လါဖ့ၤဘြူၤအါရံၤ ၂၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ်အပူၤ ခီဖျိလၢသုးမီၤစိရိၤကဘီယူၤ အပီၣ်(၅၀၀)မ့ၣ်ပိၢ်အံၤအဃိ ကမျၢၢ်သံတဂၤဒီးဘၣ်ဒိဝဲ(၁)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤ န့ၣ်လီၤ.
ဖဲမဟါလါဖ့ၤဘြူၤအါရံၤ ၂၃ သီ မုၢ်ဃ့ၢ်လီၤ ၂း၃၀ ဃၣ်ဃၣ်အဆၢကတီၢ်န့ၣ် သုးမီၤစိရိၤအ(Jet Fighter)ကဘီယူၤ လဲၤတ့ၢ်လီၤ ဝဲပီၣ်(၅၀၀) မ့ၣ်ပိၢ် ၁ ဖျၢၣ် လီၤတဲၥ်ပိၢ်ဖးထီၣ်ဝဲလၢစိၤစ့ၤဖၠါ(စုံစင်ဖျား)သဝီပူၤန့ၣ်လီၤ.
လၢတၢ်န့ၣ်အဃိလၢကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ ကမျၢၢ်ပိၥ်မုၣ်သံ(၁)ဂၤဒီးဘၣ်ဒိဘၣ်ထံး(၁)ဂၤအမဲၥ်ညါ ဟံၣ်တၢ်သူၣ် ထီၣ်ဟးဂီၤဃုၥ်စ့ၢ်ကီးဝဲ(၄)ဖျၢၣ်အဂ့ၢ်န့ၣ် ဘျံးဒဝဲၢ်ကီၢ်ရ့ၣ်လံၥ်တၢ်ပၥ်ဖျါပူၤပၥ်ဖျါဝဲန့ၣ်လီၤ.
ဒ်န့ၣ်အသိးကစၢၢ်ဒိၣ်ကီၢ်ဆၣ်လၢသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်ဖဲမဟါအံၤန့ၣ် အပူၤကွံၥ်တလါအံၤထီၣ် ၄ သီ ဂီၤခီအဆၢ ကတီၢ်န့ၣ်စ့ၢ်ကီး (Jet Fighter)ကဘီယူၤလဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၂ ဖျၢၣ်ဒံးလၢ ဟ့ၤဒါ(ဟိန္ဒား)သဝီ သီခါဖၠၣ်ကရၢၢ်ပူၤ အဃိ ဖဲန့ၣ်သီခါဘၣ်ဒိ(၁)ပါ ဒီးသီခါဖၠၣ်တၢ်သူၣ်ထီၣ်လီၤပှီၢ်ဟးဂူၥ်ဟးဂီၤဝဲဒၣ်ဒိၣ်ဒိၣ်မုၢ်မုၢ်ကဲထီၣ်ဒံးဝဲန့ၣ်လီၤ.
တကးဒံးဘၣ်တၢ်ကဲထီၣ်သးဖဲန့ၣ်ဝံၤ ဖဲအပူၤကွံၥ်တလါအံၤလါဖ့ၤဘြူၤအါရံၤ ၁၃ သီအနံၤစ့ၢ်ကီး လၢတနီသရံၣ်ကီၢ်ဆၣ်အပူၤ ပယီၤသုးအံၤလၢတၢ်ဂ့ၢ်တအိၣ်နီမံၤနုၥ်လီၤဒွဲၣ်အူအီၣ်ဝဲလဲၤသ့ၣ်(လယ်သစ်)သဝီပူၤဟံၣ် အဖျၢၣ်(၁၀၀)ဘျဲၣ်ကဲထီၣ်ဒံးဝဲဒၣ်န့ၣ် လီၤ.
ဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤ စးထီၣ်ဖဲ(၂၀၂၅)ပယီၤသုးကလၢၤလၢအိၣ်ဆီလီၤသးဖဲ ထံခံဒီးမီတီၤ(မောတောင်)ကီၢ်ဆၢ တၢ်ကူၣ် လဲၤမၤကၤကျဲ အံၤတဖၣ် ခီဖျိဟီၣ်ကဝီၤ(KNLA)သုးပၥ်ဖှိၣ်ထီၣ်န့ၢ်ဒိၣ်စိဝဲအဃိ ပယီၤသုးအံၤလၢကဆှၢထီၣ်သုးဂံၢ်ဘါအဂီၢ် ဟဲထီၣ်ဝဲတပၢၢ်ဘၣ်အဖီခိၣ်ပၥ်ဂံၢ်ပၥ်ဘါသူဝဲဒၣ်ကဘီယူၤဒီးကျိဖးဒိၣ်ဟးခးလီၤတၢ်လၢတၢ်ပၢၢ်ဆၢကရူၢ်ဒီးကမျၢၢ်အိၣ်ဆိးလီၢ်အိၣ်ဝဲခဲအံၤခဲအံၤန့ၣ်လီၤ.
လၢန့ၣ်အမဲၥ်ညါသုးမီၤစိရိၤသူကဘီယူၤဟးခးလီၤတၢ်လၢကမျၢၢ်အိၣ်ဆိးလီၢ်ကျဲအံၤတမ့ၢ်ဝဲဘျံးဒဝဲၢ်ကီၢ်ရ့ၣ်ဟီၣ်ကဝီၤတကးဘၣ် မ့မ့ၢ်တခီကီၢ်ရ့ၣ်/သုးက့လၢအဂၤလီၤဆီဒၣ်တၢ်ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤအပူၤစ့ၢ်ကီး သုးမီၤစိရိၤအံၤခီဖျိ မၤဝဲ တၢ်ဟူးတၢ်ဂဲၤသ့ၣ်တဖၣ်အံၤတပယူၥ်ဃီအဃိ ကမျၢၢ်တၢ်သံတၢ်ဘၣ်ဒိဘၣ်ထံးကဲထီၣ်အိၣ်ဝဲတလီၢ်လီၢ်န့ၣ်လီၤ.
