လါမးရှး ၁၃သီ, ၂၀၂၆နံၣ်, ခ့ၣ်အဲးစံၣ်,
ကညီကီၢ်စဲၣ်ရၤမတံဝ့ၢ်ကလံၤထံး,ဖလူ(ကၠိတီ)တရူးကၣ်စံၣ်နိၣ်တၢ်လိၣ်ကွဲတၢ်လီၢ်ဟီၣ်ကဝီၤကရၢၢ်အပူၤပယီၤသုးခးလီၤဝဲ(၁၂၀)မးမးကျိဖးဒိၣ်အဃိ,ဘၣ်ဒိဘၣ်ထံးဝဲပှၤအဂၤ(၁၀)ဘျဲၣ်အဂ့ၢ်,သ့ၣ်ညါဘၣ်န့ၣ်လီၤ.
ပယီၤသုးလၢအိၣ်ဖလူဖိကစၢၢ်ခိၣ်(ဖယါကိ)တၢ်လီၢ်သ့ၣ်တဖၣ်အံၤတနံၤအံၤလါမးရှး(၁၃)သီဂီၤခီ(၉)နၣ်ရံၣ်ဘျဲၣ်အဆၢကတီၢ်,ခးလီၤဝဲကျိဖးဒိၣ်(၂)ဖျၢၣ်ဆူ(ကၠိတီ)ကၣ်စံၣ်နိၣ်တၢ်လိၣ်ခိၣ်လိၣ်ကွဲကရၢၢ်ပူၤအဃိ,ဘၣ်ဒိပှၤလၢအိၣ်ကရၢၢ်ပူၤတဖၣ်တစှၤန့ၢ်အဂၤ(၁၀)ဘျဲၣ်ဘၣ်အဂ့ၢ်,သ့ၣ်ညါဘၣ်န့ၣ်လီၤ.
ဒီးပှၤလၢဘၣ်ဒိသ့ၣ်တဖၣ်အံၤဂ့ၢ်ဝီၢ်အူတၢ်ဆှၢဝဲဒၣ်ဆူပျီတပိၢ်(မိပၠၤ)လီၢ်အိၣ်ကဒုတၢ်ဆါဟံၣ်ဒီးတနီၤလၢနးနးကျံးကျံးတဖၣ်တခီတၢ်ဆှၢဃီၤဝဲဆူကီၢ်ကၠီၣ်တဲၣ်ကၠီးခဲးတၢ်ဆါဟံၣ်တကပၤအဂ့ၢ်,ပျီတပိၢ်ပှၤကွၢ်ထွဲပှၤဃ့ၢ်တၢ်ဒုးလီၢ်အိၣ်ကဒုပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ကျိ(၁၂၀)မးမးလီၤတဲၥ်လၢတရူးဆဲးတတီၤန့ၣ်အဃိဂ့ၢ်ဝီၢ်အူသိလ့ၣ်သၢခိၣ်လွံၢ်ခိၣ်ကရီဟဲဆှၢဃီၤဝဲဆူတၢ်ဆါဟံၣ်အံၤမီၤနီၤ.ပှၤဟဲဆှၢဖဲအံၤတဖၣ်အကျါအါတက့ၢ်ပှၤဖံးသူ,ပှၤဖံးဝါဒီးပှၤဒ်သိးပှၤတဖၣ်န့ၣ်လီၤ.မ့မ့ၢ်ပှၤလၢတၢ်ဖီၣ်တန့ၢ်တဖၣ်တခီတၢ်ဆှၢဝဲဆူကီၢ်ကၠီၣ်တဲၣ်တကပၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ပယီၤသုးခးလီၤကျိဖးဒိၣ်အဆၢကတီၢ်တၢ်ဘၣ်ဒိဘၣ်ထံးအမဲၥ်ညါ,တၢ်သံတၢ်ပှၢ်ကဲထီၣ်စ့ၢ်ကီးဝဲဘၣ်ဆၣ်ခီဖျိပယီၤသုးခးလီၤတၢ်တဝံၤတတဲၥ်ဒံးဘၣ်အဃိ,တၢ်တသ့ၣ်ညါဘၣ်ဒံးဝဲပှၤသံနီၢ်ဂံၢ်လီၤတံၢ်လီၤဆဲးဒံးဘၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
