လါဒံၣ်စဲဘၢၣ် ၄သီ, ၂၀၂၅နံၣ်, ခ့ၣ်အဲးစံၣ်.
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ရမၤတံဝ့ၢ်ကလံၤထံး တၢ်ဘၣ်ဘျုးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်-(DKBA) တၢ်ပၢဟီၣ်ကဝီၤ ကၠီးခဲးတၢ်လီၢ်အပူၤ ကၠါဖၠၣ်တၢ်မၤလီၢ်အ Website domain တခါ ကီၢ်အမဲရကၤ FBI မၤန့ၢ်ဒီးပံးကွံၥ်ဝဲဒၣ်အဂ့ၢ် FBI ပၥ်ဖျါတ့ၢ်ဝဲဒၣ်ဖဲအပူၤကွံၥ်လါဒံၣ်စဲဘၢၣ်(၁၂)သီအနံၤန့ၣ်လီၤ.
ဒ် FBI စၤဒံၤယ့ၤကိၤ ပၥ်ဖျါဝဲဒၣ်အသိးန့ၣ် အဝဲသ့ၣ်တၢ်ဃုသ့ၣ်ညါအဖီခိၣ် ကီၢ်ပယီၤပူၤ DKBA တၢ်ပၢ ကၠီးခဲးဟီၣ်ကဝီၤ Tai Chang ကၠါဖၠၣ်တၢ်လီၢ် အ Website လၢကသူဝဲလၢတၢ်လံၣ်အီၣ်လီအိၣ်ကျိၣ်စ့အဂီၢ် ဒီးအိးထီၣ်ဃၥ်ဝဲလၢအမ့ၢ် “Tickmilleas.com”အံၤန့ၣ် Scam Center Strike force ဟံးန့ၢ်ကွံၥ်ဝဲဒၣ်လံအဂ့ၢ် ပၥ်ဖျါဝဲဒၣ်န့ၣ်လီၤ.
Tickmilleas.com website အံၤပၥ်မၤအသးဒ် ဖိးသဲစးတၢ်ဘျၢလီၤကျိၣ်စ့လီၢ်ပျဲၢ်စီၤတခါဒီးလံၣ်အီၣ်ပှၤကညီဒ်သိးပှၤကဘျၢလီၤကျိၣ်စ့အဂီၢ်အဂ့ၢ် FBI ပၥ်ဖျါဝဲဒၣ်န့ၣ်လီၤ.
Tickmilleas.com website အံၤန့ၣ် တၢ်ကဘၣ်စူးကါဘျးစဲဃုၥ်ဒီး Google Play ဒီး Apple App Store ပူၤ Mobile Application သ့ၣ်တဖၣ်အဂ့ၢ် န့ၣ် ပှၤလံၣ်အီၣ်ကျိၣ်စ့တဖၣ် နဲၣ်ပၠးဝဲဒၣ်တၢ်ကဘၣ်သူအီၤအကျိၤအကျဲအိၣ်အဂ့ၢ်စံးဝဲဒၣ်န့ၣ်လီၤ.
US FBI ဒိးန့ၢ်ဘၣ် ကၠီးခဲးကၠါဖၠၣ် အ Website domain ဒ်အံၤအဖီခိၣ် တၢ်ဂ့ၢ်ကျိၤမနုၤသ့ၣ်တဖၣ်အဝဲသ့ၣ်ကဒိးန့ၢ်ဝဲလဲၣ်န့ၣ် ကညီသးစၢ် IT ပှၤသ့ပှၤဘၣ် စီၤအီၣ်မၠ့ၤ စံးဝဲဒၣ် ဒ်အံၤန့ၣ်လီၤ.
အဝဲစံးဝဲလၢ“တၢ်မ့ၢ်ဒိးန့ၢ်ဘၣ် Domain လံန့ၣ် မံၤလၢအသူဝဲခဲအံၤတဖျၢၣ်န့ၣ်ဆီတလဲဝဲတန့ၢ်လၢၤဘၣ်.FBI ပၢၥ်တံၢ်ဃၥ်ဝဲလံန့ၣ်လီၤ.ဆဲးလံၣ်အီၣ်တၢ်ဒီးပှၤမံၤတဖျၢၣ်အံၤစ့ၢ်ကီးတသ့လၢၤဘၣ်.ဒိးန့ၢ်ဘၣ် Domain မ့ၢ်ဝံၤန့ၣ် ဒိးန့ၢ်ဘၣ်စ့ၢ်ကီးဝဲဒၣ် Website ကမၤတၢ်အဂီၢ် အ source code သ့ၣ်တဖၣ်န့ၣ်လီၤ.တုၤလၢဒိးန့ၢ်ဘၣ် source code လံအဃိန့ၣ် ကၠါဖၠၣ်တဖၣ်အံၤအဝဲသ့ၣ်လံၣ်အီၣ်တၢ်ဒ်လဲၣ်,ဒီးတၢ်ဂ့ၢ်တၢ်ကျိၤလၢအအိၣ်လၢတၢ်ကိပူၤသ့ၣ်တဖၣ်န့ၣ်အမၤတၢ်ဒ်လဲၣ်န့ၣ်အဝဲသ့ၣ်ဒိးန့ၢ်ဘၣ်ဝဲခဲလၢၥ်န့ၣ်လီၤ.”အဂ့ၢ် စံးဝဲဒၣ်န့ၣ်လီၤ.
Tickmilleas.com အ website Domain အမံၤလၢတၢ်သူအီၤခဲအံၤန့ၣ်မ့ၢ်ဝဲဒၣ် ကၠီးခဲး ခၣ်စံၣ်နိၣ်ကိၤစဲ(Casino Kosai) အဂ့ၢ် FBI စံးဝဲဒၣ်န့ၣ်လီၤ.
လၢန့ၣ်အမဲၥ်ညါ အမဲရကၤတၢ်ဒုးထီဒါကၠါဖၠၣ်တၢ်ဖံးတၢ်မၤ Strike force အံၤန့ၣ် တၢၣ်ပီၣ်လိၥ်သးဒီး Meta Company(အပူၤကွံၥ်လၢအမ့ၢ်-Facebook)ဝံၤ ဃုသ့ၣ်ညါဝဲဒၣ် Facebook account လၢအဘၣ်ဃးဒီး Tai Chang ကၠါဖၠၣ်တၢ်ဖံးတၢ်မၤလီၢ်အံၤန့ၣ်လီၤ.
လၢတၢ်န့ၣ်အဃိ Meta company မၤလီၤမၢ်ကွံၥ် Facebook Account အဖျၢၣ်(၂၀၀၀)ဃၣ်ဃၣ်လၢအဘၣ်ဃးဒီး Tai Chang ကၠါဖၠၣ်တၢ်ဖံးတၢ်မၤလီၢ်အဂ့ၢ်သ့ၣ်ညါဘၣ်န့ၣ်လီၤ.
ကၠီးခဲး Tai Chang ကၠါဖၠၣ်တၢ်မၤလီၢ်အံၤန့ၣ် အတၢ်ဘၣ်ထွဲအိၣ်ဒီးအပူၤကွံၥ်လါနိၣ်ဝ့ဘၢၣ်(၁၂)သီ US ဖီၣ်ဃံးဝဲဒၣ် DKBA ခိၣ်နၢ်, Trans Asia International Holding Group Thailand Company Limited(Trans Aisa) အဂ့ၢ် FBI ပၥ်ဖျါဝဲဒၣ်စ့ၢ်ကီးန့ၣ်လီၤ.
