လါယနူၤအရံၤ ၁၃ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါလါယနူၤအါရံၤ ၁၂ သီ ဟါခီအဆၢကတီၢ် ပယီၤသုးကဘီယူၤလဲၤတ့ၢ်လီၤဝဲမ့ၣ်ပိၢ်(၂)ဘျီလၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ် (သုးက့ ၇)လူၢ်ပျဲၢ်ကီၢ်ဆၣ် ကညီဒီကလုၥ်သုးမုၢ်ဒိၣ်(KNA) အူၣ်ဒီ(ဥဒေါင်း) သုးကလၢၤဒီး သဲၣ်တီ (သိုက်တော)သုးကလၢၤတၢ်လီၢ် သ့ၣ်တဖၣ် အံၤအဃိ (BGF)အပှၤသံတဂၤ ဒီး ဘၣ်ဒိ ၆ ဂၤ အဂ့ၢ်န့ၣ် လီၢ်ကဝီၤကမျၢၢ်ဒီး ပှၤဘၣ် မူဘၣ်ဒါ စံးဝဲန့ၣ်လီၤ.
အူၣ်ဒီဒီးသဲၣ်တီ(KNA)သုးကလၢၤချံသန့တၢ်လီၢ်လၢအိၣ်ဃိၣ်လိၥ်ကျိကၢၢ်နံၤအံၤ ဖဲမဟါဟါခီ ၃း၀၀ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးကဘီယူၤလဲၤတ့ၢ်လီၤမ့ၣ်ပိၢ်(၂)ဖျၢၣ် ဒီး မၤကဒီးဖဲ ၄း၀၀ နၣ်ရံၣ်ဘျဲၣ်အဆၢကတီၢ်န့ၣ် ဟဲတ့ၢ်လီၤကဒီးဝဲမ့ၣ်ပိၢ်(၂)ဖျၢၣ် န့ၣ်လီၤ.
လၢတၢ်န့ၣ်အဃိ(KNA)တကပၤသံဝဲ(၁)ဂၤ,ဘၣ်ဒိ(၃)ဂၤ ဒီး ကမျၢၢ်ဘၣ်ဒိ(၃)ဂၤအသိး တၢ်ဟဲခးလီၤတၢ်ဘျီဝဲအံၤကဘီယူၤ အမဲၥ်ညါ ဟဲတ့ၢ်လီၤဃုၥ်ဝဲ(ကၣ်မံၣ်ကၣ်စံၣ်ဒြိ) ၂ ဘျီစ့ၢ်ကီးအဂ့ၢ်န့ၣ် (သုးက့ ၇) ပှၤဘၣ်မူဘၣ်ဒါ စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
(KNA)တၢ်လီၢ်လၢကဘီယူၤလဲၤတ့ၢ်လီၤမ့ၣ်ပိၢ်အံၤခီဖျိအိၣ်ဝဲတခီတဝၢ်ဝၢ်ဒီး(သုးက့ ၁)ဖၣ်အၣ်ကီၢ်ဆၣ်အဃိ ဘၣ်ဃးတၢ်ကဲ ထီၣ်သး ဘျီဝဲအံၤကမျၢၢ်လၢအိၣ်ဘူးဖဲန့ၣ်တဂၤစံးဝဲလၢ “အဟဲကွံၥ်ဝဲန့ၣ် ၂ ဘျီ ၃း၄၀ မံးနံးခါန့ၣ်ဟဲကွံၥ်ဝဲတဘျီ. မ့ဝံၤဖဲ ၄း၀၀ နၣ်ရံၣ်ဘျဲၣ် န့ၣ်ဟဲကွံၥ်ကဒီးဝဲတဘျီ. အကွံၥ်ဝဲန့ၣ်ဘၣ်ဝဲပှၤနီထိဖိ ၄ ဂၤ, ၅ ဂၤဧါညါ. အကျါန့ၣ်သံတဂၤလံ. လၢအဝဲတဂၤ န့ၣ်နါက့နးတချုး လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
(သုးက့ ၇)ဟီၣ်ကဝီၤ အပူၤကွံၥ် ၂၀၂၅ နံၣ်အခါသုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်လၢကီၢ် ကၠီၣ်တဲၣ်-ကီၢ်ပယီၤကီၢ်ဆၢ တၢ်လီၢ်သ့ၣ်တဖၣ်အိၣ်ဝဲဘၣ်ဆၣ် ဘၣ်ဃးသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်လၢ(KNA)တၢ်လီၢ်အံၤ မ့ၢ်တၢ်အဆိ ကတၢၢ် တဘျီန့ၣ်လီၤ.
(KNA)သုးကလၢၤတၢ်လီၢ်ခံတီၤလၢပယီၤသုးကဘီယူၤလဲၤတ့ၢ်လီၤမ့ၣ်ပိၢ်ခဲအံၤန့ၣ် အိၣ်ဝဲလၢသုးဟီၣ်ကဝီၤ-၂ တၢ်ပၢဆှၢဖီလၥ် အသိး အဝဲသ့ၣ်အံၤတဟံဝဲပယီၤသုးလါလဲလၢၤဘၣ်ဒီး မ့မ့ၢ်တခီလၢသုးခိးကီၢ်ဆၢ(BGF)အံၤတဆီဖဲ(၂၀၂၆) လါယူနူၤအါထီၣ် ၁ သီအံၤ အိၣ်ဆၢထၢၣ်က့ၤ ဝဲဒ် ကညီဒီကလုၥ်သုးမုၢ်ဒိၣ်(KNA)အသိးန့ၣ်လီၤ.
ဘၣ်ဃးကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤလၢကသ့ၣ်ညါဘၣ်တၢ်ဂ့ၢ်လီၤတံၢ်လီၤဆဲးအဂီၢ် ဖဲမဟါပခ့ၣ်အဲးစံၣ်-ကညီတၢ်ကစီၣ် ဆဲးကျိးဝဲသုးဟီၣ်ကဝီၤအံၤအခိၣ် သုးခိၣ်ကျၢၢ်ဖိ စီၤတ့ၤဝ့ ဘၣ်ဆၣ်စံးဝဲလၢသါတချုးဒံးဘၣ်န့ၣ်လီၤ.
