လါဖ့ၤဘြူၤအါရံၤ ၄ သီ, ၂၀၂၆ နံၣ်, ခ့ၣ်အဲးစံၣ်
မၠၣ်ဝတံၣ်-ဂီၤလ့ၤကျဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ထီၣ်န့ၢ်တ့ၢ်ဝဲန့ၢ်လၢတနံၣ်ဘျဲၣ် ဃၣ်ဃၣ်အံၤတဖၣ် လၢကထီၣ်မၤန့ၢ်က့ၤဝဲအဂီၢ် သုးမီၤစိရိၤအပှၤလၢဟဲတုၤမၠၣ်ဝတံၣ်ဝ့ၢ်ခိၣ်ဃၢၤတဖၣ်အိၣ်ကတီၤထီၣ်အသးလံ အဂ့ၢ်န့ၣ် သ့ၣ်ညါဘၣ်လၢကညီဖီၣ်စုကဝဲၤကရူၢ်ကရၢတဖၣ်အအိၣ်န့ၣ်လီၤ.
ဖဲအပူၤကွံၥ်လါယနူၤအါရံၤ ၂၉ သီအနံၤန့ၣ် လၢဖၣ်အၣ်-ကီးတရံးအံၤတဆီပယီၤသုးသိလ့ၣ်ဃုၥ်ဒီးသုးဂံၢ်ဘါ အါအါဂီၢ်ဂီၢ် ဟဲထီၣ်တုၤဝဲလၢမၠၣ်ဝတံၣ်ဝ့ၢ်ဒီး လၢကထီၣ်ဟံန့ၢ်က့ၤမၠၣ်ဝတံၣ်-ဂီၤလ့ၤထံဆၢကီၢ်ဆၢသုးကလၢၤတၢ်လီၢ်လၢ အဘၣ် ဟ့ၣ်ဆှူကွံၥ်ဝဲတဖၣ်အဂီၢ်န့ၣ် ပယီၤသုးဒီး(BGF),(DKBA)သုးခိၣ်ဘိၤဘံၣ်အပှၤပၥ်ဖှိၣ်ထီၣ်သးအိၣ်ကတီၤသးလၢကထီၣ် ဟံန့ၢ်က့ၤဝဲအဂ့ၢ်န့ၣ် (KNLA)ဂံၢ်ခီၣ်ထံးပှၤဟ့ၣ်တၢ်ကစီၣ်တဂၤ စံးဝဲန့ၣ်လီၤ.
အဝဲစံးဝဲလၢ“ခဲအံၤပနၢ်ဟူတၢ်ကစီၣ်လၢ ပယီၤသုးဒီး(DKBA)သုးခိၣ်ဘိၤဘံၣ်အပှၤ,(KNA)ဒီး(BGF)တနီၤပၥ်ဖှိၣ်ထီၣ်သး ကထီၣ်ဒုးဟံန့ၢ်က့ၤဂီၤလ့ၤကျဲ. ဖဲအိၣ်တနံၤအဝဲသ့ၣ်သိလ့ၣ်ဟဲထီၣ်အခါန့ၣ် အမျိၥ်သိလ့ၣ်န့ၣ်ပၣ်ဝဲ(၂၈)ခိၣ်, မံၤစဲဒိသိလ့ၣ်န့ၣ် ပၣ်ဝဲ(၂)ခိၣ်ဒီး သုးဂံၢ်ဘါကအိၣ်လၢအဂၤ(၅၀၀)ညါ.ဒီးအဝဲသ့ၣ်အံၤပနၢ်ဟူအအိၣ်ဆီလီၤသးဖဲ(သ့ၣ်ဃးလီၤတီၢ်)တကပၤ”အဂ့ၢ်န့ၣ် စံးဝဲန့ၣ်လီၤ.
ပယီၤသုးလၢအဟဲထီၣ်တုၤသ့ၣ်တဖၣ်အံၤ ဖဲအဝဲသ့ၣ်ဟဲလၢကျဲအခါ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ် ခိးခးအဝဲသ့ၣ် လၢတၢ်ကျဲပူၤအိၣ်ဘၣ်ဆၣ် ခီဖျိဟဲထီၣ်အနီၣ်ဂံၢ်အါဒီး ဖဲအဝဲသ့ၣ်ဟဲထီၣ်ဆၢကတီၢ်ပယီၤသုးကလၢၤလၢအိၣ်ပျီပူၤတဖၣ် ခးလီၤစၢၤဝဲကျိဖးဒိၣ်အဃိ ဟဲထီၣ်ဝဲဖျိဒ်အံၤန့ၣ်လီၤ.
