လါမးရှး ၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ကီၢ်ဆၣ်အပူၤ ပယီၤသုးကျိၤလၢအနုၥ်လီၤတဖၣ်အံၤခီဖျိအဝဲသ့ၣ်တၢ်ဟူး တၢ်ဂဲၤအံၤအဃိ ကမျၢၢ်သံဝဲ(၃၀)ဘျဲၣ်အမဲၥ်ညါဖီၣ်ဃၥ်ဝဲကမျၢၢ်အဂၤ(၁၀၀)ဘျဲၣ်အဂ့ၢ်န့ၣ် လီၢ်ခၢၣ်သးခ့ၣ်အဲၣ်ယူၣ်ထုးထီၣ် ပၥ်ဖျါ ဝဲဖဲတနံၤအံၤမုၢ်ဃ့ၢ်လီၤအခါ န့ၣ်လီၤ.
ဖဲလါမးရှး ၅ သီအနံၤန့ၣ် ပယီၤသုးခီၣ်ချ့သုးရ့ၣ်(ခမရ-၂၀/ခမရ-၄၃၉)ဒီးခီၣ်သုးရ့ၣ်(ခလရ-၂၆၄)သုးရ့ၣ်သ့ၣ်တဖၣ်အံၤပၥ်ဖှိၣ်ထီၣ် သးနုၥ်လီၤဝဲလၢယ့ၤတွ့ကိ(ရေတွင်းကုန်း)ကရူၢ်ပူၤဝံၤ ဖီၣ်ဝဲကမျၢၢ်(၁၆၀)ဂၤလၢတၢ်ဂ့ၢ်တအိၣ်နီတမံၤအံၤဘၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တကတီၢ်ဃီတၢ်ကဲထီၣ်သးဖဲန့ၣ်ဝံၤလါမးရှး ၇ သီအနံၤန့ၣ် ပယီၤသုးကျိၤသုးပၥ်ဖှိၣ်လၢအနုၥ်လီၤသ့ၣ်တဖၣ်အံၤဒီး ဟီၣ်ကဝီၤ ကညီဒီကလုၥ်တၢ် ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်ဝဲဒီး ဖဲန့ၣ်ပယီၤသုးတကပၤခီဖျိသူဝဲဒြိ, ကဘီယူၤစ့ၢ်ကီး ဟဲခးလီၤတၢ်လၢယ့ၤတွ့ကိကရူၢ် ဒူသဝီပူၤအဃိ ကမျၢၢ်လၢတၢ်ဖီၣ်ဃၥ်ဝဲတဖၣ်သံဝဲ(၂၅)ဂၤန့ၣ်လီၤ.
တကးဒံးဘၣ်ကမျၢၢ်လၢတၢ်ဖီၣ်ဃၥ်ဝဲသ့ၣ်တဖၣ်အံၤအကျါ(၅)ဂၤန့ၣ် ပယီၤသုးမၤသံကွံၥ်ဝဲစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ် လံၥ်တၢ်ပၥ်ဖျါ အပူၤပၥ်ဖျါဝဲန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးလၢပယီၤသုးကျိၤနုၥ်လီၤမၤသံဒီးဖီၣ်ဝဲကမျၢၢ်တၢ်ဂ့ၢ်အံၤန့ၣ် ကီၢ်ရ့ၣ်ပှၤဘၣ်မူဘၣ်ဒါတဂၤစံးဝဲလၢ“ခဲအံၤ လၢချၢၣ်လွံၢ်ထူၣ်တကပၤအံၤတၢ်အိၣ်သးဃံးဒိၣ်မးလီၤ.ပယီၤသုးနုၥ်လီၤအါအါဂီၢ်ဂီၢ်လၢဒူသဝီပူၤဒီးဖီၣ်ဆူၣ်,တီၢ်သံခးသံဝဲအိၣ်လီၤ.ခဲအံၤပယီၤသုးအိၣ်ဒံးလၢသဝီပူၤဒံးလီၤ.ထဲပယီၤသုးမၤသံဝဲန့ၣ်အိၣ်လၢအဂၤ(၃၀)ဘျဲၣ်လံ.ဖီၣ်ဝဲန့ၣ်အိၣ်လၢအကယၤဘျဲၣ်ညါ.ကမျၢၢ်လၢအဖီၣ်ဝဲတဖၣ်န့ၣ်တနီၤန့ၣ်အဝဲသ့ၣ်ဆှၢထီၣ်ဝဲဆူအသုးကလၢၤပူၤဒီးတနီၤန့ၣ်ပၥ်ဝဲလၢသဝီပူၤဒံးလီၤ.” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲတဟါအံၤန့ၣ်လီၤ.
ဘၣ်ဃးဒီးပယီၤသုးကျိၤနုၥ်လီၤဖီၣ်မၤသံကမျၢၢ်တၢ်ဂ့ၢ်အံၤဒ်ကညီဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲကရူၢ်(KPSN)ထုးထီၣ်ပၥ်ဖျါဝဲဖဲတနံၤ အံၤအသိးန့ၣ် ခီဖျိလၢဒြိဒီးကဘီယူၤအံၤအဃိ ပှၤသံ(၂၀)ဘျဲၣ်အံၤအကျါပၣ်ဃုၥ်ဝဲဖိသၣ်(၆ နံၣ်တုၤ ၁၅)နံၣ်အဘၢၣ်စၢၤ ၁၃ ဂၤ အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤခီဖျိလၢပယီၤသုးကျိၤနုၥ်လီၤတၢ်ဒုးကဲထီၣ်ဒီးကဘီယူၤ,ဒြိအမဲၥ်ညါပယီၤသုးမၤသံကမျၢၢ်ဖီၣ်ဒီးမၤသံကမျၢၢ်အိၣ်ထီၣ်ဒ်အံၤ အဖီခိၣ်ယ့ၤတွ့ကိဃုၥ်ဒီးဒူသဝီလၢအိၣ်ဘူးဖဲန့ၣ်သ့ၣ်တဖၣ်ပျံၤတၢ်ဃ့ၢ်ထီၣ်ဝဲအါအါဂီၢ်ဂီၢ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲ အသိး သ့ၣ်ညါဘၣ်န့ၣ်လီၤ.
သုးမီၤစိရိၤအံၤလီၤဆီဒၣ်တၢ်အဝဲသ့ၣ်မၤဝဲတၢ်ဃုထၢဝံၤလီၢ်န့ၣ် လုၢ်သ့ၣ်ခါပတၥ်မၤကမၣ်ဝဲပှၤဟီၣ်ခိၣ် ဖိခွဲးယၥ်ဟဲ အါထီၣ်ဝဲဖျိဖျိဖျါဖျါအဂ့ၢ်န့ၣ် ခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်စံးစ့ၢ်ကီးဝဲန့ၣ်လီၤ.
