၣ်ခိၣ်ဃၢၤသုတဟးဂီၤလၢၤတဂ့ၤကအိၣ်က့ၤဒ်လၢညါအဂီၢ်တၢ်ကဘၣ်ဟးဆှဲးဝဲမနုၤသ့ၣ်တဖၣ်လဲၣ်,တၢ်ကဘၣ်ကတီၤဝဲမနုၤသ့ၣ်တဖၣ်လဲၣ်,တၢ်ကဘၣ်မၤဝဲမနုၤသ့ၣ်တဖၣ်လဲၣ်န့ၣ်ကမျၢၢ်သ့ၣ်တဖၣ်ကသ့ၣ်ညါဒီးပၣ်ဃုၥ်ပၣ်ဂီၢ်ဝဲအဂီၢ်မ့ၢ်ပတၢ်ပညိၣ်ဘိးဘၣ်ရၤတၢ်ပညိၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,မူခိၣ်ကလံၤသီၣ်ဂီၤအတၢ်ကသုၣ်ကသံးအံၤမၤဘၣ်ဒိဝဲပှၤဟီၣ်ခိၣ်ဖိတုၤလၢတၢ်သံတၢ်ပှၢ်ပတီၢ်အိၣ်ဝဲအဃိ,တၢ်ကတီၤခိၣ်ဃၢၤန့ဆၢၣ်အံၤအကါဒိၣ်ဝဲလၢပှၤတဝၢအဂီၢ်ဃုၥ်ဒီးဟီၣ်ခိၣ်ဒီဘ့ၣ်အဂ့ၢ်စံးစ့ၢ်ကီးဝဲဒၣ်န့ၣ်လီၤ.
ကီၢ်သူလ့ၤတၢ်ပၢဟီၣ်ကဝီၤအပူၤတၢ်ကမၤဆူၣ်ထီၣ်တၢ်သ့တူၢ်တၢ်ဒီးခီၣ်ဆၢတၢ်ကသုၣ်ကသံးဒီးမၤဂ့ၤထီၣ်ခိၣ်ဃၢၤန့ဆၢၣ်အတၢ်ယူၥ်ကၢအဂီၢ်,တၢ်ဒုးအိၣ်ထီၣ်မူခိၣ်ကလံၤသီၣ်ဂီၤတၢ်ကသုၣ်ကသံးတၢ်မၤရဲၣ်ကျဲၤအံၤယံၥ်ဝဲ(၂)နံၣ်အဂ့ၢ်(KNRECC)အပူၤပၥ်ဖျါဝဲဒၣ်လၢလံၥ်ဘိးဘၣ်ရၤလီၤအပူၤန့ၣ်လီၤ.
ဒီးတၢ်ရဲၣ်ကျဲၤအံၤမ့ၢ်တၢ်အဆိကတၢၢ်တခါလၢဟီၣ်ကဝီၤအပူၤလၢအပၥ်ဖျါထီၣ်ဝဲတၢ်ဒိတၢ်တဲၥ်လၢအဘၣ်ဃးဒီးပှၤထူလံၤဖိဒီးကလုၥ်ဒူၣ်ဖိအတၢ်ပၢတၢ်ြပးဆူတၢ်လီၢ်အဂၤတဆီဆူဟီၣ်ခိၣ်ဒီဘ့ၣ်အဂ့ၢ်,ပၥ်ဖျါဝဲဒၣ်န့ၣ်လီၤ.
တကတီၢ်ဃီ,တၢ်ရဲၣ်ကျဲၤအံၤမ့ၢ်ဝဲဂံၢ်ခီၣ်ထံးတၢ်မၤဘၣ်ဃးတၢ်ကသုၣ်ကသံးတၢ်မၤရဲၣ်ကျဲၤအတကွီၢ်တခါလၢအပၣ်ဃုၥ်ဒီးပှၤထူလံၤဖိလုၢ်လၢ်ထူသနူမိၢ်လုၢ်ပၢ်လၢ်မၤတ့ၢ်ဝဲတဖၣ်တကးဘၣ်,ပၣ်ဃုၥ်ဝဲဒီးတကီၢ်ခါဆူညါခ့ၣ်အဲၣ်ယူၣ်အတၢ်မၤရဲၣ်ကျဲၤဟီၣ်ခိၣ်ကပံၥ်,သ့ၣ်ပှၢ်,လီသဟီၣ်ဖီၣ်လ်စံၣ်တဖၣ်,လီၢ်ကဝီၤပှၤထူလံၤဖိ,ဒီးကရၢသဘျ့မၤတ့ၢ်ဝဲသ့ၣ်တဖၣ်အသိး,မ့ၢ်တၢ်အၢၣ်လီၤလၢအဘၣ်ဃးဒီးတၢ်မၤစှၤလီၤဝဲတၢ်ကသုၣ်ကသံးအဆိကတၢၢ်တခါလၢတၢ်ဒုးအိၣ်ထီၣ်ပၢဆှၢရဲၣ်ကျဲၤအီၤလၢလီၢ်ကဝီၤကလုၥ်ဒူၣ်တၢ်ကရၢကရိလၢကီၢ်ပယီၤအပူၤအဂ့ၢ်,ပၥ်ဖျါစ့ၢ်ကီးဝဲဒၣ်န့ၣ်လီၤ.
ဒ်န့ၣ်အသိး,တၢ်မၤရဲၣ်ကျဲၤအံၤကကဲထီၣ်လိၣ်ထီၣ်အဂီၢ်ကဒိးသန့ၤထီၣ်သးလၢထံဂုၤကီၢ်ဂၤတၢ်ပၥ်ပနီၣ်ဝဲအဖီခိၣ်,ကဆၢထၢၣ်သကိးဒီး,ကအိၣ်ဃူပၥ်ဖှိၣ်မၤသကိးတၢ်အဂ့ၢ်()ဘိးဘၣ်ဒုးသ့ၣ်ညါဝဲဒၣ်န့ၣ်လီၤ.