ဒ်န့ၣ်အသိးသုးမီၤစိရိၤအံၤလၢကထီၣ်ဒိၣ်စိက့ၤကျဲအံၤအဂီၢ်(BGF)ဒီး(KNA)အမဲၥ်ညါဃ့ဝဲတၢ်မၤစၢၤလၢ တၢ်ဘၣ်ဘျုး ဒံၣ်မိၣ် ခြ့ၣ်စံၣ်ကညီသုးမုၢ်ဒိၣ်(DKBA)အအိၣ်အိၣ်ဝဲဘၣ်ဆၣ် မၤစၢၤတသ့ဘၣ်အဂ့ၢ်န့ၣ် ဆိၣ်စံမၠဲၣ်(DKBA)ခိၣ်နၢ်လၢတအဲၣ်ဒိး ပၥ်ဖျါအမံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
“ပနၢ်ဟူလၢအဝဲသ့ၣ်ကဟဲထီၣ်ဘၣ်ဆၣ်ကဟဲထီၣ်တုၤအဂီၢ်ဒုကဘၣ်ဖးယံၤဒံးဧါသၢၣ်.အအိၣ်ဖးယံၤဖိဒံးအဃိ.အတဲဝဲဒုလီၤတံၢ်,လီၤတံၢ်နါက့ကမၤဝဲအဂီၢ်ဒုကဘၣ်တစိၢ်ဖိဧါသၢၣ်.ပယီၤသုးဟဲဃ့ပှၤတၢ်မၤစၢၤဝဲပတဲလၢပတမၤစၢၤဘၣ်.နၤဒီးပမၤဘၣ်လၢအံၤတကပၤဒီးပတမၤစၢၤဘၣ်,ပကအိၣ်လၢတၢ်ဘၢၣ်စၢၤလီၤပတဲအီၤဒ်န့ၣ်.မၢပမၤစၢၤပမၤစၢၤကဲဝဲလဲၣ်တၢ်အံၤတမ့ၢ်ပတၢ်မၤဘၣ်.အဟဲထီၣ်န့ၣ်ပၣ်ဒီး(DKBA)ဘိၤဘံၣ်အပှၤမီၤ.ပၣ်နါက့တလိၣ်ဘၣ်”အဂ့ၢ်န့ၣ် စံးဝဲန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ်ထီၣ်ဆူဂီၤလ့ၤဟီၣ်ကဝီၤန့ၣ် ဖဲအပူၤကွံၥ်(၂၀၂၅)ထီၣ်အတီၢ်ပူၤအခါန့ၣ် (KNLA), (KNDO)သုးပၥ်ဖှိၣ်ထီၣ်န့ၢ်တ့ၢ်ဝဲ အူကြ့ၣ်ထၣ်သုးကလၢၤ, ထံကပျၢၤသုးကလၢၤ,မီခံ,ကနဲလ့,ထိကၠိ,ဘျၢၣ်ဒိၣ်,သ့ၣ်ဘီဘိ သုးကလၢၤ သ့ၣ်တဖၣ်အံၤန့ၣ်လီၤ.
ဒီးဖဲလၢတၢ်ထီၣ်န့ၢ်သုးကလၢၤအခါန့ၣ်စ့ၢ်ကီးပယီၤသုးတကပၤသံဘၣ်ဒါဘၣ်ထံးဃ့ၢ်ဖျိးထီၣ်အိၣ်ဝဲအါးမးအသိး တၢ်မၤန့ၢ်စ့ၢ်ကီးဝဲ ကျိဖးဒိၣ်,ကျိဖိဃုၥ်ဒီးကျိချံပှၥ်သၣ်တၢ်ပီးတၢ်လီလၢအဂၤအိၣ်ဝဲဒၣ်အါမးန့ၣ်လီၤ.
တကးဒံးဘၣ်လၢကထီၣ်ဒိၣ်စိက့ၤကီးတရံး-မၠၣ်ဝတံၣ်,မၠၣ်ဝတံၣ်-ဂီၤလ့ၤဟီၣ်ကဝီၤပူၤတၢ်လီၢ်အရ့ဒိၣ်သ့ၣ်ဖၣ်အံၤအဂီၢ်န့ၣ် သုးမီၤစိရိၤဆဲးဆှၢထီၣ်အပှၤသုးမုၢ်သံၣ်ဘိတပယူၥ်ဃီဒီး ဖဲမဟါလါဖ့ၤဘြူၤအါရံၤ ၃ သီဂီၤခီအဆၢကတီၢ်န့ၣ် လၢဖၣ်အၣ်,အ့ၤဒူၣ်- ကြုၢ်တု-ကီးတရံး ကျဲမုၢ်အံၤတဆီ ပယီၤသုးသိလ့ၣ်(၃၇)ခိၣ် ဟဲထီၣ်တုၤကဒီး ဝဲလၢကီးတရံး(စကခ-၁၂) တၢ်လီၢ်လံအဂ့ၢ်န့ၣ် ကြုၢ်တုပှၤဘၣ်မူဘၣ်ဒါတဂၤ စံးဝဲအသိးသ့ၣ်ညါဘၣ်န့ၣ်လီၤ.
