လါယနူၤအါရံၤ ၉ သီ, ၂၀၂၆ နံၣ်, ခ့ၣ်အဲးစံၣ်
ဖၣ်ပူၣ်ဒုးယၤသုးကလၢၤလၢအိၣ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤပူၤလၢ(KNLA)သုးပၥ်ဖှိၣ်ကဝီၤခးဝဲ န့ၢ်လၢတနံၣ်ဃၣ်ဃၣ်အံၤန့ၣ် စှၤသီအတီၢ်ပူၤသုးမီၤစိရိၤကဘီယူၤလဲၤခးလီၤတၢ်လၢသုးကလၢၤအခိၣ်အဃၢၤအိၣ်ဝဲ ကိးမုၢ်နံၤဒဲး အဂ့ၢ်န့ၣ် သ့ၣ်ညါဘၣ်လၢ(KNLA)ခိၣ်နၢ်ဒိၣ်ထီတဖၣ်အအိၣ်န့ၣ်လီၤ.
ဖၣ်ပူၣ်သုးကလၢၤလၢအိၣ်ဖၣ်ပူၣ်ဝ့ၢ်ဃၢၤလၢအရ့ဒိၣ်ဝဲလၢသုးမီၤစိရိၤအဂီၢ်အံၤ လၢတၢ်ကဝီၤခးဝဲအဖီခိၣ် သုးမီၤစိရိၤတကပၤ ကၢၤဃၥ်ဝဲမ့ၢ်န့ၢ်ဒံးဘၣ်ဆၣ် သုးကလၢၤအံၤသုတလီၤတဂ့ၤအဂီၢ် တၢ်ဃုထၢအကူၥ်-၁ ဝံၤလီၢ်ခံစးထီၣ်ဖဲလါယနူၤထီၣ်အံၤန့ၣ် သူဝဲကဘီယူၤလဲၤခးလီၤ တၢ်လၢသုးကလၢၤအခိၣ်အဃၢၤ အိၣ်ဝဲကိးမုၢ်နံၤဒဲး တုၤလၢတဂီၤအံၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ဖၣ်ပူၣ်သုးကလၢၤတၢ်အိၣ်သးဒုအိၣ်ဒ်အလီၢ်လီၤ.မ့မ့ၢ်ကဘီယူၤဒုဟဲခးလီၤတၢ်ကိးမုၢ်နံၤလီၤ.လၢမုၢ်ဝါတဝါန့ၣ်ဟဲခးတၢ်လံ,မုၢ်ဆါခီတဘျီ,မုၢ်ဟါလီၤတဘျီန့ၣ်ဟဲခးတၢ်ထီဘိလီၤ.ဟဲခးလီၤတၢ်ခီဒုဒ်သိးပှၤလဲၤဘူးဝဲသုတန့ၢ်တဂ့ၤအဂီၢ်ဒ်န့ၣ်လီၤ. တၢ်ဒုးဒုအကဲထီၣ် အဒိၣ်အမုၢ်တအိၣ်ဘၣ်,အိၣ်ဒၣ်လၢခးလိၥ်သးလၢ(စနဲးဖၢး),မ့မ့ၢ်လၢကျိဒိၣ်ခီ န့ၣ်စှၤတစဲး .လၢတၢ်ခးလိၥ်သးအိၣ်ဒ်န့ၣ်အဖီခိၣ် သုးကီၣ်ကးကရူၢ်ဘၣ်ယိၣ်တၢ်လၢအသုးကလၢၤဂီၢ်အဃိဟဲခးဒီသဒၢန့ၢ်ဝဲဒီးကဘီယူၤလီၤ.တဂီၤညါအံၤနါက့သီဒီတဂီၤလီၤ”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်ဖၣ်ပူၣ်ဒုးယၤသုးကလၢၤအမဲၥ်ညါအပူၤကွံၥ်တၢ်လီၢ်လၢတၢ်ပၢၢ်ဆၢကရူၢ်ကရၢအပှၤအိၣ်ဆိးဝဲအခိၣ်အဃၢၤန့ၣ် ကဘီယူၤလဲၤခးလီၤတၢ်မ့အိၣ်ဘၣ်ဆၣ် လီၢ်ခံအံၤကဘီယူၤဟးခးလီၤနါစိၤတၢ်လၢဒူသဝီ,တၢ်ဖံးအီၣ်မၤအီၣ်လီၢ်ကျဲဟဲအါထီၣ် ဝဲအဂ့ၢ်န့ၣ် စံးစ့ၢ်ကီးဝဲန့ၣ်လီၤ.
