လါဖ့ၤဘြူၤအါရံၤ ၇ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဒီး ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤအပူၤ ခီဖျိလၢသုးမီၤစိရိၤအကဘီယူၤ, ကျိဖးဒိၣ်ဒီးဒြိအံၤအဃိ ၅ သီအတီၢ်ပူၤ ကမျၢၢ်သံ ၃ ဂၤအကျါပၣ်ဃုၥ်ဝဲဖိသၣ်(၉)နံၣ်တဂၤ ဒီး ဟံၣ်တၢ်သူၣ်ထီၣ်ဟးဂီၤဝဲ ၁၉ ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ် ခ့ၤကၠံ(ခင်ကြီး)သဝီ,လ့ၤဒိ(လှေဒုံး)သဝီဒီးငတိခ့ၤ(ငတိုးခင်)သဝီပူၤ ဖဲလါဖ့ၤဘြူၤအါရံၤ ၁ သီအနံၤ ပယီၤသုးခီၣ်ချ့သုးရ့ၣ်(ခမရ-၄၃၉)အံၤ ခးလီၤဝဲကျိဖးဒိၣ်(၅)ဖျၢၣ်အမဲၥ်ညါလဲၤတ့ၢ်လီၤတၢ်ဒီးဒြိအဃိ ခ့ၤကၠံသဝီပူၤ ဟံၣ်ဟးဂီၤဝဲ(၉)ဖျၢၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
တကးဒံးဘၣ်တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်လါဖ့ၤဘြူၤအါရံၤ ၂ သီအနံၤန့ၣ်စ့ၢ်ကီး ပယီၤသုး(ခမရ-၄၃၉)တဒူၣ်ဃီဝဲအံၤ လဲၤတ့ၢ်လီၤကဒီးဒြိမ့ၣ်ပိၢ်ဆူ ခ့ၣ်ကၠံ(ခင်ကြီး)သဝီပူၤအဃိ ဘၣ်သံဝဲသဝီဖိပိၥ်မုၣ် ဒီၤထွ့ယံၤသါ(၅၅)နံၣ်အံၤဒီး ဟံၣ်ဟးဂီၤ စ့ၢ်ကီးဝဲ (၄) ဖျၢၣ် န့ၣ်လီၤ.
ဒ်န့ၣ်အသိးမၤကဒီးဖဲဖဲလါဖ့ၤဘြူၤအါရံၤ ၄ သီ ဂီၤခီ ၁၀း၃၀ အဆၢကတီၢ်န့ၣ် ပယီၤသုးကဘီယူၤလၢအိၣ်တီအူသုးကဘီယူၤသန့ တဘ့ၣ် လဲၤတ့ၢ်လီၤဝဲမ့ၣ်ပိၢ်(၂)ဖျၢၣ်ဆူ စီခံသဝီပူၤအဃိ ဘၣ်သံဝဲဖိသၣ်ပိၥ်ခွါစီၤကျၢၤမူ(၉)နံၣ်အံၤအသိး တကတီၢ်ဃီဖဲ ၁း၀၀ နၣ်ရံၣ် အဆၢကတီၢ်န့ၣ်စ့ၢ်ကီး ပယီၤသုး(ခမရ-၄၃၉)တဒူၣ်ဃီဝဲအံၤလဲၤတ့ၢ်လီၤဝဲဒြိမ့ၣ်ပိၢ်လၢခ့ၤကၠံ(ခင်ကြီး)သဝီပူၤအဃိ ဘၣ်သံ ဝဲကမျၢၢ် ပိၥ်ခွါမီၤမၠိ(၅၈)နံၣ်အံၤအဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်တနံၤဃီဖဲဟါခီ ၆း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး ပယီၤသုးခီၣ်သုးရ့ၣ်(ခလရ-၆၀)အံၤလဲၤတ့ၢ်လီၤ ဝဲဒြိမ့ၣ်ပိၢ်(၂)ဖျၢၣ် အမဲၥ်ညါခးလီၤဃုၥ်ဝဲ(၁၂၀ မမ)ကျိဖးဒိၣ်ဆူ ငထွ့ၤစိၢ်(ငထွေစုပ်)သဝီပူၤအဃိ ဘၣ်ဒိစ့ၢ်ကီးဝဲဖိသၣ်ပိၥ်ခွါ စီၤတၢ်န့ၢ်သါ (၁၄)အံၤန့ၣ်လီၤ.
