လါမးရှး ၁၆ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါအနံၤလၢခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)ဟီၣ်ကဝီၤအပူၤ ခီဖျိလၢ(KTLA)ကရူၢ်သုးခိၣ်အဲၣ်ခွံအပှၤခိးခးဝဲအံၤအဃိ တၢ်ပၢၢ်ဆၢသိၣ်မှံၤအပှၤသုးဖိသံဘၣ်ဒိဘၣ်ထံးဝဲ(၉)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါအနံၤန့ၣ်လီၤ.
လၢကစၢၢ်ဒိၣ်ကီၢ်ဆၣ် ပီချိဟီၣ်ကဝီၤအပူၤ ဖဲမဟါလါမးရှး ၁၄ သီ ဟါခီ ၃း၀၀ နၣ်ရံၣ်အဆၢကတီၢ် ကီၢ်သူလ့ၤသုးမုၢ်ဒိၣ်(KTLA) သုးခိၣ်အဲၣ်ခွံအပှၤ အိၣ်ခိးခးလီၤဝဲတၢ်ပၢၢ်ဆၢသိၣ်မှံၤ(ဗထူး)သုးကရူၢ်အပှၤဖဲသမံပိၥ်သီသဝီဒီးကနဲဃီသဝီဘၢၣ်စၢၤအဃိ သိၣ်မှံၤ အသုးဖိသံဝဲ(၄)ဂၤဒီးဘၣ်ဒိဘၣ်ထံးဝဲ(၃)ဂၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
ဘၣ်ဆၣ်တၢ်ကဲထီၣ်သးဘျီဝဲအံၤကတီၢ် (ဗထူး)တၢ်ပၢၢ်ဆၢသိၣ်မှံၤအပှၤလီၤမၢ်ဝဲ ၂ ဂၤအဃိ ဖဲတၢ်က့ၤထံၣ်က့ၤအဝဲသ့ၣ်အခါ ဘၣ်တၢ်မၤသံအီၤအၢအၢသီသီလၢသုးခိၣ်အဲၣ်ခွံအပှၤအဂ့ၢ်န့ၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တကးဒံးဘၣ်တၢ်ကဲထီၣ်သးဘျီဝဲအံၤတၢ်သံတၢ်ဘၣ်ဒိဘၣ်ထံးအမဲၥ်ညါ တၢ်ပၢၢ်ဆၢသိၣ်မှံၤအသိလ့ၣ်ဟးဂီၤကွံၥ်ဝဲတခိၣ်အသိး (KTLA)မၤန့ၢ်ဝဲတၢ်ပၢၢ်ဆၢသိၣ်မှံၤအကျိ(၉)ခိၣ်ဃုၥ်ဒီးသုးတၢ်ပီတၢ်လီတနီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ပၢၢ်ဆၢသိၣ်မှံၤကရူၢ်အပှၤလၢသုးခိၣ်အဲၣ်ခွံအပှၤခိးခးဝဲလၢတၢ်ဘၢၣ်စၢၤကျဲပူၤသ့ၣ်တဖၣ်အံၤ မ့ၢ်ပှၤသ့ၣ်တဖၣ်လၢအိၣ်ဟဲ က့ၤလီၤဝဲဒၣ်လၢမိဒီၣ်ဒုးယၤရဲၣ်ကျဲၤအပူၤအဂ့ၢ်န့ၣ် ခ့ၣ်အဲၣ်ယူၣ် စံးစ့ၢ်ကီးဝဲလၢအလံၥ်တၢ်ပၥ်ဖျါအပူၤန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးအံၤဒ်သိးကသ့ၣ်ညါဘၣ်တၢ်ဂ့ၢ်ကဲထီၣ်သးအဂ့ၢ်အကျိၤလီၤတံၢ်လီၤဆဲးအဂီၢ်ပခ့ၣ်အဲးစံၣ်ဂုၥ်ကျဲးစၢး ဆဲးကျိးဝဲ(KTLA)ပှၤဘၣ်မူဘၣ်ဒါဘၣ်ဆၣ်ဆဲးကျိးတန့ၢ်ဝဲဘၣ်န့ၣ်လီၤ.