ဖၣ်ပူၣ်ဟီၣ်ကဝီၤပူၤ လၢကဟဲတလါအံၤလါယနူၤအါရံၤ ၁၁ သီ သုးမီၤစိရိၤကမၤတၢ်ဃုထၢအကူၥ်-၂ အကျါ မ့ပၣ်ဃုၥ် ဝဲဘၣ်ဆၣ် လီၤဆီဒၣ်တၢ်ဖၣ်ပူၣ်ဝ့ၢ်အံၤဒီးဒူသဝီလၢအိၣ်တၢ်ခိၣ်တၢ်ဃၢၤဖဲန့ၣ်သုးမီၤစိရိၤအတၢ်ပၢတၢ်ြပးတအိၣ်လၢၤဘၣ် ခ့ၣ်အဲၣ်ယူၣ်(သုးက့ ၅)ဒိၣ်စိဝဲအသိး ကမျၢၢ်ထံဖိကီၢ်ဖိလၢအိၣ်ဝ့ၢ်ပူၤ,ဒူသဝီဖဲန့ၣ်တဖၣ်ဘၣ်စံၣ်မှံဟးဖျိးန့ၢ်ဝဲလၢတနံၣ်ဘျဲၣ်လံအဃိ တၢ်မၤဝဲတၢ်ဃုထၢတကဲထီၣ်ဝဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲလၢ“ဖၣ်ပူၣ်ဒုသုးမီၤစိရိၤအတၢ်ပၢတၢ်ြပးတအိၣ် နီတီၤလၢၤ ဘၣ်. ကဆီလီၤတၢ်ဖးအဒၢဒုတန့ၢ်နီတီၤလၢၤဘၣ်.မ့န့ၢ်ကန့ၢ်ဝဲဖဲကမၤမိၢ်ဝ့ၢ် ကဝီၤဒ့ပူၤဒ်န့ၣ်လီၤ.ယဆိမိၣ်ဒူဖိသဝီဖိန့ၣ် မးလဲၤဟ့ၣ် တၢ်ဖးတဘူၣ်ဘၣ်န့ၣ်ကဲထီၣ်သးသ့စ့ၢ်လီၤ.အပှၤလၢအိၣ်တၢ် ခိၣ်တၢ်ဃၢၤ တဖၣ်န့ၣ်နါက့ဟးထီၣ်တၢ်ချၢတဘူၣ်ဘၣ်, အိၣ်ဖဲဝါဒူ အခိၣ်အဃၢၤဖဲန့ၣ်လီၤ.ဘၣ်မ့သ့ၣ်အပှၤလၢအိၣ်ဖဲန့ၣ်တဖၣ် ကဟံန့ၢ်ဃုၥ်တၢ်ဘံၣ်တၢ်ဘၢလၢတၢ်ဖးအဂီၢ်ဧါ တသ့ၣ်ညါဘၣ်.မ့ဝံၤ ကဘီယူၤဟဲခးလီၤတၢ်အါထီၣ်ဒ်အံၤကဟံန့ၢ်ဝဲတၢ်ဘံၣ်တၢ်ဘၢ လၢတၢ်ဃုထၢအဂီၢ်ဒ်သိးပှၤလဲၤမၤတံၥ်တၥ်တၢ်ဃုထၢကမၤမိၢ်ဝ့ၢ်ပူၤ သုတန့ၢ်တဂ့ၤအဂီၢ်ဒ်န့ၣ်ဧါဒုတဲတဘၣ်ဘၣ်”အဂ့ၢ်န့ၣ် စံးဝဲန့ၣ်လီၤ.
ပယီၤသုးခီၣ်သုးရ့ၣ်(ခလရ-၁၉) ဒီး ခီၣ်ချ့သုးရ့ၣ်(ခမရ-၄၃၄)လၢဒီသဒၢဝဲဖၣ်ပူၣ်ဝ့ၢ်အံၤဖဲအပူၤကွံၥ် ၂၀၂၄ နံၣ် လါအ့ဖြ့ၣ်အခါန့ၣ် ဟီၣ်ကဝီၤ(KNLA)သုးပၥ်ဖှိၣ်ထီၣ်ဒုးမၤန့ၢ်ဝဲဒၣ်ဒီး ခဲအံၤဟီၣ်ကဝီၤဖဲန့ၣ်အပူၤဖၣ်ပူၣ်ဒုးယၤသုးကလၢၤဖးဒိၣ်,ခီၣ်ချ့သုးရ့ၣ်(ခမရ-၃၄၀), (ခမရ-၃၄၁)သုးကလၢၤအိၣ်တ့ၢ်ဝဲတၢ် (၃)ဖျၢၣ်အံၤန့ၣ်လီၤ.
ဒီးလၢသုးကလၢၤ(၃)ဖျၢၣ်အံၤအပူၤန့ၣ် ပှၤသုးဖိသံၣ်ဖိဃုၥ်ဒီးအဟံၣ်ဖိဃီဖိပၥ်ဖှိၣ်ပှၤနီၣ်ဂံၢ်ကအိၣ်ဝဲ(၆၀၀)ခိၣ်ဃၢၤအဂ့ၢ်န့ၣ် သုးက့ ၅ သုးက့ခိၣ် သုးခိၣ်ကျၢၢ်ဖိ စီၤဂံၢ်နွံ စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
ဒ်န့ၣ်အသိးသုးကလၢၤလၢအအိၣ်တ့ၢ်ဒံးဖဲန့ၣ်သ့ၣ်တဖၣ်သုတဘၣ်ဟ့ၣ်လီၤဝဲဆူ(သုးက့ ၅)အစုပူၤတဂ့ၤအဂီၢ်န့ၣ် လၢကမၤမိၢ်ဝ့ၢ် အံၤတဆီ ပယီၤသုးဟံန့ၢ်ဝဲတၢ်မၤစၢၤလၢ(BGF)အအိၣ်ဒီးဂုၥ်ကျဲးစၢးလဲၤထီၣ်ဝဲဘၣ်ဆၣ်တိဝဲတဖျိဒံးဘၣ်အသိး လၢအတၢ်ဟဲထီၣ် ဘျီဝဲအံၤစ့ၢ်ကီးသူဝဲသုးရ့ၣ်(၅)ဘ့ၣ်အဂ့ၢ်န့ၣ် (သုးက့ ၅)ပှၤဘၣ်မူဘၣ်ဒါ စံးဝဲန့ၣ်လီၤ.
