လါမးရှး ၆ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤအပူၤ လါဖ့ၤဘြူၤအါရံၤတလါအတီၢ်ပူၤ တၢ်ဒုးကဲထီၣ်ဝဲတဘျီ(၉၀)ဘျဲၣ်ဒီး ပယီၤသုးတကပၤသံဘၣ်ဒိဘၣ်ထံးအဂၤ(၄၀)ဘျဲၣ်အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲတနံၤအံၤလါမးရှး ၆ သီအံၤ န့ၣ် လီၤ.
(သုးက့ ၅)တၢ်ပၢဟီၣ်ကဝီၤအပူၤစးထီၣ်ဖဲလါဖ့ၤဘြူၤအါရံၤ ၁ သီတုၤ ၂၈ သီလၢတလါအတီၢ်ပူၤ ပယီၤသုးဒီးဟီၣ်ကဝီၤကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤ တၢ်ဒုးကဲထီၣ်ဝဲခဲလၢၥ်(၉၁)ဘျီအဃိ ပယီၤသုးသံ(၁၃)ဂၤဒီးဘၣ်ဒိဘၣ် ထံးဝဲ (၃၄)ဂၤန့ၣ်လီၤ.
ဒ်န့ၣ်အသိးပယီၤသုးသံတဖၣ်အကျါပၣ်ဃုၥ်ဝဲသုးစကီၤ(၁)ဂၤဒီး လၢန့ၣ်အမဲၥ်ညါတၢ်ဒုးဘျီဝဲအံၤအပူၤစ့ၢ်ကီးဟီၣ်ကဝီၤ(KNLA) သုးပၥ်ဖှိၣ်တကပၤတၢ်ဘၣ်ဒိဘၣ်ထံးအိၣ်ဝဲတဆံးတက့ၢ် အဂ့ၢ်န့ၣ် လံၥ်တၢ်ပၥ်ဖျါအပူၤစံး ဝဲန့ၣ်လီၤ.
တကးဒံးဘၣ်တလါအတီၢ်ပူၤအံၤစ့ၢ်ကီး လၢဟီၣ်ကဝီၤကမျၢၢ်အိၣ်ဆိးလီၢ်ကျဲ,တၢ်ဖံးအီၣ်မၤအီၣ်အပူၤ ပယီၤသုးကဘီယူၤ လဲၤတ့ၢ်လီၤဝဲမ့ၣ်ပိၢ်(၂၁)ဘျီ, ခးလီၤဝဲ(60 mm/120 mm/122 mm)ကျိဖးဒိၣ် (၁၀)ဘျီဒီး လဲၤတ့ၢ်လီၤဝဲဒြိမ့ၣ်ပိၢ်(၈)ဘျီညါ အဂ့ၢ်န့ၣ် စံးဝဲန့ၣ်လီၤ.
ခီဖျိလၢကဘီယူၤဒီးကျိဖးဒိၣ်,ဒြိအံၤအဃိ လီၢ်ကဝီၤကမျၢၢ်သံ(၁)ဂၤ,ဘၣ်ဒိဘၣ်ထံး(၂)ဂၤအမဲၥ်ညါ ဟံၣ်ဃုၥ်ဒီးတၢ်သူၣ်ထီၣ် လၢအဂၤ ဟးဂီၤဝဲ(၂)ဖျၢၣ်ဟးဂီၤဝဲဒၣ်စ့ၢ်ကီးန့ၣ်လီၤ.
မုၢ်တြီၢ်ကီၢ်ရ့ၣ်ဟီၣ်ကဝီၤအပူၤမ့ဘၣ်ကွၢ်ဖဲအပူၤကွံၥ်လါယနူၤအါရံၤတလါအတီၢ်ပူၤန့ၣ်စ့ၢ်ကီး ပယီၤသုးဒီး(KNLA )သုးပၥ်ဖှိၣ် အဘၢၣ်စၢၤ တၢ်ဒုးကဲထီၣ်ဝဲ(၁၂၆)ဘျီဒီး ဖဲန့ၣ်ပယီၤသုးတကပၤသံ(၃၄)ဂၤ,ဘၣ်ဒိဘၣ်ထံးဝဲ(၅၈)ဂၤန့ၣ်လီၤ. ဒ်န့ၣ်အသိးသုးမီၤ စိရိၤ သူဝဲအကဘီယူၤ, ကျိဖးဒိၣ်ဒီးဒြိအိၣ်ဝဲဒၣ်လၢအဘျီ(၅၀)ဘျဲၣ်ညါအဂ့ၢ်န့ၣ် တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ.
တကီၢ်ခါခဲအံၤလီၤဆီဒၣ်တၢ်လၢဖၣ်ပူၣ်ဒုးယၤသုးကလၢၤလၢဟီၣ်ကဝီၤတၢ်ပၢၢ်ဆၢသုးပၥ်ဖှိၣ်စးထီၣ်က့ၤကဝီၤခးဝဲဖဲလါဖ့ၤဘြူၤ အါရံၤထီၣ်အခါအံၤန့ၣ် တုၤလၢခဲအံၤတစုတယံၤတမီၢ်တၢ်ဒုးဆဲးပြဲးဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤဒီး စှၤသီအတီၢ်ပူၤအံၤ ပယီၤသုးလၢအိၣ်သုးကလၢၤအံၤအပူၤတဖၣ်ခးစိဃီၤဝဲကျိဖးဒိၣ်အိၣ်ဝဲ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဟီၣ်ကဝီၤပူၤ ဖဲန့ၣ်တဂၤ စံးဝဲဒၣ် န့ၣ်လီၤ.
