လါဒံၣ်စ့ဘၢၣ် ၁၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဘုသိၣ်ကီၢ်ဆၣ် ဘုအါဒၢကရူၢ်အပူၤ ကဘီယူၤလဲၤခးလီၤတၢ်အဃိ ဘၣ်သံဝဲဖိသၣ်တဂၤဒီး ကမျၢၢ်ဘၣ်ဒိတစှၤန့ၢ်ဝဲ ၁၀ ဂၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲလါဒံၣ်စ့ဘၢၣ် ၁၂ သီ မုၢ်နၤခီအဆၢကတီၢ် တၢ်ဒုးကဲထီၣ်တအိၣ်ပယီၤသုးကဘီယူၤလဲၤတ့ၢ်လီၤဝဲမ့ၣ်ပိၢ်လၢ ဘုအါဒၢကရူၢ် မးမုၢ်သဝီပူၤအဃိ တၢ်သံတၢ်ဘၣ်ဒိဘၣ်ထံးဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ် ကီၢ်ရ့ၣ်ခိၣ် ပဒိၣ်စီၤထဲဒၢၣ် စံးဝဲန့ၣ်လီၤ.
“ကဘီယူၤဒုဟဲခးတၢ်တဘျုးဘျီလံ.မဟါအနံၤန့ၣ်ခးဝဲဒၣ်လၢအဘူးဃိၣ်လိၥ်ကျိနံၤအဃိ ပှၤဘၣ်ဒိ ၁၀ ဘျဲၣ်ညါ. သံဝဲဒၣ်ပှၤဖိသၣ် ၁ ဂၤ.” အဂ့ၢ်န့ၣ် စံးဝဲန့ၣ်လီၤ.
မုၢ်တြီၢ်ကီၢ်ရ့ၣ်ဟီၣ်ကဝီၤအပူၤ သုးဟံန့ၢ်တၢ်စိတၢ်ကမီၤဝံၤလီၢ်ခံတုၤဃီၤလၢတလါအံၤတၢ်ဃုထၢဘူးထီၣ်အံၤတစု သုးမီၤစိရိၤသူဝဲ ကဘီယူၤ ဟးတ့ၢ်လီၤမ့ၣ်ပိၢ်အိၣ်ဝဲတလီၢ်လီၢ်အသိး ဖဲအပူၤကွံၥ်လါနိၣ်ဝ့ဘၢၣ် ၂၂ သီ ဂီၤခီ ၁၀ နၣ်ရံၣ် အဆၢကတီၢ် လၢလူၤသီကီၢ်ဆၣ် ဖျးခိၣ်ကရူၢ်အပူၤ ကဘီယူၤလဲၤတ့ၢ်လီၤမ့ၣ်ပိၢ်အဃိ ကၠိဖိပိၥ်မုၣ်အနံၣ် ၁၀ ဘျဲၣ် ၂ ဂၤ ဘၣ်ဒိဘၣ်ထံး ဝဲနးနး ကဲထီၣ်ဒံးဝဲန့ၣ်လီၤ.
ဒ်န့ၣ်အသိးဖဲလါဒံၣ်စ့ဘၢၣ် ၁၀ သီ ဒီး ၈ သီအနံၤစ့ၢ်ကီး လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်စိကီၢ်ဆၣ် လ့ၣ်ပ့ၣ်(လိန်ပင်) သဝီ ဒီး ကၠီစရ့(ကျောက်စရစ်)မုၢ်ထီၣ်သဝီအပူၤ သုးမီၤစိရိၤ(jet fighter)ကဘီယူၤလဲၤတ့ၢ်လီၤဝဲမ့ၣ်ပိၢ်ဒီးခးလီၤဝဲဒြိ, ခးလီၤကျိဖးဒိၣ် အံၤအဃိ ဘၣ်သံဝဲ ကမျၢၢ်အနံၣ်(၄၀)ဘျဲၣ် ၂ ဂၤ ဒီး သီခါ(၇၈)နံၣ်တပါအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါ ဝဲန့ၣ်လီၤ.