ဖလူ(ကၠိတီ)တရူးကၣ်စံၣ်နိၣ်တၢ်လီၢ်တၢ်ကျဲအံၤအိၣ်ဝဲဘူးဘူးတံၢ်တံၢ်ဒီးပျီတပိၢ်(မိပၠၤ)ပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်အိၣ်ဆိးအတၢ်လီၢ်တၢ်ကျဲအဃိ,လီၢ်အိၣ်ကဒုဖိတနီၤလဲၤဖံးလဲၤမၤဝဲတၢ်ဖဲန့ၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ခီဖျိပယီၤသုးခးလီၤတၢ်ဒီးတၢ်ဘၣ်ဒိဘၣ်ထံးအိၣ်ထီၣ်ဝဲဒ်အံၤအဃိ,ဘၣ်ယိၣ်ဘၣ်ဘှီဝဲတၢ်လၢအဘူးအတံၢ်လၢလဲၤမၤတၢ်ဖဲန့ၣ်သ့ၣ်တဖၣ်အဂီၢ်အဂ့ၢ်,ပျီတပိၢ်ပှၤဃ့ၢ်တၢ်ဒုးလီၢ်အိၣ်ကဒုပိၥ်မုၣ်တဂၤစံးဝဲဒ်အံၤန့ၣ်လီၤ.
“ပနၢ်ဟူတၢ်ပထံၣ်ဘၣ်တၢ်ကၠါအံၤပပျံၤတၢ်ဒိၣ်မးလီၤ.ပအိၣ်တဘူၣ်ပဘၣ်သးစံၢ်ထီၣ်လၢထံနံၤန့ၣ်လီၤ.ယဖိဒိၣ်မုၣ်လဲၤမၤတၢ်ကဆှဲကဆှီဖဲန့ၣ်မီၤ.လဲၤလၢဂီၤဟဲက့ၤလၢဟါခီ,အခဲအံၤတၢ်ကဲထီၣ်သးတဘျီဃီပှၤတအဲၣ်အသုဟးထီၣ်ဘျီယဘၣ်ကိၢ်ဘၣ်ဂီၤတၢ်လၢအဂီၢ်ဒိၣ်မးလီၤ.”အဂ့ၢ်စံးဝဲဒၣ်န့ၣ်လီၤ.
ပယီၤသုးခးလီၤတၢ်လၢဖလူ(ကၠိတီ)ကၣ်စံၣ်နိၣ်ကရၢၢ်အပူၤဒီးတၢ်ဘၣ်ဒိဘၣ်ထံးအိၣ်ထီၣ်ဝဲအဃိ,တၢ်သုးကွံၥ်ဝဲပှၤတရူးဖိလၢအိၣ်ဖဲကရၢၢ်ပူၤတဖၣ်ဘၣ်ဆၣ်,မ့မ့ၢ်ကီၢ်ပယီၤထံဖိကီၢ်ဖိလၢနုၥ်လီၤမၤတၢ်ဖိကရၢၢ်ပူၤတဖၣ်အံၤတၢ်တဒုးဟးထီၣ်ဝဲဒၣ်အဝဲသ့ၣ်ဘၣ်အဂ့ၢ်,သ့ၣ်ညါဘၣ်ဒ်ပှၤလၢအိၣ်ဘူးတဖၣ်စံးဝဲအသိးန့ၣ်လီၤ.
ဒ်န့ၣ်အသိး,တကီၢ်ခါခဲအံၤပယီၤသုးမၤဝဲတၢ်ခးလီၤစဲးပြဲးကျိဖိအိၣ်ဝဲတကပယူၥ်ဃီအဃိပျီတပိၢ်ပှၤဃ့ၢ်တၢ်ဒုးလီၢ်အိၣ်ကဒုဖိလၢအိၣ်ဘူးဝဲဒီးကၣ်စံၣ်နိၣ်ဒီးပယီၤသုးတၢ်လီၢ်တၢ်ကျဲတဖၣ်အံၤဘၣ်အိၣ်ဝဲလၢတၢ်ပလီၢ်ပဒီသးအပူၤထီဘိတကပယူၥ်ဃီအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