လၢန့ၣ်အမဲၥ်ညါလီၢ်ခံဖဲလါဖ့ၤဘြူၤအါရံၤ ၅ သီ ဂီၤခီ ၈း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး လၢမၠဲၣ်နံၤကွ့ (မျက်နီကွင်း) သဝီပူၤ ပယီၤသုး(ခမရ-၄၃၉)တဒူၣ် ဃီဝဲအံၤ လဲၤတ့ၢ်ဝဲဒြိမ့ၣ်ပိၢ်(၆)ဖျၢၣ်အဃိ ဖဲန့ၣ်ကမျၢၢ်ဟံၣ်ဟးဂီၤကဒီးဝဲ(၄)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အမဲၥ်ညါ ဒ်န့ၣ်အသိးလါဖ့ၤဘြူၤအါရံၤ ၂ သီအနံၤ လၢဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ဟးတရဲၥ်ကရူၢ် ကြူကၠံသဝီဃၢၤ တၢ်ဒုးကဲထီၣ်တအိၣ်သုးမီၤစိရိၤ (Jet Fighter)ကဘီယူၤလဲၤတ့ၢ်လီၤဝဲပီၣ်(၂၀၀)မ့ၣ်ပိၢ် ၂ ဖျၢၣ် အဃိ သိလ့ၣ်(၃)ခိၣ်, ဟံၣ်တဖျၢၣ်ဃုၥ်ဒီး ရီဘၢၣ်ထူၣ်အခိၣ်(၁၀၀)ဘျဲၣ် ဘၣ်ဒိဘၣ်ထံးဟးဂီၤဝဲဒၣ်အဂ့ၢ်န့ၣ် သ့ၣ်ညါဘၣ် ကီၢ်ရ့ၣ်ပှၤဘၣ်မူဘၣ်ဒါန့ၣ်လီၤ.
တကးဒံးဘၣ်တၢ်တနံၤဃီ ၂၂ သီမုၢ်နၤခီ ၁၁း၀၀ ဘျဲၣ်အဆၢကတီၢ်န့ၣ်စ့ၢ်ကီးလၢ(သုးက့ ၁)သထူၣ်ကီၢ်ဆၣ် စွ့ၣ်ယီၣ်ပၠးကရူၢ်အပူၤ သုးမီၤစိရိၤအမျိၥ်သုး(၃၁၄)သုးရ့ၣ်အံၤပညိၣ်ခးလီၤဝဲ (၈၁ မမ)ကျိဖးဒိၣ်တဖျၢၣ်လီၤတဲၥ်ပိၢ်ဖးထီၣ်ဝဲလၢ ကၠးတရီ(ဇီးဝန်း)သဝီ သီခါဖၠၣ်ကရၢၢ်ပူၤအဃိ သီခါဖၠၣ်တၢ်သူၣ်ထီၣ်ဟးဂီၤဝဲ(၁)ဖျၢၣ် ကဲထီၣ် ဒံးဝဲန့ၣ်လီၤ.
သုးမီၤစိရိၤအံၤလၢတနီၤဖးလၢၤတၢ်အဒူၣ်အစၢလၢတၢ်ပၢၢ်ဆၢကရူၢ်ကရၢဒီးကမျၢၢ်ထံဖကီၢ်ဖိအဘၢၣ်စၢၤဘၣ်အံၤ ခီဖျိလၢ ကဘီယူၤ,ကျိဖးဒိၣ်,ဒြိ,တၢ်ခးသံ, ဒွဲၣ်အူအီၣ်ဝဲဒီးမ့ၣ်အူအံၤအဃိ တနံၤဘၣ်တနံၤကမျၢၢ်ထံဖိကီၢ်ဖိလၢၤဃုၥ်ဒီးဖိဒံဖိသၣ် လၢအ တၢ်ကမၣ် တအိၣ်ဘၣ်တဖၣ်ဘၣ်သံဘၣ်ပှၢ်,ဘၣ်ဒိဘၣ်ထံး ဟဲအါထီၣ်ဝဲကွ့ၢ်ကွ့ၢ်န့ၣ်လီၤ.
လၢတၢ်န့ၣ်အဃိသုးမီၤစိရိၤဟံန့ၢ်တၢ်စိတၢ်ကမီၤပၢတၢ်(၅)နံၣ်အတီၢ်ပူၤအံၤ ခီဖျိလၢအဝဲသ့ၣ်လုၢ်သ့ၣ်ခါပတၥ်မၤကမၣ်ဝဲ ပှၤဟီၣ်ခိၣ်ဖိခွဲးယၥ်အကလုၥ်ကလုၥ်အဃိ ကီၢ်ပယီၤပူၤကမျၢၢ်ထံဖိကီၢ်ဖိသံအနီၣ်ဂံၢ်အိၣ်(၆၀၀၀)တုၤလၢ(၉၀၀၀)ဘျဲၣ် လံ အဂ့ၢ်န့ၣ် တၢ်တိစၢၤမၤစၢၤထံရူၢ်ကီၢ်သဲးပှၤဃိၥ်ဖိကရူၢ်(AAPP)ဒီးဘီမုၢ်စၢဖှိၣ်ကရၢ(UN)အလံၥ်တၢ်မၤနီၣ်စရီပူၤအသိး သ့ၣ်ညါ ဘၣ်န့ၣ်လီၤ.