တကးဒံးဘၣ်ကဘီယူၤဒီးပယီၤသုးခးလီၤကျိဖးဒိၣ်ဘျီဝဲအံၤ ဖိသၣ်ပိၥ်ခွါ(၁၃)နံၣ်ဘၣ်ဒိတဂၤဒီး သီခါဖၠၣ်(၂)ဖျၢၣ်, တၢ်ဟ့ၣ် ကသံၣ်ဒၢး(၁)ဖျၢၣ် ,ကမျၢၢ်တၢ်သူၣ်ထီၣ်(၇)ဖျၢၣ်,စံးမၤစံၥ်(၂)ခိၣ်,ကျးဆါတၢ်(၁)ဖျၢၣ်,ထီၣ်လၣ်ကၠံၣ်(ထော်လာဂျီ) ၁ ခိၣ် ဟးဂီၤဝဲ ဒီး ကျီၢ်သံဝဲ(၇)ဒုအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဒ်န့ၣ်အသိးလၢရခၢၣ်ကီၢ်စဲၣ် မၠီၣ်အူဝ့ၢ်တကပၤန့ၣ်စ့ၢ်ကီး ဖဲလါဒံၣ်စ့ဘၢၣ် ၁၀ သီ ဟါခီ ၉း၀၀ နၣ်ရံၣ်ဘျဲၣ်အဆၢကတီၢ် သုးမီၤစိရိၤ ကဘီယူၤလဲၤတ့ၢ်လီၤဝဲ(၅၀၀)ပီၣ်မ့ၣ်ပိၢ်လၢကမျၢၢ်တၢ်ဆါဟံၣ်အဃိ ဖဲန့ၣ်ကမျၢၢ်သံဝဲ(၃၄)ဂၤဒီး ဘၣ်ဒိဘၣ်ထံး ၆၀ ဘျဲၣ် န့ၣ်လီၤ.
သုးမီၤစိရိၤလၢအပညိၣ်ဝဲကမျၢၢ်ထံဖိကီၢ်ဖိအတၢ်ဆါဟံၣ်တၢ်သူၣ်ထီၣ်လိၤလိၤအံၤ လုၢ်သ့ၣ်ခါပတၥ်မၤကမၣ်ဝဲ ဟီၣ်ခိၣ်ဒီဘ့ၣ် တၢ်သိၣ်တၢ်သီတၢ်ဘျၢအဖီခိၣ် ထီဒါဝဲတဲၥ်တဲၥ်ဖျုဖျုဒီး ဒ်ဟီၣ်ခိၣ်ဒီဘ့ၣ်တၢ်ဘျၢသဲစးအသိးန့ၣ်အလီၢ်အိၣ်လၢ တၢ်ကဘၣ်ပၥ်ပနီၣ် အီၤ လၢသုးဂ့ၢ်ဝီကွီၢ်မ့ၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်ပၥ်ဖျါစံးဝဲဖဲမဟါအနံၤအိၣ်ဝဲန့ၣ်လီၤ.
လၢတၢ်န့ၣ်အဃိ တၢ်စုဆူၣ်ခီၣ်တကးလၢသုးမီၤစိရိၤကရူၢ်မၤဝဲအံၤတဖၣ်ကပတုၥ်ကွံၥ်သးအဂီၢ် အလီၢ်အိၣ်လၢတၢ်ကဟံထီၣ်ဖီၣ် ထီၣ်ဂ့ၢ်ဝီတုၤလီၤတီၤလီၤ ဒီး ကမျၢၢ်ထံဖိကီၢ်ဖိလၢအဘၣ်တူၢ်ဘၣ်ခီၣ်တၢ်သ့ၣ်တဖၣ်အံၤဒ်သိးကဒိးန့ၢ်ဘၣ် တၢ်တုၤသိးထဲသိးအဂီၢ် ဟီၣ်ခိၣ်ဒီဘ့ၣ်ကဟ့ၣ်ဝဲဂ့ၢ်ဂီၢ်အူတၢ်ဒီသဒၢဆူကမျၢၢ်ထံဖိကီၢ်ဖိတဖၣ်အအိၣ်တုၤလီၤတီၤလီၤအဂ့ၢ်န့ၣ် ခ့ၣ်အဲၣ်ယူၣ်ဃ့ထီၣ်စ့ၢ်ကီး ဝဲန့ၣ်လီၤ.
