လါယနူၤအါရံၤ ၁၄သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်,ခၠိပူရံ,ဖါထီကီၢ်ဆၣ်ဟီၣ်ကဝီၤအပူၤ,ကီၢ်ပယီၤခီကီၢ်ပှၤမၤတၢ်ဖိအဂၤ(၁၀၀)ဃၣ်ဃၣ်အ့ၣ်လိၥ်ဆိးက့အသးလၢကျဲမုၢ်ပူၤကျဲထီၣ်ဝဲသးအဂ့ၢ်,ကၠီၣ်တဲၣ်(Khaosod)တၢ်ကစီၣ်သန့ပၥ်ဖျါဝဲဒၣ်ဖဲမဟါလါယနူၤအါရံၤ(၁၃)သီအနံၤမုၢ်နၤခီအဆၢကတီၢ်န့ၣ်လီၤ.
မဟါလါယနူၤအါရံၤ(၁၃)သီမုၢ်နၤခီ(၁၁)နၣ်ရံၣ်အဆၢကတီၢ်,ခီဖျိတၢ်အ့ၣ်လိၥ်ဆိးက့သးကဲထီၣ်ဝဲလၢကျဲပူၤအဃိ,လီၢ်ကဝီၤဖိတဖၣ်ဖုးသံပျီၢ်ဂီၤဒီးဂ့ၢ်ဝီၢ်အူပှၤမၤစၢၤတၢ်ဖိတဖၣ်ဆှၢကွံၥ်ဝဲပှၤလၢဘၣ်ဒိဘၣ်ထံးတဖၣ်ဆူတၢ်ဆါဟံၣ်ဒီးပၢၤကီၢ်ပှၤဘၣ်မူဘၣ်ဒါတဖၣ်လူၤဃုဖီၣ်ဝဲပှၤမၤကမၣ်တၢ်ဖိတဖၣ်အဂ့ၢ်,ကၠီၣ်တဲၣ်တၢ်ကစီၣ်သန့ပၥ်ဖျါဝဲဒၣ်န့ၣ်လီၤ.
ဒ်(ဖါထီ)ဟီၣ်ကဝီၤကၠီၣ်တဲၣ်ပၢၤကီၢ်တဖၣ်ပၥ်ဖျါဝဲလၢတၢ်ကစီၣ်သန့အပူၤအသိးန့ၣ်,ဘီကီးဝ့ၢ်ကဝီၤဒ့တၢ်အိၣ်တၢ်ဆိးတၢ်သူၣ်ထီၣ်တဖျၢၣ်အမဲၥ်ညါကျဲအပူၤကီၢ်ပယီၤဖိတဖၣ်အါအါဂီၢ်ဂီၢ်အ့ၣ်လိၥ်ဆိးက့သးကဲထီၣ်ဝဲဒီးဖဲတၢ်အ့ၣ်လိၥ်ဆိးက့ကဲထီၣ်အသးတၢ်လီၢ်အပူၤန့ၣ်ပှၤကီၢ်ပယီၤဖိဘၣ်ဒိဝဲ(၂)ဂၤအဂ့ၢ်,ပၥ်ဖျါဝဲဒၣ်န့ၣ်လီၤ.
ဒီးတၢ်အ့ၣ်လိၥ်ဆိးက့အံၤကဲထီၣ်ဝဲသးခီဖျိတၢ်ဂ့ၢ်မနုၤလဲၣ်အဂ့ၢ်န့ၣ်,တၢ်တသ့ၣ်ညါဝဲဒၣ်ဘၣ်ဆၣ်စးထီၣ်သးအခီၣ်ထံးခီၣ်ဘိလၢတၢ်အီသံးအီမ့ၤတၢ်တဲအါလိၥ်သးအဃိအဂ့ၢ်,ကၠီၣ်တဲၣ်ပၢၤကီၢ်တဖၣ်ပဲၥ်ထံနီၤဖးပၥ်ဖျါထီၣ်ဝဲဒၣ်လၢတၢ်ကစီၣ်သန့အပူၤန့ၣ်လီၤ.
လၢတၢ်န့ၣ်အဃိ,လၢတၢ်ကဟံထီၣ်ဖီၣ်ထီၣ်ဝဲပှၤမၤကမၣ်တၢ်ဖိတဖၣ်အရ့အဂီၢ်တကီၢ်ခါခဲအံၤကၠီၣ်တဲၣ်ပှၤဘၣ်မူဘၣ်ဒါတဖၣ်ဟူးဂဲၤဝဲလၢတၢ်ဃုကွၢ်ထံသမံသမိးဝဲခိၣ်ဃၢၤ(CCTV)ဒီးတၢ်လူၤဖီၣ်ပှၤမၤကမၣ်တၢ်ဖိလံအဂ့ၢ်,ပၥ်ဖျါဝဲဒၣ်စ့ၢ်ကီးန့ၣ်လီၤ.