ပီချိဟီၣ်ကဝီၤလၢတၢ်ခိးခးဝဲတၢ်ပၢၢ်ဆၢသိၣ်မှံၤခဲအံၤန့ၣ်အပူၤကွံၥ်လါမးရှး ၄ သီ ဒီး ၇ သီအနံၤစ့ၢ်ကီး ခီဖျိလၢ(KTLA)သုးခိၣ်အဲၣ်ခွံ အပှၤခိးခးဝဲဒီးဖီၣ်မၤသံဝဲအံၤအဃိ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁၂ အပှၤသံဝဲ(၂)ဂၤဒီးဘၣ်ဒိဘၣ်ထံး (၅)ဂၤ ကဲထီၣ်ဒံးဝဲန့ၣ်လီၤ.
တကးဒံးဘၣ်တၢ်ကဲထီၣ်သးဖဲန့ၣ်ဝံၤလါမးရှး ၁၀ သီ မုၢ်ထူၣ်အဆၢကတီၢ်န့ၣ်စ့ၢ်ကီး ပီချိဟီၣ်ကဝီၤကမျၢၢ်ပိၥ်ခွါတဂၤ ယီၢ်ဘၣ် စ့ၢ်ကီးဝဲဟီၣ်လၥ်မ့ၣ်ပိၢ်ဖဲဖိလးမဲတၢ်လီၢ်လၢ(KTLA)အပှၤဒိးလီၤဃၥ်ဝဲအံၤအဃိအခီၣ်တူၥ်ကွံၥ်ဝဲတကပၤအဂ့ၢ်န့ၣ် ဘျံးဒဝဲၢ်ကီၢ်ရ့ၣ် ထုးထီၣ်ပၥ်ဖျါတ့ၢ်ဝဲန့ၣ်လီၤ.
ဟီၣ်ကဝီၤ(KNLA)သုးရ့ၣ်-၁၂ အပှၤဒီး(KTLA)သုးခိၣ်အဲၣ်ခွံဖီၣ်စုကဝဲၤကရူၢ်ခံဒူၣ်အံၤလၢတၢ်ဖ့ၣ်စၢကဲထီၣ်န့ၢ်ဝဲလၢ (၃)နံၣ် ဃၣ်ဃၣ် အံၤန့ၣ် ခီဖျိလၢတၢ်ဂ့ၢ်အကလုၥ်ကလုၥ်အဃိ ထံၣ်ဘၣ်လၢတၢ်ခးလိၥ်သးကဲထီၣ်အိၣ်ဝဲတလီၢ်လီၢ်ဒီးတၢ်သံတၢ်ပှၢ် တၢ်ဘၣ်ဒိဘၣ် ထံးစ့ၢ်ကီးကဲထီၣ်တုၤဝဲလၢခဲအံၤန့ၣ်လီၤ.
သုးခိၣ်အဲၣ်ခွံကရူၢ်အံၤလူၤကူၣ်အၢကူၣ်သီဝဲတၢ်ပၢၢ်ဆၢသုးကရူၢ်ပၥ်ဝဲဒ်ဒုၣ်ဒါအသိးတကးဒံးဘၣ် တနံၤဘၣ်တနံၤမၤဝဲတၢ်စုဆူၣ် ခီၣ်တကးနးဒိၣ်ထီၣ်ဝဲဒၣ်ကွ့ၢ်ကွ့ၢ်အဃိအဝဲသ့ၣ်တၢ်ဟူးတၢ်ဂဲၤအံၤဖျါလီၤဂၥ်ဒ်သိးပယီၤသုးမီၤစိရိၤအသုးတဖုအသိးအဂ့ၢ်န့ၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်စံးဝဲန့ၣ်လီၤ.
