လါမးရှး ၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒီးဘျံးဒဝဲၢ်ကီၢ်ရ့ၣ်(သုးက့ ၄)တၢ်ပၢဟီၣ်ကဝီၤအပူၤ ခီဖျိလၢသုးမီၤစိရိၤအကဘီယူၤအံၤအဃိ ခံသီအတီၢ်ပူၤ ကမျၢၢ်ဃုၥ်ဒီးဖိသၣ်ဆံးသံ(၉)ဂၤဒီးဘၣ်ဒိဘၣ်ထံးတစှၤန့ၢ်(၉)ဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဒီး လီၢ်ကဝီၤကကမျၢၢ် စံးဝဲအသိးသ့ၣ်ညါဘၣ်န့ၣ်လီၤ.
ဖဲတနံၤအံၤလါမးရှး ၉ သီ မုၢ်ထူၣ် ၁၂း၃၀ နၣ်ရံၣ်အဆၢကတီၢ် သုးမီၤစိရိၤ(jet fighter)ကဘီယူၤ လဲၤတ့ၢ်လီၤဝဲပီၣ်(၅၀၀)မ့ၣ်ပိၢ် ၂ ဖျၢၣ်လၢ ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်မုၢ်လါကီၢ်ဆၣ်ဟီၣ်ကဝီၤ တဖံၣ်လ့ခိၣ်သဝီအပူၤန့ၣ်လီၤ.
ခီဖျိလၢကဘီယူၤအံၤအဃိ ကမျၢၢ်သံဝဲ(၆)ဂၤအကျါပၣ်ဃုၥ်ဝဲဖိသၣ်ပိၥ်ခွါ(၁၁)နံၣ်ဆူဖီလၥ်(၂)ဂၤ,ဖိသၣ်ပိၥ်မုၣ်(၆)နံၣ် တဂၤ အမဲၥ်ညါပှၤဘၣ်ဒိဘၣ်ထံးဝဲ(၃)ဂၤန့ၣ်စ့ၢ်ကီးမ့ၢ်ဝဲဖိသၣ်(၁၃)နံၣ်ဆူဖီလၥ်သ့ၣ်တဖၣ်အဂ့ၢ်န့ၣ် ဘျံးဒဝဲၢ်ကီၢ်ရ့ၣ်လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
ဒ်ခ့ၣ်အဲၣ်ယူၣ်စံးဝဲအသိးန့ၣ် တဖံၣ်လ့ခိၣ်သဝီလၢကဘီယူၤလဲၤတ့ၢ်လီၤမ့ၣ်ပိၢ်ခဲအံၤန့ၣ်အိၣ်တဘူးလိၥ်အသးဒီး တၢ်ဒုးတၢ်ယၤ ကဲထီၣ်အလီၢ်ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘျံးဒဝဲၢ်ကီၢ်ရ့ၣ်(သုးက့ ၄)အမဲၥ်ညါ ဖဲတနံၤအံၤလါမးရှး ၉ သီ မုၢ်ဃ့ၢ်လီၤ ၂း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး လၢမုၢ်တြီၢ်ကီၢ်ရ့ၣ်(သုးက့ ၅)လူၤသီကီၢ်ဆၣ် တ့မုၢ်ဒၢကရူၢ်အပူၤ သုးမီၤစိရိၤကဘီယူၤလဲၤခးလီၤတၢ်လၢတၢ်လီၢ်(၄)တီၤအဃိ ဘၣ်သံဝဲကမျၢၢ်(၂)ဂၤဒီးဘၣ်ဒိဘၣ်ထံးတစှၤန့ၢ်(၅)ဂၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဘၣ်ဖဲလါမးရှး ၇ သီဒီး ၈ သီအနံၤန့ၣ်စ့ၢ်ကီး သုးမီၤစိရိၤ(jet fighter)ကဘီယူၤ လဲၤတ့ၢ်လီၤဒံးဝဲ မ့ၣ်ပိၢ်လၢ ဒွဲၣ်လိကီၢ်ဆၣ် ဟီၣ်ကဝီၤပူၤဒီး ဖဲန့ၣ်ကမျၢၢ်ပိၥ်မုၣ်သးစၢ်သံဝဲ(၁)ဂၤဒီး ကမျၢၢ်ပိၥ်မုၣ်အံၤ အဝၤဒီး အဖိမုၣ်ဆံး လၢသးနံၣ်အိၣ် (၂)နံၣ်အံၤ ဘၣ်ဒိဘၣ်ထံးအမဲၥ်ညါသီခါဖၠၣ်ဃုၥ်ဒီးဟံၣ်တၢ်သူၣ်ထီၣ်ဟးဂီၤဝဲ(၄)ဖျၢၣ်စ့ၢ်ကီးအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးမုၢ်တြီၢ်ကီၢ်ရ့ၣ်ပူၤတၢ်ကဲထီၣ်သးဘျီဝဲအံၤန့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲလၢ “ဖဲ ၇ သီ အနံၤ မုၢ်ဆါခီအခါန့ၣ်ပယီၤသုးကဘီယူၤလဲၤတ့ၢ်လီၤပီၣ်(၅၀၀)ဖဲဒွဲၣ်လိကီၢ်ဆၣ် လ့ခီၣ်ထံးကရူၢ်ပူၤအဃိ သီခါဖၠၣ်ဒီးဟံၣ်ဟးဂီၤ (၃)ဖျၢၣ်, တၢ်ဘၣ်ဒိဘၣ်ထံးခီဒုတအိၣ်ဘၣ်.မ့ဝံၤမုၢ်ဆ့ၣ်ထီၣ် ၈ သီန့ၣ်ဟဲခးလီၤကဒီးတၢ်လၢမဲၥ်ကီၣ်လီၤသဝီ ဖဲန့ၣ်ဘၣ်သံဝဲ သဝီဖိပိၥ်မုၣ် တဂၤဒီးဘၣ်ဒိဝဲပိၥ်ခွါတဂၤ,ဖိသၣ်(၂)နံၣ်တဂၤ.မ့ဝံၤဖဲတနံၤအံၤ ၉ သီ မုၢ်ဃ့ၢ်လီၤ ၂ နၣ်ရံၣ်ခိၣ်ဃၢၤန့ၣ် ကဘီယူၤဟဲခးလီၤတၢ်ဖဲလူၤသီကီၢ်ဆၣ် တ့မုၢ်ဒၢကရူၢ်ပူၤအဃိ ဘၣ်သံဝဲကမျၢၢ်ပိၥ်မုၣ်တဂၤဒီးအလံၤတဂၤ. မ့မ့ၢ်အဘၣ်ဒိန့ၣ် ပနၢ်ဟူလၢ(၄)ဂၤညါ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်မုၢ်တြီၢ်ကီၢ်ရ့ၣ် လူၤသီကီၢ်ဆၣ်ဒီးဒွဲၣ်လိကီၢ်ဆၣ်ဟီၣ်ကဝီၤတၢ်လီၢ်ဒူသဝီလၢကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ စ့ၢ်ကီး တၢ်ပၢၢ်ဆၢသုးဖိသံၣ်ဖိတအိၣ်နီတဂၤဘၣ်မ့မ့ၢ်တခီအိၣ်ဒၣ်ထဲကမျၢၢ်ပှၤသဝီဖိတဖၣ်လီၤအသိး သုးမီၤစိရိၤအံၤအဝဲသ့ၣ်မၤ တၢ်ဃုထၢဝံၤလီၢ်ခံသူဝဲကဘီယူၤဟးတ့ၢ်ခးလီၤတၢ်လၢကမျၢၢ်အိၣ်ဆိးလီၢ်ကျဲအိၣ်ဝဲကိးမုၢ်နံၤဒဲးဃၣ်ဃၣ်ဟဲအါထီၣ်ဝဲအဂ့ၢ်န့ၣ် (သုးက့ ၅) ပှၤဘၣ်မူဘၣ်ဒါစံးဝဲန့ၣ်လီၤ.