အပူၤကွံၥ်လါယနူၤအါရံၤ(၁၁)သီအနံၤအပူၤ,ဘီကီးဝ့ၢ်စမိၤပရၤကန်တၢ်လီၢ်(ABAC Bangna)ဖၠၣ်စိမိၤကၠိတၢ်အီၣ်ကျးတၢ်လီၢ်တတီၤအပူၤတၢ်အ့ၣ်လိၥ်ဆိးက့ကဲထီၣ်ဝဲအသးလၢကီၢ်ပယီၤခီကီၢ်ပှၤမၤတၢ်ဖိကရူၢ်ဒီးကၠီၣ်တဲၣ်ပှၤဆှၢတၢ်အီၣ်ဖိအဘၢၣ်စၢၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,တကီၢ်ခါခဲအံၤကၠီၣ်တဲၣ်ထံကီၢ်အပူၤတၢ်အ့ၣ်လိၥ်ဆိးက့ကဲထီၣ်ဝဲအသးလၢကီၢ်ပယီၤခီကီၢ်ပှၤမၤတၢ်ဖိကဒဲကဒဲဒီးကၠီၣ်တဲၣ်ထံဖိကီၢ်ဖိအဘၢၣ်စၢၤအိၣ်ဝဲခဲအံၤခဲအံၤအဖီခိၣ်ခီကီၢ်ပှၤမၤတၢ်ဖိလၢအဂၤတဖၣ်ကဘၣ်အိၣ်လၢတၢ်သ့တၢ်ဘၣ်အပူၤအဂ့ၢ်,ပှၤဟူးဂဲၤလၢကၠီၣ်တဲၣ်ကညီပှၤတဝၢဂ့ၢ်ဝီ(OKRSO)ပှၤနဲၣ်တၢ်မါဆ့ၣ်ပလီၤဟ့ၣ်ပလီၢ်ဝဲဒ်အံၤန့ၣ်လီၤ.
“တကီၢ်ခါခဲအံၤပကဘၣ်လဲၤဂ့ၤဂ့ၤက့ၤဂ့ၤဂ့ၤလီၤ.တၢ်မံၤဂ့ၤတမံၤဂ့ၤပထုးဖျါထီၣ်ပတၢ်တူၢ်ဘၣ်တသ့ဝဲဘၣ်.အါဂၤအဂီၢ်ပကဘၣ်တူၢ်ဆါသး,ပကဘၣ်အိၣ်သ့သ့ဘၣ်ဘၣ်အီၣ်သ့သ့ဘၣ်ဘၣ်လီၤ.တၢ်ဂ့ၢ်အံၤသ့ၣ်တဖၣ်တၢ်ဘၣ်ယိၣ်အိၣ်လၢကကဲထီၣ်က့ၤကလုၥ်ဒူၣ်တၢ်သဘံၣ်သဘုၣ်တၢ်သူၣ်ဟ့သးကါန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
ကီၢ်ကၠီၣ်တဲၣ်အပူၤကီၢ်ပယီၤထံဖိကီၢ်ဖိကဒဲကဒဲမ့တမ့ၢ်,ကၠီၣ်တဲၣ်ထံဖိကီၢ်ဖိဒီးကီၢ်ပယီၤဖိအဘၢၣ်စၢၤတၢ်အ့ၣ်လိၥ်ဆိးက့ကဲထီၣ်သးလၢပှၤတကရူၢ်မ့တမ့ၢ်ပှၤဒီတဖုအဂ့ၢ်အံၤ,အလီၢ်ခံအိၣ်ဝဲဒီးတၢ်ရဲၣ်တၢ်ကျဲၤတၢ်ဖီၣ်ပျံၤလၢပှၤတဒူၣ်တဖုအဖီခိၣ်အဂ့ၢ်,(JACBA)ပှၤနဲၣ်တၢ်အူမိကၠိပဲၥ်ထံနီၤဖးစံးဝဲဒၣ်န့ၣ်လီၤ.
ဒ်န့ၣ်အသိး,ခီဖျိတၢ်အ့ၣ်လိၥ်ဆိးက့ကဲထီၣ်သးဒ်အံၤအဃိကီၢ်ပယီၤခီကီၢ်ပှၤမၤတၢ်ဖိတဖၣ်ကအိၣ်ဒီးတၢ်ပလီၢ်ပဒီသးဒီး,ကလူၤပိၥ်ထွဲတၢ်ဘျၢသဲးစးအသိး,တဂၤဒီးတဂၤကအိၣ်ဒီးတၢ်ဝံသးစူၤတၢ်နၢ်ပၢၢ်တၢ်ဟ့ၣ်ဂံၢ်ဟ့ၣ်လိၥ်သးကဒဲကဒဲအဂ့ၢ်, ပှၤဟူးဂဲၤလၢခီကီၢ်ပှၤမၤတၢ်ဖိဂ့ၢ်ဝီ(JACBA)ပှၤနဲၣ်တၢ်အူမိကၠိဆီၣ်တခူစံးဝဲဒၣ်န့ၣ်လီၤ.
