လါမးရှး ၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ် တနံၤဃီအတီၢ်ပူၤ ခီဖျိလၢပယီၤသုး အကျိဖးဒိၣ်ဒီးဒြိအံၤအဃိ ကမျၢၢ်ဘၣ်ဒိဝဲ(၂)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
ဖဲလါမးရှး ၂ သီ ဂီၤခီ ၉း၃၀ ဘျဲၣ်အဆၢကတီၢ် လၢကည့ၤကၠိ(ကညင်ကျွန်း)သဝီအပူၤ ပယီၤသုးခးလီၤ(၁၂၀ မမ) ကျိဖးဒိၣ် ၆ ဖျၢၣ်အဃိ ဘၣ်ဒိဝဲသဝီဖိ စီၤအဲၣ်တီၣ်စ့(၂၇)နံၣ်အံၤန့ၣ်လီၤ.
တကးဒံးဘၣ်တနံၤဃီတၢ်ကဲထီၣ်သးဝံၤဖဲဂီၤခီ ၁၀း၀၀ အဆၢကတီၢ်န့ၣ် ပယီၤသုးခီၣ်သုးရ့ၣ်(ခလရ-၂၉၄)သုးရ့ၣ်အံၤအပှၤ လဲၤတ့ၢ်လီၤဝဲဒြိမ့ၣ်ပိၢ်(၂)ဖျၢၣ်လၢ ကၠိကၠံ(ကျွန်းကြီး)သဝီပူၤအဃိ ဘၣ်ဒိစ့ၢ်ကီးဝဲ စီၤအဲၣ်ကီၢ်စ့(၂၈)နံၣ်အံၤအဂ့ၢ်န့ၣ် ကီၢ်ရ့ၣ် တၢ်မၤနီၣ်ပူၤအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးကည့ၤကၠိသဝီလၢပယီၤသုးခးလီၤကျိဖးဒိၣ်ခဲအံၤန့ၣ် အဘူးကတၢၢ်ဖဲအပူၤကွံၥ်လါဖ့ၤဘြူၤအါရံၤ ၂၃ သီအနံၤစ့ၢ်ကီး ပယီၤသုးခီၣ်သုးရ့ၣ်(ခလရ-၂၆၄)သုးရ့ၣ်တဒူၣ်ဃီဝဲအံၤ ခးလီၤဝဲ(၈၁ မမ)ကျိဖးဒိၣ်အဃိ ကမျၢၢ်ပိၥ်မုၣ်ဘၣ်ဒိဘၣ်ထံးဒံးဝဲ(၃)ဂၤ ကဲထီၣ်ဒံး ဝဲဒၣ်န့ၣ်လီၤ.
လၢန့ၣ်အမဲၥ်ညါတနံၤဃီ ၂၃ သီဝဲန့ၣ်စ့ၢ်ကီးလၢမူကီၢ်ဆၣ်အပူၤ ပယီၤသုးလၢအိၣ်နၣ်သၤကွ့ ဟီၣ်ကဝီၤအံၤတဖၣ် ခးလီၤဝဲ(၈၁ မမ) ကျိဖးဒိၣ်ဆူငနွါစ့ၣ်(ငနွားဆိပ်)သဝီပူၤအဃိ ကမျၢၢ်ပိၥ်ခွါဘၣ်ဒိၣ်ဘၣ်ထံးဝဲ(၂)ဂၤဒီးဖဲန့ၣ်အကျါတဂၤန့ၣ်မ့ၢ်ဝဲဖိသၣ်(၁၅) နံၣ် န့ၣ်လီၤ.
ဒ်တလါတဘျီတၢ်မၤနီၣ်စရီပူၤအသိးန့ၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်,မူဒီးဆီထံးကီၢ်ဆၣ်ဟီၣ်ကဝီၤအပူၤ အပူၤကွံၥ် လါယနူၤအါရံၤတလါအတီၢ်ပူၤ သုးမီၤစိရိၤအံၤသူဝဲကဘီယူၤ,ကျိဖးဒိၣ်,ဒြိဟးတ့ၢ်လီၤတၢ်လၢ ကမျၢၢ်အိၣ်ဆိး,တၢ်ဖံး အီၣ်မၤအီၣ် လီၢ်ပၥ်ဖှိၣ်အိၣ်ဝဲအဘျီ(၆၀)ဘျဲၣ်ညါန့ၣ်လီၤ. ခီဖျိလၢတၢ်ဟူးတၢ်ဂဲၤအံၤအဃိ ကမျၢၢ်သံဝဲ(၁၂)ဂၤ,ဘၣ်ဒိ (၁၉)ဂၤ အမဲၥ်ညါကၠိ ဃုၥ်ဒီး ကမျၢၢ်ဟံၣ်တၢ်သူၣ်ထီၣ်ဟးဂီၤဝဲ(၁၉)ဖျၢၣ်န့ၣ်လီၤ.
